ខេត្តស្ទឹងត្រែង ៖ យោងតាមទិន្នន័យរយៈពេល៣ម្តងដែលទិន្នន័យកន្លងមកចេញនូវឆ្នាំ២០២០ គឺផ្សោតធំផ្សោតពេញវ័យនៅទន្លេមេគង្គរវាងខេត្តក្រចេះនិងខេត្តស្ទឹងត្រែងមានចំនួន៨៩ក្បាល ក្នុងនោះដែរខេត្តក្រចេះមានប្រមាណជា៧០ភាគរយនៃចំនួនសត្វផ្សោតសរុបបានន័យថា នៅក្នុងទន្លេមេគង្គខេត្ត ក្រចេះ មានចន្លោះពី៥៥ទៅ៦០ក្បាល ។
មន្ត្រីជាន់ខ្ពស់នៃខណ្ឌរដ្ឋបាលជលផលខេត្តក្រចេះលោក ម៉ុក ពន្លក បានលើកឡើងថា សម្រាប់រយៈពេល៣ឆ្នាំចុងក្រោយនេះ គឺឆ្នាំ២០២០ ២០២១ ចុងឆ្នាំ២០២២ ក្រុមការងារយើងបានចុះអង្កេតប្រមូលទិន្នន័យកូនផ្សោតថ្មីដែលទើបនិងកើតរយៈពេល៣ឆ្នាំចុងក្រោយហ្នឹងបានចំនួន១៧ក្បាលដែលបានកត់ត្រាក្នុងបញ្ជី ប៉ុន្តែគួរអោយសោកស្តាយទាំងផ្សោតចាស់ ផ្សោតជំទង់ និងកូនផ្សោតដែលបានស្លា.ប់បាត់បង់ជីវិតទៅវិញអស់ចំនួន២៩ក្បាលទាំងខេត្តក្រចេះ និងខេត្តស្ទឹងត្រែង ត្រឹមរយៈពេល៣ឆ្នាំចុងក្រោយនេះដែរ ។
លោកបន្តថា គិតត្រឹមខែមករា ឆ្នាំ២០២៣ រហូតមកដល់ពាក់កណ្តាលខែមេសា ឆ្នាំ២០២៣ គឺនៅអន្លុងកាំពី ឃុំសំបុក ស្រុកចិត្របុរី ខេត្តក្រចេះ គឺយើង កត់ត្រាកូនផ្សោតកើតថ្មីចំនួន២ក្បាល ប៉ុន្តែជាអកុសលនៅថ្ងៃទី១៩ ខែមេសាឆ្នាំ២០២៣ កន្លងទៅថ្មីៗនេះ គឺកូនផ្សោតដែលទើប និងកើតនៅថ្ងៃទី១៥ មេសា ត្រូវបាត់បង់ទៅវិញដោយសារជាប់ម៉ងអ្នកនេសាទ ។
បច្ចុប្បន្នសត្វផ្សោតទន្លេមេគង្គរងការគំរា.មកំហែ.ងដោយឧបករណ៍នេសាទបង សន្ទូចរនង និងឧបករណ៍ឆក់ ដូច្នេះទើបរាជរដ្ឋាភិបាលបានចេញអនុក្រឹត្យលេខ៤៧នក្រ.បក ចុះថ្ងៃទី២៧ ខែកុម្ភៈ ឆ្នាំ២០២៣ ស្តីពីការកំណត់តំបន់គ្រប់គ្រងសត្វផ្សោតទន្លេមេគង្គដែលមានប្រវែង១២០គីឡូម៉ែត្រ ចាប់ពីប៉ែកខាងក្រោមស្ថានមិត្តភាពកម្ពុជា- ចិន ស្ទឹងត្រែង ខេត្តស្ទឹងត្រែង រហូតដល់ក្បាលកោះទ្រង់ ខេត្តក្រចេះ ដោយហាមឃាត់ការធ្វើនេសាទដែលប្រើឧបករណ៍មង សន្ទូចរនង និងឧបករណ៍នេសាទខុសច្បាប់ផ្សេងទៀត។
ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ សហការជាមួយរដ្ឋបាលខេត្តក្រចេះ ស្ទឹងត្រែង និងអង្គការដៃគូពាក់ព័ន្ធបាន និងកំពុងបន្តពង្រឹងការការពារជាប្រចាំនៅតំបន់ដែលសត្វផ្សោតរស់នៅព្រមទាំងបានបន្តអប់រំ ផ្សព្វផ្សាយដល់ប្រជាពលរដ្ឋក្នុងមូលដ្ឋានអំពីកម្លៃជាសកលដែលមិនអាចកាត់ថ្លៃបាននៃសត្វផ្សោតទន្លេគង្គនេះ ។
ជាលទ្ធផលការប្រើមង សន្ទូចរនង និងឧបករណ៍ឆក់មានការថយចុះប្រមាណពី៥០ទៅ៦០% ។ ទោះយ៉ាងនេះក្តីការឆ្លៀតឱកាសប្រើបងសន្ទូចរនង និងការលួចប្រើឧបករណ៍ឆក់បានកើតមានក្នុងកន្លែងមួយចំនួនដែលជាហេតុនាំឱ្យសត្វផ្សោតស្លា.ប់ ។
រដ្ឋបាលជលផលបានអំពាវនាវដោយទទូចដល់បងប្អូនប្រជានេសាទត្រូវឈប់ប្រើប្រាស់បងសន្ទូចរនង និងឧបករណ៍នេសាទខុសច្បាប់ផ្សេងទៀតក្នុងតំបន់សត្វផ្សោតរស់នៅជាបន្ទាន់ ដើម្បីធានានិរន្តរភាពសព្ទផ្សោតសម្រាប់ការទាក់ទាញភ្ញៀវទេសចរបង្កើនប្រាក់ចំណូល និងសម្រាប់កូនចៅជំនាន់ក្រោយៗបានស្គាល់ និងថែរក្សាបន្ត ។
លោក ម៉ុក ពន្លក នាយខណ្ឌជលផលខេត្តក្រចេះបានបញ្ជាក់ថា បច្ចុប្បន្នគឺមានក្រុមឆ្មាំទន្លេចំនួន១១ប៉ុស្តិ៍៤៤នាក់ដោយបានគាំទ្រពីរដ្ឋបាលជលផលនៃក្រសួងកសិកម្មរុក្ខាប្រមាញ់ និងនេសាទហើយ និងអង្គការ wwf បានឧបត្ថម ថវិកា ប្រេង គឺឆ្មាំទន្លេអភិរក្សសត្វផ្សោតក្នុង១ខែបានចំនួនចន្លោះពី៧ថ្ងៃទៅ១០ថ្ងៃ ជាលទ្ធផលការប្រើបងសន្ទូចរនង និងឧបករណ៍ឆក់មានការថយចុះប្រមាណពី៥០ទៅ៦០ភាគរយ ករណីឆក់ត្រូវបានលុបបំបាត់ទាំងស្រុង៕
ចែករំលែកព័តមាននេះ