កាលពីថ្មីៗនេះ មហាជនជាច្រើននាក់បានចាប់អារម្មណ៍ទៅលើក្មេងស្រីមួយរូប មានឈ្មោះថា «សោ ស្រីម៉ី» ដោយក្មេងស្រីរូបនេះ ទម្លាយអំពីរឿងរ៉ាវជីវិតតស៊ូរបស់ខ្លួនអោយបងប្អូនមហាជនបានជ្រាប មុនពេលប្អូនធ្វើការបកស្រាយបទចម្រៀងមួយបទ ក្រោមចំណងជើងថា
ខេត្តព្រះវិហារ ៖ កាលពីថ្មីៗនេះ មហាជនជាច្រើននាក់បានចាប់អារម្មណ៍ទៅលើក្មេងស្រីមួយរូប មានឈ្មោះថា «សោ ស្រីម៉ី» ដោយក្មេងស្រីរូបនេះ ទម្លាយអំពីរឿងរ៉ាវជីវិតតស៊ូរបស់ខ្លួនអោយបងប្អូនមហាជនបានជ្រាប មុនពេលប្អូនធ្វើការបកស្រាយបទចម្រៀងមួយបទ ក្រោមចំណងជើងថា «គេអោបបង អូនអោបដបស្រា» នៅក្នុងកម្មវិធីចម្រៀងកុមារមួយ។
ប្រាកដណាស់ ដូចពាក្យចាស់ពោលថា «ត្រូវបន្តដំណើរទៅមុខ កុំដេកដួលមួយកន្លែង» ដោយត្រង់ចំណុចនេះ ដូចគ្នាទៅនឹងជីវិតរបស់កុមារី សោ ស្រីម៉ី ដែលបានពុះពារហែលឆ្លងជីវិតដ៏លំបាកតាំងពីក្មេង បើទោះបីជាកើតមកក្រ ក៏កុមារីស្រីម៉ី មិនបោះបង់ចោលស្រម៉ៃក្តីក្លាយជាអ្នកចម្រៀង និងការសិក្សានោះឡើយ។
ក្រោយក្មេងស្រីដ៏កម្សត់រូបនេះ ទម្លាយជីវិតដ៏ជូរចត់របស់ខ្លួនរួចមក ឃើញថា សូម្បីតែគណៈកម្មការ និងទស្សនិជន ក៏មានចិត្តអាណិតក្មេងរូបនេះជាខ្លាំង ហើយម្នាក់បានលើកទឹកចិត្តប្អូន ដោយអោយប្អូនបន្តដំណើរទៅមុខ កុំអស់សង្ឃឹម ត្រូវតែរឹងមាំឡើង។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកស្រី ខោ ស្រីតូច ត្រូវជាម្តាយរបស់កុមារី សោ ស្រីម៉ី បានអោយដឹងថា ជីវភាពគ្រួសាររបស់អ្នកស្រីពិតជាលំបាក ដូចជារូបអ្នកស្រីផ្ទាល់ ត្រូវងើបពីព្រឹកព្រលឹមស្រាងៗទៅដកក្រអៅឈូកយកមកលក់ ដោយបានកម្រៃចាប់ពី១០០០០រៀល ទៅ២០០០០រៀលក្នុងមួយថ្ងៃ។ ហើយចំណែកស្វាមីអ្នកស្រី ធ្វើការជាជាងសំណង់អោយគេ ដោយគ្រាន់បានតក់ៗដើម្បីចម្អែតក្រពះ ចិញ្ចឹមកូន និងដោះស្រាយជីវភាពប្រចាំថ្ងៃ។
បើក្រឡេកមើលស្ថានភាពបច្ចុប្បន្នរបស់កុមារី សោ ស្រីម៉ីវិញ អ្នកស្រីបានជម្រាបអោយដឹងថា ពេលទំនេរពីការសិក្សា ស្រីម៉ី តែងតែទៅមើលគោអោយគេ ទៅដកផ្កាស្មៅ ដោយបានកម្រៃ ៣០០០រៀលទុកគ្រាន់ទៅសាលារៀន។ អ្នកស្រី ខោ ស្រីតូច បានជម្រាបបន្តទាំងក្តីក្តុកក្តួលថា អ្នកស្រីពិតជាអាណិតកូនស្រីខ្លាំងណាស់ ដោយអ្នកស្រីពុំមានលទ្ធភាពគ្រប់គ្រាន់សម្រាប់ទំនុកបម្រុងផ្ចុងផ្តើម (ទំនុកបម្រុង) កូនស្រីដូច្នេះ។
អ្នកស្រីបន្ថែមថា ដូចជាការមកប្រឡងនេះទៀតសោត គឺបានអ្នកជិតខាងអោយលុយធ្វើសោហ៊ុយមកខ្លះ លុយកូនអ្នកស្រីសន្សំទុកមិនហ៊ានចាយខ្លះ ដោយហេតុតែចង់សម្រេចក្តីស្រម៉ៃកូន អ្នកក៏សុខចិត្តជូនមកទាំងខ្វះខាតដូច្នេះ។
គួររម្លឹកផងដែរថា កុមារី ស្រីម៉ី ដែលមានប្រវត្តិជីវិតដ៏កម្សត់រូបនេះ គឺជាក្មេងស្រីដែលឧស្សាហ៍ ព្យាយាម ចូលចិត្តជួយឪពុកម្តាយ ជួយដល់គ្រួសារ បើទោះបីខ្លួនទើបតែមានវ័យ១០ឆ្នាំក៏ដោយ។ ក្រៅពីការជួយដល់ឪពុកម្តាយ ពេលទំនេរប្អូនចូលចិត្តអានសៀវភៅ ហើយប្អូនក៏ចង់រៀនបានខ្ពង់ខ្ពស់ដែរ បើទោះបីជាជីវភាពប្អូនមានលំបាកក៏ដោយ។
ជាចុងក្រោយ អ្នកស្រី ខោ ស្រីតូច ដែលជាម្តាយរបស់កុមារី សោ ស្រីម៉ី សូមអគុណចំពោះបងប្អូនមហាជនដែលតែងតែលើកទឹកចិត្ត និងជួយអ្នកស្រី ក៏ដូចជាកូនស្រី ហើយដោយសារជីវភាពអ្នកស្រីមានការខ្វះខាត ប្រសិនបើបងប្អូនចង់ជួយដល់កូនអ្នកស្រីអាចជួយបាន៕ ដោយ ៖ លីហួរ គីមឆាយ
ចែករំលែកព័តមាននេះ