ខេត្តសៀមរាប ៖ ពិតជាថ្មីប្លែកសម្រាប់មហាជនទៀតហើយ ដោយកាលពីថ្មីៗកន្លងទៅនេះ មានបុរសម្នាក់បានច្នៃសម្លៀកបំពាក់មួយឈុតធ្វើអំពីសន្ទះសម្បកខ្យង ហើយកំពុងតែទទួលបានការគាំទ្រ និងចាប់អារម្មណ៍យ៉ាងខ្លាំង ក្រោយពេលឃើញសម្លៀកបំពាក់មួយឈុតនេះ ហើយនឹងស្នាដៃរបស់លោកជាច្រើនទៀត ដែលដាក់តាំងជាបន្តបន្ទាប់។
ជាការកត់សម្គាល់ អាវដែលធ្វើពីសន្ទះរបស់សត្វខ្យងនោះឃើញថា អាវមួយសម្រាប់នេះ ដូចជាឈុតនៅក្នុងរឿងភាគចិន ដែលអ្នកក្លាហានពាក់នៅពេលប្រយុទ្ធ ដោយពន្លឺនៃសម្បកខ្យងបានចែងចាំងចេញមកពិតជាស្អាតប្លែកមែន រាល់គំនិតច្នៃប្រឌិតរបស់បុរសម្នាក់នេះ។
ប្រាកដណាស់ បុរសរូបនេះ មិនត្រឹមតែច្នៃកាក់សំណល់ពីសម្បកសន្ទះខ្យងនោះទេ ដោយលោកបានកែច្នៃកាក់សំណល់ជាច្រើនទៀត ដែលគេយកមកបោះចោល មកធ្វើជារបស់ដែលមានតម្លៃសម្រាប់សាធារណជនទូទៅបានទស្សនា។
បន្ថែមពីនេះ រាល់ស្នាដៃរបស់លោកជាច្រើន ក៏ត្រូវបានមហាជនអោយតម្លៃ និងទទួលស្គាល់ជាបន្តបន្ទាប់លើសពីការរំពឹងទុកផងដែរ។ ហើយការកែច្នៃពីកាក់សំណល់ផ្សេងៗនៅសង្គមខ្មែរនាពេលបច្ចុប្បន្ន ក៏កំពុងតែមានការកើនឡើង ដោយនេះជាសញ្ញាវិជ្ជមានមួយដែលអាចជួយអោយបងប្អូនដែលជាកែច្នៃនោះ មានការងារធ្វើ ទទួលបានកម្រៃសម្រាប់ដោះស្រាយជីវភាព ជួយដល់សង្គម ជាពិសេសបញ្ចេញស្នាដៃដែលខ្លួនមានអោយគេឯងបានឃើញ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក រៀម មុនីស៊ីឡុង ដែលជាអ្នកច្នៃម៉ូតម្នាក់ បានជម្រាបជូនថា «លោកបានចាប់ផ្តើមកែច្នៃរបស់របរផ្សេងៗដែលជាកាក់សំណល់នេះ អស់រយៈពេលជាច្រើនឆ្នាំមកហើយ គឺចាប់តាំងពីឆ្នាំ២០០៩មកម្ល៉េះ បើគិតមកដល់បច្ចុប្បន្ននេះ គឺ១៤ឆ្នាំដែលលោកបានប្រកបរបរមួយនេះ»។
លោក មុនីស៊ីឡុង ដែលជាអ្នកច្នៃអាវពីសន្ទះខ្យងកំពុងតែទទួលការចាប់អារម្មណ៍រូបនេះ បានបន្ថែមបន្តថា «ការច្នៃពិតជាលំបាកខ្លាំង ដោយត្រូវផ្ចិតផ្ចង់ដេរដោយសន្សឹមៗ មិនអាចបង្ខំបានឡើយ ដោយសម្បកនៃសន្ទះខ្យងវារឹង ដូច្នេះការធ្វើត្រឹមតែប្រុងប្រយ័ត្នខ្ពស់ទើបធ្វើអោយសម្បកខ្យងដែលដេរទៅមានលក្ខណៈជាជួរ ត្រូវរៀបដាក់អោយបានស្មើ មានលំដាប់លំដោយ ទើបមើលទៅស្អាតល្អ»។
លោកបន្តទៀតថា «ចំពោះមូលហេតុដែលលោកច្នៃសម្បកខ្យងធ្វើជាអាវនេះ ដោយលោកឃើញថា កន្លែងដែលលោករស់នៅ ភូមិកំណើតភូមិព្រែកស្រមោច ឃុំកំពង់ឃ្លាំង ស្រុកសូទ្រនិគម ខេតសៀមរាបនេះ សម្បូរសត្វខ្យង ដូច្នេះលោកក៏ប្រម៉ែប្រមូលមកធ្វើជាអាវដែលលក្ខណៈប្លែកនេះ។ អាវដែលលោកធ្វើពីសន្ទះខ្យងនេះ មានឈ្មោះថា «កូននាគអាស៊ី» ដោយអាវមួយនេះ ធ្វើរួចជាស្រេចដែលមានទម្ងន់៩គីឡូក្រាម ហើយការច្នៃធ្វើឡើងពីការដេរដោយដៃ និងការផ្ចិតផ្ចង់ជាទីបំផុត»។
គួរបញ្ជាក់ផងដែរថា លោក រៀម មុនីស៊ីឡុង ដែលជាអ្នកច្នៃម៉ូតរូបនេះ ក្រៅពីទទួលបានការកោតសរសើរពីមហាជន លោកក៏ទទួលបានពានរង្វាន់មួយចំនួនផងដែរ ដូចជា ៖ ពានរង្វាន់ អាសានបរិស្ថាន និងពានរង្វាន់មេត្រីភាពបរិស្ថាន។
ជាចុងក្រោយ លោកពិតជាអគុណខ្លាំងណាស់ រាល់ការគាំទ្រអោយតម្លៃស្នាដៃរបស់លោក ដោយលោកសូមអោយបងប្អូន ក៏ដូចជាសារធារណជនជួយថវិកាខ្លះៗសម្រាប់យកមកទិញសូឡាដាក់តាមដងផ្លូវ ស្ថិតក្នុងឃុំកំពង់ឃ្លាំង ស្រុកសូទ្រនិគម ខេត្តសៀមរាប ដែលមានចំនួន១០ភូមិ មានប្រវែងចំនួន ១១៣៧១ម៉ែត្រ ក្នុងនោះត្រូវដាក់សូឡា ២០ម៉ែត្រមួយដើមសងខាងផ្លូវ ដោយត្រូវចំណាយសូឡាអស់ ៥៦៨ដើមសម្រាប់ក្នុងឃុំទាំងមូល៕ ដោយ ៖ លីហួ គីមឆាយ
ចែករំលែកព័តមាននេះ