យុវជន៣នាក់ដែលជិះម៉ូតូបង្ហោះកង់មុខ ហើយមិត្តភក្តិថតបង្ហោះនៅលើបណ្ដាញសង្គមនោះ ត្រូវបានសមត្ថកិច្ចឃើញ ហើយកោះហៅមកធ្វើការអប់រំណែនាំ បើនៅបន្តទៀត និងមានចំណាត់ការ
ខេត្តបន្ទាយមានជ័យ ៖ យុវជន៣នាក់ដែលជិះម៉ូតូបង្ហោះកង់មុខ ហើយមិត្តភក្តិថតបង្ហោះនៅលើបណ្ដាញសង្គមនោះ ត្រូវបានសមត្ថកិច្ចឃើញ ហើយកោះហៅមកធ្វើការអប់រំណែនាំ បើនៅបន្តទៀត និងមានចំណាត់ការតាមច្បាប់ នៅថ្ងៃទី៣០ ខែឧសភា ឆ្នាំ២០២៣ ស្ថិតនៅប៉ុស្តិ៍នគរបាលរដ្ឋបាលអូរជ្រៅ។
លោក ប៊ុន ឆៃដែន នាយប៉ុស្តិ៍នគរបាលអូរជ្រៅ បានប្រាប់ឱ្យដឹងថា កាលពីថ្មីៗនេះ ឃើញតាមបណ្តាញសង្គមបានបង្ហោះរូបភាពយុវជន៣នាក់ជិះម៉ូតូបង្ហោះកង់មុខតាមដងផ្លូវនៅពេលថ្ងៃរៀបលិច ដែលធ្វើអោយប៉ះពាល់សណ្តាប់ធ្នាប់សាធារណៈ និងប្រឈមគ្រោះថ្នាក់ចរាចរណ៍កើតឡើងចំពោះអ្នកដំណើរតាមដងផ្លូវគ្រប់ពេលវេលា។
លោកបានបញ្ជាក់ថា ក្រោយឃើញរូបភាពការបង្ហោះម៉ូតូតាមដងផ្លូវសាធារណៈបែបនេះ មហាជនបាននាំគ្នារិះគន់ថា «កូនអាណាគេ កូនលោកណាគេ ជិះម៉ូតូបង្ហោះកង់មុខ។ បើវាដួលងា.ប់តើវាទៅ គ្មានអ្វីកើតឡើងទេ បើវាដួល ឬរ៉េចង្កូតបុកគេ បណ្តាលគ្រោះថ្នាក់ដល់អ្នកដទៃ តើវាយ៉ាងណា? ទទូចសុំអោយអាជ្ញាធរ និងសមត្ថកិច្ចជួយស្រាវជ្រាវរកយុវជនទាំង៣នាក់នេះ មកចាត់ធ្វើការដោះក្អែល និងអប់រំណែនាំ»។
លោកអនុសេនីយ៍ឯក ប៊ុន ឆៃដែន បានបញ្ជាក់ថា ក្រោយមានការរិះគន់ពីមហាជន លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត ហើយកម្លាំងនគរបាលប៉ុស្តិ៍អូរជ្រៅ បានធ្វើការស្រាវជ្រាវ និងកំណត់មុខសញ្ញា ហើយកោះហៅនាំយកមកប៉ុស្តិ៍នគរបាលរដ្ឋបាលអូរជ្រៅ ដើម្បីវាស់កម្ពស់ និងអប់រំណែនាំអោយបញ្ចប់សកម្មភាពការបង្ហោះម៉ូតូធ្វើអោយប៉ះពាល់ដល់សណ្តាប់ធ្នាប់ផ្លូវសាធារណៈ បន្ទាប់មកអោយឪពុកម្តាយមកទទួលយកទៅធ្វើអប់រំបន្តនៅផ្ទះទៀត ហើយបើសិនជានៅឃើញធ្វើសកម្មភាព នឹងមានចំណាត់ការតាមច្បាប់៕
ចែករំលែកព័តមាននេះ