ក្រូចសើច ជាធញ្ញជាតិស្ថិតក្នុងអំបូរក្រូច មានដើមខ្នាតតូច និងមានលក្ខណៈជាគុម្ព ដោយនៅតាមដើម និងមែកមានបន្លា។ ស្លឹករបស់វាមានពណ៌បៃតងខ្ចី រហូតដល់ពណ៌បៃតងចាស់ មានក្លិនក្រអូបឈួល ព្រោះមានក្រពេញប្រេង រីឯផ្លែមានពណ៌បៃតងចាស់ ស្រដៀងនឹងក្រូចឆ្មារ រាងមូល ប៉ុន្តែមានផ្ទៃរដិបរដុប រសជាតិជូរ និងមានក្លិនក្រអូបចាត់ទុកថាជាធញ្ញជាតិឱសថបុរាណមួយប្រភេទ មានដើមកំណើតស្ថិតនៅទ្វីបអាស៊ីខាងកើតឆៀងខាងត្បូង។
ជារឿយៗរមែងមានមនុស្សយកស្លឹក និងសំបកក្រូចសើចទៅផ្សំជាអាហារផ្សេងៗច្រើនប្រភេទដូចជា តុំយ៉ាំ និងប្រហិតជាដើម។ ស្លឹកក្រូចសើចសម្បូរដោយសារធាតុបេតាឃែរ៉ូទីន ដូច្នេះនៅពេលដែលគេទទួលទានចូលទើបជួយប្រឆាំងនឹងជំងឺមហារីកបាន ហើយប្រយោជន៍របស់វាអាចមានគុណសម្បត្តិច្រើនទៀតដូចជាយកផ្លែក្រូចសើចទៅបកសំបកដុតនឹងភ្លើង រួចច្របាច់ជាទឹកអាចយកទៅកក់សក់ជួយរក្សាសរសៃសក់ឱ្យមានប្រសិទ្ធភាព។
ក្រៅពីនេះអាចយកក្រូចសើចដែលដុតរួចពុះជា២កំណាត់ យកទៅលាបនៅលើស្បែកលលាដ៏ក្បាលឱ្យបានជោកសក់ នឹងជួយការពារសក់ជ្រុះ ធ្វើឱ្យសរសៃសក់ខ្មៅរលើបរលោង។ លើសពីនេះលោកអ្នកអាចយកទៅប្រើប្រាស់សម្រាប់បណ្តេញសត្វល្អិតបានមួយចំនួនទៀតផង៕
ចែករំលែកព័តមាននេះ