រាជធានីភ្នំពេញ ៖ កម្មករ កម្មការិនីរោងចក្រកាត់ដេរមិថុនា ជាង១.០០០នាក់ក្នុងចំណោមជាង៤.០០០នាក់ ដែលខ្លះជិះរ៉ឺម៉កកង់បី និងខ្លះជិះម៉ូតូឌុប បាននាំគ្នាធ្វើដំណើរទៅកាន់រោងចក្រកាត់ដេរប៊ឺរីអឹភែរឹល ដើម្បីទាមទារឱ្យថៅកែដោះស្រាយប្រាក់អតីតភាពការងារដល់ពួកគេ។ រោងចក្រនេះគឺជាសាខារបស់រោងចក្រមិថុនាដែលត្រូវអន្តរាយខ្ទេចខ្ទី
រាជធានីភ្នំពេញ ៖ កម្មករ កម្មការិនីរោងចក្រកាត់ដេរមិថុនា ជាង១.០០០នាក់ក្នុងចំណោមជាង៤.០០០នាក់ ដែលខ្លះជិះរ៉ឺម៉កកង់បី និងខ្លះជិះម៉ូតូឌុប បាននាំគ្នាធ្វើដំណើរទៅកាន់រោងចក្រកាត់ដេរប៊ឺរីអឹភែរឹល ដើម្បីទាមទារឱ្យថៅកែដោះស្រាយប្រាក់អតីតភាពការងារដល់ពួកគេ។ រោងចក្រនេះគឺជាសាខារបស់រោងចក្រមិថុនាដែលត្រូវអន្តរាយខ្ទេចខ្ទីដោយអគ្គីភ័យកន្លងមកនេះ។ ការហែក្បួននេះបានធ្វើឡើងកាលពីព្រឹកថ្ងៃទី៥ ឧសភាដែលរោងចក្រខាងលើមានទីតាំងស្ថិតនៅតាមបណ្តោយផ្លូវអូដឹម-កប់ស្រូវ ភូមិព្រៃស្វាយ សង្កាត់ចោមចៅ ខណ្ឌដង្កោ ។
ក្រុមកម្មករបានឱ្យដឹងថា ពួកគេធ្វើការទាមទារនេះមានរយៈពេលជិត១ខែហើយដើម្បីឱ្យថៅកែដោះស្រាយប្រាក់អតីតភាពការងារ (ប្រាក់បំណាច់ឆ្នាំ) ឱ្យពួកគេទៅតាមច្បាប់ការងារក្រោយពេលរោងចក្រនោះត្រូវអគ្គីភ័យឆាបឆេះកាលពីជាង១ខែមុននោះ។ ដោយសារពុំមានដំណោះស្រាយពីថៅកែរោងចក្រទើបពួកគេធ្វើការតវ៉ាចាប់តាំងពីថ្ងៃទី៦ ខែមេសា រហូតមក តែពេលនេះព្រោះឈប់តវ៉ានៅមុខរោងចក្រមិថុនា នោះទៀតហើយព្រោះបានរងការបង្ក្រាបយ៉ាងចាស់ដៃពីសមត្ថកិច្ចនៅទីនោះ ទើបនាំគ្នាធ្វើដំណើរទៅតវ៉ានៅមុខរោងចក្រកាត់ដេរប៊ឺរី អឹភែរឹល វិញម្តង ព្រោះទីនោះក៏ជាសាខារបស់រោងចក្រមិថុនាដែរ ហើយទើបនឹងសាងសង់ថ្មី។
ក្រុមកម្មករបានបន្តថា រោងចក្រមិថុនាមានទីតាំងស្ថិតនៅតាមបណ្តោយមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ បានត្រូវភ្លើងឆាបឆេះកាលពីរសៀលថ្ងៃទី៣១ ខែមិថុនា កន្លងមកដែលគិតមកដល់ពេលនេះមានរយៈពេលជាង១ខែហើយ។ ក្រោយពេលរោងចក្រនោះឆេះ ថៅកែបានបើកប្រាក់ឈ្នួលឱ្យរួចរាល់ហើយ ប៉ុន្តែចំពោះប្រាក់អតីតភាពការងារ និងប្រាក់បំណាច់ឆ្នាំអត់បើកឱ្យឡើយ។ ពេលនោះពួកគេបានធ្វើការទាមទារ ប៉ុន្តែពុំមានដំណោះស្រាយ ហើយក្រោយមកថៅកែបានហៅដោះស្រាយដោយឱ្យប្រាក់បំណាច់ឆ្នាំត្រឹមតែម្នាក់២០ដុល្លារប៉ុណ្ណោះដែលចំនួននេះពួកគេមិនអាចទទួលយកបានឡើយ ព្រោះប្រាក់បំណាច់ឆ្នាំម្នាក់ៗត្រូវទទួលបានចាប់ពីជាង១០០ដុល្លារឡើងទៅ។ ពេលពួកគេធ្វើការតវ៉ាខ្លាំងថៅកែប្រាប់ថា ក្រុមហ៊ុនក្ស័យធនដោយសារអគ្គីភ័យ ប៉ុន្តែផ្ទុយទៅវិញពួកគេសម្លឹងមើលឃើញថា ក្រុមហ៊ុននេះមិនក្ស័យធនទេ ព្រោះពេលនេះកំពុងពង្រីកសាខារបស់ខ្លួនចំនួន៣កន្លែងធំៗទៀត គឺនៅអូរបែកក្អម១កន្លែង រោងចក្រប៊ឺរីអឹភែរឹលនេះ១កន្លែង និង១កន្លែងទៀតនៅឯខេត្តកំពង់ឆ្នាំង។
ក្រុមកម្មករបានបន្តថា ក្រោយពេលជួបរឿងរ៉ាវខាងលើថៅកែមិនបានបង្ហាញពីជំហរពាក់ព័ន្ធទៅនឹងការងាររបស់កម្មករថា ត្រូវធ្វើបែបណាឡើយ គឺបានលែងពួកគេចោលឱ្យនៅតែលតោលដូចខ្លែងដាច់ខ្សែ ហើយអ្វីដែលពួកគេគិតមិនយល់ថែមទៀតនោះ គឺពេលពួកគេសុំចូលធ្វើការនៅរោងចក្រសាខាដែលទើបសាងសង់ថ្មីនោះថៅកែអត់ទទួលយកទេឱ្យតែកម្មករចាស់ធ្លាប់ធ្វើការនៅរោងចក្រមិថុនានោះ គឺគេជ្រើសរើសយកតែកម្មករថ្មី ។ ដូច្នេះទង្វើនេះមានន័យថា ថៅកែមិនបានគិតពីអនាគតរបស់ពួកគេនោះឡើយ ទើបបានជាពេលនេះធ្វើព្រងើយកន្តើយមិនដឹងមិនឮជាមួយពួកគេបែបនេះ ហើយចំពោះរោងចក្រវិញរហូតមកដល់ពេលនេះពួកគេពុំទាន់ដឹងពីមូលហេតុនៃការឆេះច្បាស់លាស់នៅឡើយ។
ក្រុមកម្មករទាំងនេះបានស្នើសុំឱ្យស្ថាប័នពាក់ព័ន្ធនានាជាពិសេសសម្តេចអគ្គមហាសេនាបតីតេជោ ហ៊ុន សែន ជួយដល់ពួកគេផង ហើយពួកគេក៏ចង់ដឹងពីជំហររបស់ថៅកែរោងចក្រដែរថាតើមូលហេតុអ្វីទើបសាខារោងចក្រនោះមិនទទួលយកពួកគេជាកម្មករចាស់បម្រើការងាររាប់ឆ្នាំហើយនោះចូលធ្វើការផង ៕
ចែករំលែកព័តមាននេះ