ខេត្តព្រះសីហនុ ៖ បុរសម្នាក់ជាកូនដៃទូកបានស្លាប់ភ្លាម និងម្នាក់ទៀតក្អួតឈាមតែត្រូវបានគេដឹងសង្គ្រោះទាន់ពេល ក្រោយពួកគេនាំគ្នាផឹកស្រាស ដែលហេតុការណ៍រន្ធត់នេះកើតឡើងកាលពីវេលាម៉ោង៧ព្រឹកថ្ងៃទី២៥ ឧសភា ឆ្នាំ២០២៣ ស្ថិតនៅកោះញ៉ សង្កាត់កោះរ៉ុង…
ខេត្តព្រះសីហនុ ៖ បុរសម្នាក់ជាកូនដៃទូកបានស្លាប់ភ្លាម និងម្នាក់ទៀតក្អួតឈាមតែត្រូវបានគេដឹងសង្គ្រោះទាន់ពេល ក្រោយពួកគេនាំគ្នាផឹកស្រាស ដែលហេតុការណ៍រន្ធត់នេះកើតឡើងកាលពីវេលាម៉ោង៧ព្រឹកថ្ងៃទី២៥ ឧសភា ឆ្នាំ២០២៣ ស្ថិតនៅកោះញ៉ សង្កាត់កោះរ៉ុង ក្រុងកោះរ៉ុង ។
តាមប្រភពសមត្ថកិច្ចបានបញ្ជាក់ថា បុរសដែលស្លាប់ខាងលើ មានឈ្មោះ ឡុង ភេទប្រុស ជនជាតិខ្មែរអ៊ិស្លាម អាយុ៥៣ឆ្នាំ មុខរបរជាកូនដៃទូកមងក្ដាម បច្ចុប្បន្នស្នាក់បណ្ដោះអសន្ននៅលើទូកផែប៉ាទីក្រុម ៣១ ភូមិ3 ទំនប់រលក សង្កាត់១ ក្រុងព្រះសីហនុ ខេត្តព្រះសីហនុ រីឯម្នាក់ទៀតមិនទាន់ស្គាល់អត្តសញ្ញាណនៅឡើយ ។
បច្ចុប្បន្ន សាកសពបានដឹកតាមទូកយកមករក្សាទុកនៅផែដីខ្សាច់ ក្រុម៣៤ ភូមិ៣ សង្កាត់១ ដើម្បីរង់ចាំការពិនិត្យរបស់នគរបាលបច្ចេកទេសវិទ្យាសាស្ត្រ រីឯបុរសម្នាក់ទៀតដែលក្អួតឈាមកំពុងសង្គ្រោះនៅមន្ទីរពេទ្យ សង្ឃឹមថា នឹងរួចផុតពីសេចក្តីស្លាប់ ។ ករណីខាងលើនេះ គេសង្ស័យថា អាចបណ្តាលមកពីពុលស្រាសដែលពួកគេបានផឹក ។
សូមរំលឹកដែរ ករណីពុលស្រាបណ្តាលឲ្យស្លាប់ និងដេកពេទ្យ បានកើតឡើងជារឿយដដែលៗ ។ បញ្ហាដដែលៗនេះ ព្រោះតែប្រជាពលរដ្ឋខ្មែរយើងចូលចិត្តពិសាស្រាដែលមានតម្លៃថោក ហើយមិនដឹងប្រភពផលិតច្បាស់លាស់ ប្រៀបដូចពួកគាត់កំពុងផឹកថ្នាំពុលចូលខ្លួនដូច្នោះដែរ។
នៅពេលកើតមានករណីពុលស្រាម្តងៗ ក្រសួងសុខាភិបាលក៏បានសហការជាមួយក្រសួងពាក់ព័ន្ធ និងមន្ត្រី ជំនាញ ស្វែងរកប្រភពមូលហេតុ ព្រមទាំងអប់រំ ផ្សព្វផ្សាយដល់ប្រជាពលរដ្ឋ ព្រមទាំងហាមឃាត់ការផលិត និងលក់ស្រា ដែលមិនមានប្រភពច្បាស់លាស់ទាំងនោះ ។
ចែករំលែកព័តមាននេះ