ការប្រយុទ្ធប្រទាញប្រទង់ក្នុងប្រទេសលីប៊ីនាពេលសព្វថ្ងៃជាព្រឹត្តិការណ៍ធ្វើឱ្យពិភពលោកចាប់អារម្មណ៍ខ្លាំង។ ប៉ុន្តែប្រការពិសេសដែលចង់និយាយនៅពេលនេះមិនមែនជារឿងប្រយុទ្ធគ្នាឡើយ តែគឺរឿងរ៉ាវកងអង្គរក្សក្រមុំប្រកបដោយស្វាមីភក្តិរបស់ប្រធានាធិបតីកាដាហ្វ៊ី។ ក្រមុំព្រហ្មចារីដ៏ស្រស់ស្អាត៤០នាក់ក្នុងឯកសណ្ឋានកងទ័ពពណ៌ខៀវ
ការប្រយុទ្ធប្រទាញប្រទង់ក្នុងប្រទេសលីប៊ីនាពេលសព្វថ្ងៃជាព្រឹត្តិការណ៍ធ្វើឱ្យពិភពលោកចាប់អារម្មណ៍ខ្លាំង។ ប៉ុន្តែប្រការពិសេសដែលចង់និយាយនៅពេលនេះមិនមែនជារឿងប្រយុទ្ធគ្នាឡើយ តែគឺរឿងរ៉ាវកងអង្គរក្សក្រមុំប្រកបដោយស្វាមីភក្តិរបស់ប្រធានាធិបតីកាដាហ្វ៊ី។ ក្រមុំព្រហ្មចារីដ៏ស្រស់ស្អាត៤០នាក់ក្នុងឯកសណ្ឋានកងទ័ពពណ៌ខៀវ មានមុខក្បែរខ្លួនកាដាហ្វ៊ីគ្រប់ទីកន្លែង និងសឹងថា គ្រប់ពេលវេលាដើម្បីការពារសុវត្ថិភាពជូនកាដាហ្វ៊ី។ ពួកនាងជាអង្គរក្សពូកែទាំងការប្រើអាវុធ ទាំងក្បាច់គុន និងស្មោះត្រង់ដាច់ខាត។ ព្រោះតែដូច្នេះទើបពួកនាងក្លាយជាចំណុចាប់អារម្មណ៍របស់មនុស្សគ្រប់ ជាតិសាសន៍ដែលស្គាល់ប្រធានាធិបតី។
ក្រមុំមួយចំនួនក្នុងចំណោមអង្គរក្សក្រមុំទាំង៤០នាក់ ខ្លះមានដល់សញ្ញាបត្របណ្ឌិត អនុបណ្ឌិតទៀតផង។ ពួកនាងខ្លះជាជនជាតិលីប៊ីខ្លះជាជនជាតិផ្សេងៗមកពីមជ្ឈិមបូព៌ា និងធ្លាប់ឆ្លងកាត់វិទ្យាស្ថានកងទ័ពស្រីទ្រីប៉ូលីដូចគ្នា។ អង្គរក្សក្រមុំទាំងនេះសុទ្ធតែពាក់សញ្ញារូបកាដាហ្វ៊ីលើទ្រូងដែលគ្រាន់តែឃើញភ្លាមដឹងថា ជាអង្គរក្សរបស់កាដាហ្វ៊ី និងដឹងថា នៅក្រមុំបរិសុទ្ធផងដែរព្រោះបើនាងមិនទាន់លាលែងពីការងារនេះពុំអាចយកប្តីបានឡើយ។ កងអង្គរក្សក្រមុំរបស់កាដាហ្វ៊ីរក្សាចំនួន៤០នាក់រហូតមិនឱ្យលើសមិនឱ្យខ្វះ គ្រាន់តែមានការផ្លាស់ប្តូរចេញ និងចូលថ្មីជំនួសប៉ុណ្ណោះ។ ប្រការដែលកម្រអ្នកណាដឹង គឺប្រពន្ធរបស់កាដាហ្វ៊ីឈ្មោះសាហ្វៀ ហ្វាកាស់ ជាអ្នកក្តោបក្តាប់ និងបង្វឹកអង្គរក្សក្រមុំទាំង៤០នាក់ផ្ទាល់ដើម្បីឱ្យមានសមត្ថភាពពេញខ្លួនសម្រាប់រក្សាសន្តិសុខជូនប្តី។
អង្គរក្សក្រមុំទាំង៤០នាក់ត្រូវបានប្រធានាធិបតីកាដាហ្វ៊ីដាក់ឈ្មោះថា Amazonian Guard ជាស្រីក្រមុំមានសុខភាពល្អ កាយវិការរហ័សរហួន និងមានសម្រស់រង្វង់មុខទម្រង់អាហ្វ្រិកខាងជើង។ មនុស្សមួយចំនួនសង្ស័យកាដាហ្វ៊ីជាអ្នកចូលចិត្តសម្រស់ស្រីក្មេងទើបជ្រើសរើសអង្គរក្សសុទ្ធតែស្អាត និងនៅក្រមុំព្រហ្មចារី ដើម្បីប្រើប្រាស់ជាកម្លាំងការពារសន្តិសុខផងជាអ្នកបម្រើតណ្ហាខ្លួនផង។ ប៉ុន្តែតាមពិត នេះជាការយល់ខុស ដោយស្មានៗតាមសំបកក្រៅ។ គ្មានអ្នកណារកឃើញភស្តុតាងពិតប្រាកដថា កាដាហ្វ៊ីធ្លាប់មានពាក់ព័ន្ធដល់រូបកាយអង្គរក្សក្រមុំរបស់ខ្លួនឡើយ។ បេក្ខនារីដែលត្រូវបានជ្រើសរើសធ្វើអង្គរក្សទាំងនោះដំបូងបំផុតត្រូវតែនៅក្រមុំព្រហ្មចារី ជាលក្ខខណ្ឌទីមួយដែលកាដាហ្វ៊ីពន្យល់ថា ប្រៀបបានយ័ន្តការពារខ្លួន ដើម្បីឱ្យពួកនាងនាំមកនូវសំណាងល្អដល់ម្ចាស់។ នេះជាព័ត៌មានចេញពីប្រភពគូបដិបក្សរបស់កាដាហ្វ៊ីមិនមែនប្រភពពីអ្នកគាំទ្រកាដាហ្វីឡើយ។
ប្រភពនោះបញ្ជាក់ទៀតថា កាដាហ្វ៊ីមិនដែលប៉ះពាល់រូបកាយអង្គរក្សក្រមុំព្រហ្មចារីរបស់ខ្លួនទាល់តែសោះតាំងពីដើមរៀងមក ប្រហែលជាខ្លាចស៊យជួបគ្រោះថ្នាក់។ រីឯប្រព័ន្ធសារព័ត៌មានបស្ចិមប្រទេសវិញរិះគន់កាដាហ្វ៊ីដែលជ្រើសរើសក្រមុំបរិសុទ្ធធ្វើអង្គរក្សខ្លួនថា ប្រហែលជាចង់ធ្វើត្រាប់ស្តេចអាស៊ីបុរាណដែលត្រូវការក្រមុំព្រហ្មចារីដើម្បីបូជាយញ្ញឱ្យខ្លួនមានសេចក្តីសុខ។
បែរទៅមជ្ឈដ្ឋានអារ៉ាប់រិះគន់កាដាហ្វ៊ីថា រូបភាពអង្គរក្សស្រីក្នុងឯកសណ្ឋានទាហានពណ៌ខៀវប្រដាប់កាំភ្លើង រួមទាំងអាវុធផ្សេងៗពេញខ្លួនបែបនេះ គឺដើរបញ្ច្រាសគោលការណ៍សាសនាអ៊ិស្លាម ដែលស្ត្រីត្រូវតែបិទមុខរាល់ពេលចេញផុតពីផ្ទះ។ ប៉ុន្តែចង់អ្នកណាថាម៉េច ថាទៅ ប្រធានាធិបតីលីប៊ីអត់ខ្ចីឈឺក្បាល នៅតែមានមោទនភាពចំពោះកងអង្គរក្សក្រមុំព្រហ្មចារីរបស់ខ្លួន។ គាត់តែងសរសើរត្រង់ៗប្រាប់មនុស្សស្និទ្ធស្នាលពីសមត្ថភាព និងភាពក្លាហានរបស់ពួកនាងគ្រប់ពេលវេលា។
ការជ្រើសរើសអង្គរក្សក្រមុំសម្រាប់ប្រធានាធិបតីលីប៊ីធ្វើឡើងយ៉ាងម៉ត់ចត់ និងប្រយ័ត្នប្រយែងបំផុត។ មុនពេលបានជាប់ឈ្មោះក្នុងក្របខណ្ឌអង្គរក្សកាដាហ្វ៊ី ពួកនាងឆ្លងកាត់វគ្គហ្វឹកហ្វឺនយ៉ាងលំបាក រួមទាំងការហ្វឹកហ្វឺនប្រើអាវុធទំនើបគ្រប់ប្រភេទ ហ្វឹកហ្វឺនរបៀបប្រយុទ្ធការពារខ្លួន ការពារម្ចាស់ ពិសេសទទួលការអប់រំឱ្យមានភក្តីភាពដាច់ខាតជាមួយម្ចាស់។ ពួកនាងគ្រប់គ្នាត្រូវឆ្លងកាត់សាលាកងទ័ព ទទួលបានសញ្ញាបត្រពីសាលាកងទ័ព។ ប៉ុន្តែដោយហេតុពួកនាងភាគច្រើនជានិស្សិតមហាវិទ្យាល័យហេតុនេះរាល់ការហ្វឹកហាត់ រាល់ការរៀនសូត្រថែមគ្រប់យ៉ាងមិនមែនជាការពិបាកពេកសម្រាប់ពួកនាងឡើយ។
ក្រោយពួកក្រមុំៗឆ្លងកាត់ការហ្វឹកហ្វឺនសព្វគ្រប់ហើយ កាដាហ្វ៊ីជ្រើសរើសផ្ទាល់ តើនាងណាខ្លះសមស្របជាងគេសម្រាប់បញ្ចូលក្នុងក្របខណ្ឌកងអង្គរក្សរបស់ខ្លួន។ ថ្វីបើមិនអាចប្រៀបធៀបតារាភាពយន្ត ប៉ុន្តែសម្រស់ពួកនាងក៏ជាលក្ខខណ្ឌសំខាន់មួយនៃការជ្រើសរើសដែរ។ ពួកនាងត្រូវតែជាក្រមុំមានទម្រង់មុខស្អាតបាត រូបរាងសមសួន សុខភាពល្អគួរឱ្យចាប់អារម្មណ៍ និងជាអ្នកជឿជាក់លើការងាររបស់ខ្លួន។
ប្រការដែលកម្រមានអ្នកណាដឹង គឺអ្នកក្តោបក្តាប់ និងបង្វឹកក្រមុំអង្គរក្សទាំង៤០នាក់ដោយផ្ទាល់នោះ គ្មានអ្នកណាក្រៅពីប្រពន្ធរបស់កាដាហ្វ៊ីឈ្មោះសាហ្វៀ ហ្វាកាស់ ឡើយ។ សាហ្វៀ ហ្វាកាស់ ជាប្រពន្ធទីពីររបស់កាដាហ្វ៊ី។ ក្រៅពីកាតព្វកិច្ចប្រពន្ធ ជាម្តាយរបស់កូនៗសាហ្វៀ ហ្វាកាស់ ជាអ្នកការពារដ៏ខ្លាំងពូកែ និងស្មោះត្រង់ចំពោះកាដាហ្វ៊ី។ រឿងរ៉ាវមនោសញ្ចេតនារវាងកាដាហ្វ៊ី និងសាហ្វៀ ហ្វាកាស់ ក៏ជារឿងចម្លែកគ្មានពីរក្នុងលោក ព្រោះស្នេហាពួកគេចាប់ផ្តើមពីការធ្វើឃាត។
ឆ្នាំ១៩៧១ ក្នុងឱកាសបុណ្យខួប១ កញ្ញា បដិវត្តលីប៊ីមានជនចម្លែកពីរនាក់ជួលសាហ្វៀហ្វាកាស់ ដោយតម្លៃយ៉ាងថ្លៃបំផុតឱ្យសម្លាប់កាដាហ្វ៊ីពេលកំពុងត្រួតពល។ ពេលនោះសាហ្វៀ ហ្វាកាស់ ដែលបន្លំខ្លួនជាគិលានុបដ្ឋាយិកាអាចជ្រៀតចូលជិតកាដាហ្វ៊ី ដោយគ្មានអ្នកណាសង្ស័យ។ នាងហូតកាំភ្លើងខ្លីចេញពីខ្លួនតម្រង់កាណុងចំក្បាលកាដាហ្វ៊ី ល្មមពេលកាដាហ្វ៊ីងាកមកឃើញនាង។ ភ្លាមនោះពន្លឺភ្នែកកំណត់វាសនាកើតឡើងដោយមិនអាចពន្យល់បាន សាហ្វៀ ហ្វាកាស់ ភាន់ភាំងភ្លេចភារកិច្ចសម្លាប់កាដាហ្វ៊ីហើយកាដាហ្វ៊ីក៏ភាន់ភាំងភ្លេចខ្លាច ភ្លេចខឹងឃាតកស្រីដែលប្រុងសម្លាប់ខ្លួនទាំងកណ្តាលថ្ងៃ។ កំសួលស្នេហាចាប់ផ្តើមវេញត្របាញ់ចូលគ្នាពេលពន្លឺភ្នែកប៉ះពន្លឺភ្នែក។ មួយរយៈខ្លី បន្ទាប់ពីនោះពួកគេក៏រៀបអាពាហ៍ពិពាហ៍ក្លាយជាប្តីប្រពន្ធដែលស្រឡាញ់គ្នាស្ទើរលេបទៅវិញទៅមក។ បានធ្វើប្រពន្ធកាដាហ្វ៊ី សាហ្វៀ ហ្វាកាស់ បំពេញកាតព្វកិច្ចជាអ្នកការពារប្តីដ៏អស្ចារ្យមួយរូប មិនតែប៉ុណ្ណោះចាប់ផ្តើមបង្វឹកអង្គរក្សស្រីមួយកងសម្រាប់ការពារប្តីឱ្យកាន់តែមានប្រសិទ្ធភាពថែមទៀត ជាហេតុធ្វើឱ្យកងអង្គរក្សក្រមុំស្ថិតស្ថិរតាំងពីពេលនោះរហូតសព្វថ្ងៃ។
ចែករំលែកព័តមាននេះ