អង់គ្លេស ៖ ក្រប​ខណ្ឌ​បាល់ទាត់​លី​គ​កំពូល​អង់គ្លេស English Premier League បាន​បញ្ចប់​រដូវ​កាល ២០២២-២៣ របស់​ខ្លួន​ជា​ស្ថាពរ កាលពី​ថ្ងៃ​ទី​២៨ ខែឧសភា កន្លង​ទៅ ដោយនៅ​ក្នុង​នោះ ក្រុម Manchester City គឺជា​ម្ចាស់​ជើងឯក ខណៈ​ដែល​ក្រុម Arsenal, Manchester United និង Newcastle United ដែល​ឈរ​នៅ​តំណែង​កំពូល​ទាំង​៤ (Top 4) បាន​កៅអី​លេង​ក្រប​ខណ្ឌ Champions League រដូវ​កាល​ក្រោយ រីឯ Liverpool និង Brighton បាន​កៅអី​លេង Europa League ចំណែក Aston Villa បាន​កៅអី​លេង Europa Conference League​។

អ្វី​ដែល​គួរ​ចាប់អារម្មណ៍​ថែម​ទៀត​នោះ​គឺ ក្រុម Everton បាន​បន្ត​ដង្ហើម​នៅ Premier League សម្រាប់​រដូវ​កាល​ក្រោយ បន្ទាប់​ពី​យកឈ្នះ​លើ​ក្រុម​ភ្ញៀវ Bournemouth លទ្ធផល ១-០ នៅ​ជំនួប​ចុង​ក្រោយ កាលពី​ថ្ងៃ​ទី​២៨ ខែឧសភា កន្លង​ទៅ ហើយ​អ្វី​ដែល​សោកស្តាយ​គឺ ក្រុម Leicester City, Leeds United និង Southampton ត្រូវ​ធ្លាក់​ទៅ​លេង​លី​គ​លំដាប់​ទី​២ Championship នៅ​រដូវ​កាល​ក្រោយ ខណៈ​ក្រុម​ដែល​ត្រូវ​មក​ជំនួស​កន្លែង​របស់​ពួក​គេ​សម្រាប់​រដូវ​កាល​ក្រោយ​រួម​មាន Burnley, Sheffield United និង Luton Town​។

អ្វី​ដែល​កាន់តែ​ពិសេស​ថែម​ទៀត​នោះ ក្រប​ខណ្ឌ English Premier League រដូវ​កាល​នេះ បាន​បំបែក​កំណត់​ត្រា​គ្រាប់​ស៊ុត​បញ្ចូល​ទី​ជា​ប្រវត្តិសាស្ត្រ​របស់​ខ្លួន ក្រោយ​បញ្ចប់​ការ​ប្រកួត​៣៨​ស​ប្តា​ហ៍ ក្រុម​ទាំង​២០ មានការ​ស៊ុត​បញ្ចូល​ទី​គ្នា​រហូត​ដល់ ១០៨៤​គ្រាប់ ដែល​មិន​ធ្លាប់​មាន​ពី​មុន​មក​។

ខ្សែប្រយុទ្ធ Erling Haaland របស់​ក្រុម Man City ឈ្នះ​ពានរង្វាន់​ស្បែក​មាស​រដូវ​កាល​នេះ ក្រោយ​បញ្ចប់​យុទ្ធនាការ​ស៊ុត​បញ្ចូល​បាន ៣៦​គ្រាប់ ខណៈ​អ្នកចាំទី David de Gea របស់​ក្រុម Man United ឈ្នះ​ពានរង្វាន់​ស្រោមដៃ​មាស បន្ទាប់​ពី​រក្សា​សំណាញ់​ទី​មិន​ឱ្យ​គូប្រកួត​ស៊ុត​បញ្ចូល​ទី​បាន ១៧​លើក ចំណែក​ខ្សែបម្រើ Kevin De Bruyne របស់ Man City បញ្ចប់​ទៅ​ក្នុង​នាម​កីឡាករ​បោះ​បាល់​ឱ្យ​មិត្ត​រួម​សម្រេច​ទី​ច្រើន​ជាងគេ (Assists) ១៦​ដង​៕