សេដ្ឋកិច្ចចិនស្ទុះងើបឡើងវិញហួសការរំពឹងទុក ខណៈអ្នកជំនាញនៅតែបង្ហាញក្តីបារម្ភ
ចិន ៖ សេដ្ឋកិច្ចរបស់ប្រទេសចិនបានកើនឡើងលឿនជាងការរំពឹងទុកក្នុងរយៈពេល៣ខែដំបូងនៃ
ចិន ៖ សេដ្ឋកិច្ចរបស់ប្រទេសចិនបានកើនឡើងលឿនជាងការរំពឹងទុកក្នុងរយៈពេល៣ខែដំបូងនៃឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយផលិតផលក្នុងស្រុកសរុប (GDP) បានកើនឡើង ៤.៥% ពោលគឺនៅក្រោយពេលការងើបចេញពីការរឹតបន្តឹងបង្ការជំងឺកូវីដ-១៩ ដ៏តឹងតែងបំផុតរបស់ខ្លួន។
វិធានការសំខាន់នៃសកម្មភាពសេដ្ឋកិច្ច ត្រូវបានជំរុញដោយការកើនឡើងនៃការចំណាយរបស់ប្រជាជន និងការកើនឡើងនៃសកម្មភាពរោងចក្រ ដ្បិតទីក្រុងប៉េកាំងបានសន្យាថានឹងជំរុញសេដ្ឋកិច្ចរបស់ខ្លួន នៅពេលដែលខ្លួនបានដកវិធានការរឹតបន្តឹងជំងឺកូវីដ-១៩ នៅក្នុងខែធ្នូ កាលពីឆ្នាំមុន។
កាលពីថ្ងៃទី១៨ មេសា កន្លងទៅ ទិន្នន័យដាច់ដោយឡែកសម្រាប់ខែមីនាបានបង្ហាញថា ការលក់រាយដែលជាសូចនាករសំខាន់នៃការប្រើប្រាស់សម្រាប់ប្រជាជនបានកើនឡើង ១០.៦% បើប្រៀបធៀបទៅនឹងឆ្នាំមុន។ ក្នុងពេលជាមួយគ្នានេះ ទិន្នផលពីរោងចក្រនៅទូទាំងប្រទេសបានកើនឡើង ៣.៩%។
ទន្ទឹមនឹងនេះ ក៏មានភស្តុតាងនៃការស្ទុះងើបឡើងវិញដ៏រឹងមាំសម្រាប់ឧស្សាហកម្មអាកាសចរណ៍ផងដែរ។ ទិន្នន័យរដ្ឋបាលអាកាសចរណ៍ស៊ីវិលរបស់ប្រទេសចិន បានបង្ហាញថា ការធ្វើដំណើរតាមអាកាសជាង៤៥លាននាក់ ត្រូវបានធ្វើឡើងកាលពីខែមុន ដែលជាការកើនឡើងស្ទើរតែ៣ដង បើធៀបនឹងពេលដូចគ្នាកាលពីឆ្នាំមុន ខណៈដែលចិនបានបន្តដំណើរការពាក្យសុំទិដ្ឋាការឡើងវិញក្នុងខែមីនា បន្ទាប់ពីបានប្រកាសអំពីការបន្ធូរបន្ថយការរឹតបន្តឹងដ៏សំខាន់របស់ខ្លួន។
វិនិយោគិនបានរង់ចាំយ៉ាងអន្ទះសារសម្រាប់តួលេខផ្លូវការ ដើម្បីទទួលបានតម្រុយអំពីភាពរឹងមាំនៃការងើបឡើងវិញរបស់ចិន បន្ទាប់ពីរដ្ឋាភិបាលបានដកវិធានការប្រឆាំងជំងឺកូវីដ-១៩។ ជាមួយគ្នានោះ ទីក្រុងប៉េកាំងក៏បានបន្ធូរបន្ថយការបង្ក្រាបរយៈពេល៣ឆ្នាំលើក្រុមហ៊ុនបច្ចេកវិទ្យាធំៗ និងអ្នកអភិវឌ្ឍន៍អចលនទ្រព្យផងដែរ។
ទោះជាយ៉ាងណាក៏ដោយ អ្នកវិភាគមួយរូបបានប្រាប់សារព័ត៌មាន BBC ថា ខណៈពេលដែលតួលេខចុងក្រោយនេះបានបង្ហាញអំពីភាពរឹងមាំ និងល្បឿននៃកំណើននេះ វាទំនងជាមិនបន្តទៅមុខទៀតនោះទេ។
លោកស្រី Dan Wang ប្រធានសេដ្ឋវិទូនៅធនាគារ Hang Seng របស់ចិន បាននិយាយថា «អ្វីដែលទំនងជានឹងកើតឡើងនៅក្នុងប៉ុន្មានខែខាងមុខនេះ គឺថាប្រជាជនអាចនឹងកើនឡើងខ្ពស់ដំបូង បន្ទាប់ពីការបើកដំណើរការប្រទេសឡើងវិញ»។ លោកស្រីបានបន្ថែមថា «តម្រូវការផលិតកម្មអាចនឹងធ្លាក់ចុះ ដែលមិនអាចរក្សានិរន្តរភាពនៃការនាំចេញ ដោយសារតែសេដ្ឋកិច្ចពិភពលោកកំពុងធ្លាក់ចុះជាជាងការបង្កើនល្បឿន»។
គួររំលឹកជូនថា កាលពីឆ្នាំមុន កំណើន GDP របស់ចិនបានធ្លាក់ចុះដល់កម្រិតទាបបំផុតមួយក្នុងរយៈពេលជិតកន្លះសតវត្ស ដោយសារតែវិធានការរឹតបន្តឹងរបស់ខ្លួន៕ (ដកស្រង់ចេញពី BBC)
ចែករំលែកព័តមាននេះ