រហូតមកទល់នឹងនាពេលនេះ រលកកំដៅរឿងរ៉ាវរបស់អ្នកនាង ចាន់ សុផានី និងតារាចម្រៀងលោក ហ្សូណូ នៅមិនទាន់ស្ងប់នៅឡើយទេ ក្នុងពេលដែលម្នាក់ៗហាក់យកត្រូវរៀងៗខ្លួន ពាក់ព័ន្ធទៅនឹងរឿងរ៉ាវពីអតីតកាល និងការជួយ
រាជធានីភ្នំពេញ ៖ រហូតមកទល់នឹងនាពេលនេះ រលកកំដៅរឿងរ៉ាវរបស់អ្នកនាង ចាន់ សុផានី និងតារាចម្រៀងលោក ហ្សូណូ នៅមិនទាន់ស្ងប់នៅឡើយទេ ក្នុងពេលដែលម្នាក់ៗហាក់យកត្រូវរៀងៗខ្លួន ពាក់ព័ន្ធទៅនឹងរឿងរ៉ាវពីអតីតកាល និងការជួយទំនុកបម្រុងកូនស្រីតែមួយដែលជាតំណក់ឈា.មរួមគ្នា។
ក្រោយផ្ទុះការវែកញែកជាបន្តបន្ទាប់ជុំវិញបញ្ហាខាងលើនេះ ប្រធានសមាគមសិល្បករខ្មែរ គឺអ្នកនាង ចន ច័ន្ទលក្ខិណា ក៏សម្រេចចេញមុខបញ្ចេញមតិជាលើកដំបូង ដោយនៅក្នុងនោះអ្នកនាងស្នើឱ្យបញ្ចប់យកកូនធ្វើជាប្រធានបទនៅក្នុងរឿងនេះទៀត ត្បិតអ្នកនាងគិតថា វាអាចនឹងធ្វើឱ្យកូនបាក់ទឹកចិត្តខ្លាំង។
ការលើកឡើងពីអ្នកនាង ចន ច័ន្ទលក្ខិណា នាពេលនេះ ធ្វើឡើង បន្ទាប់ពីឃើញសារព័ត៌មាននៅក្នុងស្រុកមួយ បានធ្វើការសម្ភាសន៍ដោយផ្ទាល់ជាថ្មីម្តងទៀតជាមួយនឹងអ្នកនាង ចាន់ សុផានី និងកូនស្រី ជុំវិញរឿងរ៉ាវជាមួយតារាចម្រៀងលោក ហ្សូណូ។
អ្នកនាង ចន ច័ន្ទលក្ខិណា បានលើកឡើងតាមរយៈសំណេរបង្ហោះនៅហ្វេសប៊ុករបស់ខ្លួនថា «អត់ចង់បញ្ចេញយោបល់ទេ តែសូមសំណូមពរ សូមឈប់យកកូនមកធ្វើផ្ទាំងស៊ីបទៀតទៅ អត់អាណិតកូនទេ ម្ខាងម្តាយ ម្ខាងឪពុក យកគ្នាមកសម្ភាសន៍បកស្រាយបំភ្លឺគិតថា ល្អមែន? ដើម្បីភាពស្អាតស្អំខ្លួនឯង អត់គិតពីការឈឺចាប់របស់កូន តើគ្នាពិបាកប៉ុណ្ណា? មើលមុខគ្នាពេលសម្ភាសន៍ទៅ តើគ្នាហ៊ានមើលចំទេ? ពេលគ្នានិយាយ គ្នាទម្លាក់មុខចុះ ទង្វើនេះសូមយល់ផង»។
អ្នកនាងបញ្ជាក់ថា «ម្តាយនៅជាមួយកូនរាល់ថ្ងៃ ទោះមិនបញ្ជាកូនអោយនិយាយ ឬធ្វើអ្វីចំពោះឪពុក ក៏ពាក្យសំដី និងទង្វើមិនសប្បាយចិត្តរបស់ខ្លួន ចំពោះអតីតប្តី និងត្រូវជាឪពុករបស់កូនខ្លួន គឺគ្នាលឺ និងឃើញរាល់ថ្ងៃ ហើយកុំឆ្ងល់ថា ហេតុអ្វីកូនមានជំងឺបាក់ទឹកចិត្ត? អ្នកណាជាអ្នកបង្កើតជំងឺនេះអោយកូន គឺដឹងហើយ»។
ជាងនេះទៅទៀត អ្នកនាង ចន ច័ន្ទលក្ខិណា ក៏បានបញ្ជាក់បន្ថែមតាមរយៈខំមិនពីក្រោមអ្វីដែលអ្នកនាងបានបង្ហោះនោះថា «ខ្ញុំលែងលះដែរ តែខ្ញុំមិនបញ្ចេះកូនអោយសុំលុយពីឪពុកក្នុងករណីអ្វីទេ បើខ្ញុំទ័ល គឺខ្ញុំនិយាយជាមួយឪពុកគាត់ដោយផ្ទាល់ មិនយកកូនជាអ្នកចម្លងបំណងខ្លួនទេ បើបែបនេះ គឺគ្នានឹងមានសម្ពាធ ហើយទើសទាល់ ខ្ញុំខ្លាចបំផុតគឺប៉ះអារម្មណ៍កូន»។
ជាការកត់សម្គាល់ នៅក្នុងបទសម្ភាសន៍ជាមួយបណ្តាញសារព័ត៌មាននៅក្នុងស្រុកមួយ កូនស្រីរបស់អ្នកនាង ចាន់ សុផានី និងលោក ហ្សូណូ បានលើកឡើងថា «ខ្លួនបានបែកពីឪពុកតាំងពីអាយុ៤ទៅ៥ឆ្នាំមកម្ល៉េះ ហើយកន្លងមក ខ្លួនមិនមានទំនាក់ទំនង និងជួបមុខដោយផ្ទាល់ជាមួយលោក ហ្សូណូ ឡើយ ពោលគឺបានដឹងពីម្តាយដែលជាអ្នកនិយាយប្រាប់ ទើបតែអំឡុងឆ្នាំ២០២០ បានខ្លួនមានទំនាក់ទំនងខ្លះៗជាមួយនឹងលោក ហ្សូណូ ដែលជាឪពុក»។
ដោយឡែកសម្រាប់អ្នកនាង ចាន់ សុផានី វិញ ក៏នៅតែប្រកាន់ជំហររបស់ខ្លួនថា អ្វីដែលនាងសុំពីលោក ហ្សូណូ នាពេលនេះ គឺមិនមែនសម្រាប់ខ្លួនអ្នកនាងឡើយ ពោលគឺសម្រាប់កូនបន្តការសិក្សាតែប៉ុណ្ណោះ ព្រោះនាងពិតជាអស់លទ្ធភាពហើយ ហើយអ្នកនាងមិនចង់ឃើញកូនអស់អនាគតត្រឹមនេះឡើយ។
គួរបញ្ជាក់ថា ៖ ហ្សូណូ ចេញមុខប្រឆាំងតបនឹងអតីតភរិយា ពាក់ព័ន្ធរឿងមិនផ្តល់អាហារកិច្ចចំពោះកូនស្រី ៕
ចែករំលែកព័តមាននេះ