ចម្លែកណាស់! ក្រពើញី១ក្បាលរក្សាព្រហ្មចារីយ៍ពីកំណើតដល់បច្ចុប្បន្ន តែអាចបង្កកំណើតដោយខ្លួនឯង
កូស្តារីកា ៖ អ្នកវិទ្យាសាស្ត្របានកត់ត្រាករណីដំបូងគេបង្អស់លើពិភពលោក ដោយសត្វក្រពើញីមួយ
កូស្តារីកា ៖ អ្នកវិទ្យាសាស្ត្របានកត់ត្រាករណីដំបូងគេបង្អស់លើពិភពលោក ដោយសត្វក្រពើញីមួយក្បាល ដែលរក្សាព្រហ្មចារីតាំងពីកំណើតមក ដោយរស់នៅតែឯង និងមិនធ្លាប់មានទំនាក់ទំនងស្នេហាជាមួយក្រពើឈ្មោលអស់ពេលប្រហែល១៦ឆ្នាំ ប៉ុន្តែបែរជាអាចបង្កកំណើត ឬផើមដោយខ្លួនឯង។
អត្ថបទមួយ ដែលចេញផ្សាយកាលពីថ្ងៃទី០៧ ខែមិថុនា កន្លងទៅ ដោយទស្សនាវដ្តី Biology Letters អ្នកស្រាវជ្រាវបានអះអាងថា ក្រពើញីអាយុ១៨ឆ្នាំមួយក្បាលនេះ ត្រូវបាននាំមកពីសហរដ្ឋអាមេរិកយកមកដាក់ក្នុងសួនសត្វ Parque Reptilandia ប្រទេសកូស្តារីកាក្នុងឆ្នាំ ២០០២ នៅពេលវាអាយុ២ឆ្នាំ ហើយត្រូវបានដាក់ដាច់ដោយឡែកពីក្រពើផ្សេងទៀត ចាប់តាំងពីពេលនោះរហូតដល់ពេលបច្ចុប្បន្ន។
នៅក្នុងខែមករា ឆ្នាំ២០១៨ អ្នកថែសួនសត្វបានប្រទះឃើញពងចំនួន ១៤ ក្នុងកន្លែងក្រពើញីនោះរស់នៅ។ ស៊ុតទាំងអស់មិនញាស់ទេ ប៉ុន្តែមួយមានកូនបង្កកំណើតពេញលេញ។ បាតុភូតចម្លែកនេះ ក្នុងវិទ្យាសាស្ត្រត្រូវបានហៅថា «កំណើតព្រហ្មចារី» ដែលត្រូវបានគេរកឃើញនៅក្នុងប្រភេទសត្វស្លាប ត្រី និងសត្វល្មូនដទៃទៀត ប៉ុន្តែមិនធ្លាប់មានក្នុងប្រភេទសត្វក្រពើនោះទេ។
ដោយសារតែបញ្ហានេះហើយ ក្រុមអ្នកវិទ្យាសាស្ត្ររបស់ឧទ្យានបានទាក់ទងទៅលោកវេជ្ជបណ្ឌិត Warren Booth ដែលកើតនៅទីក្រុង Belfast ប្រទេសអៀរឡង់ខាងជើង ដែលឥឡូវនេះ គាត់កំពុងធ្វើការលើការស្រាវជ្រាវឈ្មោះថា «Virginia Tech» នៅសហរដ្ឋអាមេរិក ខណៈដែលគាត់ឆ្លងកាត់ការសិក្សាអំពី «កំណើតព្រហ្មចារី» ដែលត្រូវបានគេស្គាល់តាមវិទ្យាសាស្ត្រថា Parthenogenesis អស់រយៈពេល ១១ឆ្នាំកន្លងមកហើយ។
នៅក្នុងករណីដ៏ចម្លែកនេះ លោកវេជ្ជបណ្ឌិតបានធ្វើការវិភាគលើការបង្កកំណើតកូនរបស់ក្រពើញីមួយក្បាលនោះ ហើយរកឃើញថា មានហ្សែនច្រើនជាង ៩៩.៩% ដូចគ្នាទៅនឹងមេ ដែលបញ្ជាក់បានថា វាមិនមានបានោះទេ។
នៅក្នុងទ្រឹស្តីវិទ្យាសាស្ត្រមួយបានបង្ហាញថា ប្រភេទសត្វដែលមានសមត្ថភាពបង្កកំណើតខ្លួនឯង ឬ Parthenogenesis នៅពេលដែលចំនួនពួកវាថយចុះ ហើយពួកវានឹងជិតផុតពូជ។ លោកវេជ្ជបណ្ឌិត Booth បានប្រាប់សារព័ត៌មាន BBC ថា វាអាចកើតឡើងចំពោះប្រភេទសត្វដាយណូស័រមួយចំនួន នៅពេលដែលចំនួនរបស់វាធ្លាក់ចុះ ដោយសារតែការផ្លាស់ប្តូរបរិស្ថាន៕ (ដកស្រង់ចេញពី BBC, The Guardian និង USA Today)
ចែករំលែកព័តមាននេះ