លោកស្រី សេង បទុម តារាភាពយន្ត និងតារាចម្រៀងទសវត្ស៦០ និង៧០ បានធ្វើដំណើរមកមាតុភូមិយ៉ាងស្ងប់ស្ងាត់បំផុត បន្ទាប់ពីលោកស្រីខានបានមកឃើញប្រទេសកម្ពុជាអស់រយៈពេលជាង២០ឆ្នាំមកហើយ ក្រោយពេល
រាជធានីភ្នំពេញ ៖ លោកស្រី សេង បទុម តារាភាពយន្ត និងតារាចម្រៀងទសវត្ស៦០ និង៧០ បានធ្វើដំណើរមកមាតុភូមិយ៉ាងស្ងប់ស្ងាត់បំផុត បន្ទាប់ពីលោកស្រីខានបានមកឃើញប្រទេសកម្ពុជាអស់រយៈពេលជាង២០ឆ្នាំមកហើយ ក្រោយពេលចេញទៅរស់នៅលើទឹកដីអាមេរិក ។
ក្នុងវេលាដ៏ពិសេសនៃការជួបជុំញាតិមិត្តនេះ លោកស្រីក៏បានឆ្លៀតពេលថតចម្រៀង៣បទ ដែលកប់បាត់ជាយូរមកហើយ ទុកជាមរតកអនុស្សាវរីយ៍ក្នុងវ័យ៧០ឆ្នាំនេះ នៅមុនពេលលោកស្រីវិលត្រឡប់ទៅកាន់សហរដ្ឋអាមេរិកវិញ។
ចម្រៀងទាំង៣បទនេះ រួមមាន ៖ បទ «សួនកំសត់» ស្នាដៃនិពន្ធរបស់កវី យ៉ង់ ឈៀង ហៅសំនៀង ឬទ្ធី សំនៀងដើមអ្នកម្នាង សៀង ឌី, បទ «តុក្កតាអភ័ព្វ» ស្នាដៃនិពន្ធរបស់កវី យ៉ង់ ឈៀង ហៅសំនៀង ឬទ្ធី សំនៀងដើម លោកស្រី កែវ មន្ថា ជាបទក្នុងខ្សែភាពយន្ត និងបទ «ទីវាលសត្វយំ» សំនៀងដើម អ្នកចម្រៀងរៀមច្បងកែវ សេដ្ឋា។
លោកស្រី សេង បទុម បានរំលឹកតាមវីដេអូឃ្លីបមួយបង្ហោះផ្សាយក្នុងគេហទំព័រហ្វេសប៊ុកផ្លូវការនៃក្រុមដំណើរខ្មែរថា «ចម្រៀងទាំង៣នេះ សុទ្ធតែជាចម្រៀងដែលលោកស្រីស្រឡាញ់ពេញបេះដូង ហើយចម្រៀងដើមនៃបទទាំងនោះ បានវិនាសបាត់បង់ដោយសារសង្គ្រាមអស់ទៅហើយ នៅឡើយតែក្នុងការចងចាំរបស់មហាជនខ្មែរដែលទាន់ជំនាន់នោះតែប៉ុណ្ណោះ។ កត្តានេះ បានជំរុញចិត្តលោកស្រីត្រូវលះបង់ពេលវេលាខ្លះ មកថតបទទាំងនោះឡើងវិញ ដោយចំណាយថវិកាផលិតផ្ទាល់ពី វីរៈ វ៉ារ៉ានី ប្រធានក្រុមដំណើរខ្មែរ និងកិច្ចចាត់ចែងផលិតពីក្រុមតន្ត្រីអនុស្សាវរីយ៍។ ហើយតាមរយៈបទចម្រៀងទាំងអស់នេះ លោកស្រីបានជូនសិទ្ធិទៅកាន់ក្រុមដំណើរខ្មែរ ដើម្បីរៀបចំផលិតជាវីដេអូផ្សាយជាឧត្តមប្រយោជន៍ក្នុងវង្វង់សិល្បៈខ្មែរ»។
បើយោងតាមការរៀបរាប់របស់លោក វីរៈ វ៉ារ៉ានី ប្រធានក្រុមដំណើរខ្មែរ បានអោយដឹងថា «លោកមានសេចក្តីរំភើបរីករាយណាស់ ដែលនេះជាកិត្តិយសដ៏ធំធេង ដោយបានលោកស្រី សេង បទុម តារារៀមច្បងជំនាន់មុន បកស្រាយបទទាំងនោះឡើងវិញ សម្រាប់ក្រុមដំណើរខ្មែរ និងក្រុមតន្ត្រីអនុស្សាវរីយ៍ ក៏ដូចជាមហាជនដែលគាំទ្រមរតកចម្រៀងជំនាន់មុន»។
លោក វីរៈ វ៉ារ៉ានី ប្រធានក្រុមដំណើរខ្មែរ ជាអ្នកស្រាវជ្រាវឯកសារចម្រៀង និងភាពយន្តដ៏ល្បីឈ្មោះមួយរូបនៅក្នុងប្រទេសកម្ពុជា ហើយជាអ្នកអធិប្បាយដ៏មានទឹកដមសំឡេងពីរោះជាប់ចិត្តម្នាក់ផងនោះ បានប្រាប់អោយដឹងបន្ថែមទៀតថា «ក្រោយពីលោកសំរាកពីក្រុមព្រះសុរិយាកាលពីថ្ងៃទី១ ខែកុម្ភៈ ឆ្នាំ២០២៣កន្លងទៅ លោកក៏បានចាប់ផ្តើមរៀបចំគម្រោងការងារជាច្រើននៅលើវិស័យសិល្បៈភាពយន្ត ចម្រៀង និងប្រវត្តិសាស្ត្រខ្មែរ ទាំងការផលិតវីដេអូ និងការសរសេរសៀវភៅ ដោយបានបង្កើតក្រុមដំណើរខ្មែរ និងក្រុមតន្ត្រីអនុស្សាវរីយ៍ ដែលមានលោកជាប្រធាន និងមានសមាជិកចំនួន៣៨នាក់។ ការផលិតចម្រៀងដែលបាត់បង់ឡើងវិញនេះ គឺជាគម្រោងមួយក្នុងចំណោមគម្រោងជាច្រើនរបស់ក្រុមលោក ដែលកំពុងដំណើរការយ៉ាងសស្រាក់សស្រាំ»។
លោក វីរៈ វ៉ារ៉ានី បានបញ្ជាក់បន្ថែមថា «ក្រោយពេលបទចម្រៀងទាំងនោះផលិតជាសំឡេងរួចហើយ ក្រុមការងារដំណើរខ្មែរ និងរៀបចំផលិតជា MV ដោយច្នៃឡើងតាមលំនាំសាច់រឿងដើមនៃបទទាំងនោះ រួចបង្ហោះផ្សាយជាសាធារណៈនៅក្នុងបណ្តេញសង្គមផ្លូវការរបស់ក្រុមលោក»។
សូមបញ្ជាក់ផងដែរថា តារារៀមច្បង សេង បទុម ក្រៅពីមានឈ្មោះល្បីក្នុងវិថីសិល្បៈភាពយន្តថា ជាតារាសិចស៊ីប្រចាំកម្ពុជាសម័យសាធារណរដ្ឋខ្មែរ លោកស្រីក៏ជាអ្នកចម្រៀងយ៉េយ៉េមួយដួង នៃវង់តន្ត្រីកងពលថ្មើរជើងលេខ១ ហើយក៏ជាមិត្តដ៏ជិតស្និទ្ធបំផុតជាមួយនឹងរាជិនីសំឡេងមាស រស់ សេរីសុទ្ធា។ លោកស្រីបានរៀនច្រៀងចម្រៀងតាំងពីមុនលោកស្រីចូលសម្តែងភាពយន្តម្ល៉េះ លុះមកដល់ឆ្នាំ១៩៦៦ លោក ស៊ីន ស៊ីសាមុត ជាគ្រូរបស់លោកស្រីធ្លាប់តែងចម្រៀងមួយបទប្រគល់អោយលោកស្រីច្រៀងផ្សាយវិទ្យុជាតិ គឺបទ «អូនសូមផ្ញើខ្លួន» ដែលជាចម្រៀងដំបូងបង្អស់របស់លោកស្រី។
គួររំលឹកថា ៖ ចាំទេ! អតីតតារាសម្តែងលោកស្រី សេង បទុម ស្កាត់ជួប សោម ដូរិន ដែលជួយជីវិតរួចផុតពីដៃខ្មែរក្រហម ៕
ចែករំលែកព័តមាននេះ