គ្រោះថ្នាក់ចរាចរណ៍មួយបានកើតឡើងរវាងម៉ូតូជាមួយនឹងរថយន្ត បណ្តាលឲ្យស្ត្រីម្នាក់មានផ្ទៃពោះ៧ខែស្លា.ប់បាត់បង់ជីវិតនៅនឹងកន្លែងកើតហេតុ និង២នាក់ទៀត
ខេត្តឧត្តរមានជ័យ ៖ គ្រោះថ្នាក់ចរាចរណ៍មួយបានកើតឡើងរវាងម៉ូតូជាមួយនឹងរថយន្ត បណ្តាលឲ្យស្ត្រីម្នាក់មានផ្ទៃពោះ៧ខែស្លា.ប់បាត់បង់ជីវិតនៅនឹងកន្លែងកើតហេតុ និង២នាក់ទៀតរងរបួសធ្ងន់ បង្កឱ្យមានការភ្ញាក់ផ្អើលកាលពីវេលាម៉ោង៥និង២០នាទីល្ងាច ថ្ងៃទី១៤ ខែមេសា ឆ្នាំ២០២៣ នៅលើកំណត់ផ្លូវ៦៧B ចន្លោះបង្គោលគីឡូលេខ២០-២១ ស្ថិតក្នុងភូមិឈូកមាស សង្កាត់កូនក្រៀល ក្រុងសំរោង ខេត្តឧត្តរមានជ័យ។
អ្នកបើកបររថយន្តខាងលើមានឈ្មោះ ឃុត សារិទ្ធ ភេទប្រុស អាយុ៣៤ឆ្នាំ មុខរបរជួសជុលបង្គោលសេវាទូរស័ព្ទ រស់នៅភូមិពន្លិច ឃុំពាមមានជ័យ ស្រុកពាមមានជ័យ ខេត្តព្រៃវែង បានបើកបររថយន្តម៉ាកឡិចស៊ីស៣៣០ ពណ៌ស្ករ ពាក់ស្លាកលេខ ភ្នំពេញ ២U-៤៤0៤ ក្នុងទិសដៅពីលិចទៅកើត។
ចំណែកអ្នកបើកបរម៉ូតូមានឈ្មោះ គង់ វុន ភេទប្រុស អាយុ២៩ឆ្នាំ មុខរបរយោធាអង្គភាពផ្នែកសឹករងអន្លង់វែង (រងរបួសធ្ងន់) រស់នៅភូមិសាមគ្គី ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ បើកបរម៉ូតូម៉ាកវេវ ពណ៌ខ្មៅ ស៊េរីឆ្នាំ២០២២ គ្មានស្លាកលេខ ក្នុងទិសដៅពីលិចទៅកើត ដោយឌុបប្រពន្ធឈ្មោះ ភា វឿន អាយុ២១ឆ្នាំ (មានផ្ទៃពោះ៧ខែ) បណ្តាលឱ្យរងរបួសធ្ងន់ត្រង់ក្បាល និងស្លា.ប់នៅនឹងកន្លែងកើតហេតុ។ ចំណែកឈ្មោះ គង់ ករុណា ភេទប្រុស អាយុ៣ឆ្នាំ (ជាកូន) បណ្ដាលឱ្យរងរបួសធ្ងន់ត្រង់ក្បាល ត្រូវបានបញ្ជូនទៅធ្វើការសង្គ្រោះនៅក្នុងមន្ទីរពេទ្យបង្អែក ខេត្តឧត្តរមានជ័យ។
បើតាមសាក្សីនៅកន្លែងកើតហេតុ បានឲ្យដឹងថា មូលហេតុនៃគ្រោះថ្នាក់ចរាចរណ៍ខាងលើនេះ គឺគេបានឃើញបុរសជាប្តីធ្វើដំណើរជិះមូតូឌុបប្រពន្ធនិងកូនតូច ក្នុងទិសដៅពីលិចទៅកើត លុះធ្វើដំណើរមកដល់ចំណុចកើតហេតុ ស្រាប់តែមានបុរសម្នាក់បើករថយន្តក្នុងល្បឿនយ៉ាងលឿន ក្នុងទិសដៅស្របគ្នា មកបុកម៉ូតូជនរងគ្រោះពីក្រោយពេញមួយទំហឹង បណ្ដាលឱ្យស្ត្រីជាប្រពន្ធដែលមានផ្ទៃពោះ៧ខែរងរបួសក្បាលធ្ងន់ស្លា.ប់នៅកន្លែងកើតហេតុតែម្តង ចំណែកកូនប្រុសតូចក៏ត្រូវរងរបួសក្បាលធ្ងង់ និងត្រូវបានបញ្ជូនទៅធ្វើការសង្គ្រោះនៅមន្ទីរពេទ្យបង្អែកភ្លាមៗផងដេរ។
ក្រោយពេលកើតហេតុ ម្ចាស់រថយន្តខាងលើបានព្យាយាមបើករត់គេចខ្លួន ប៉ុន្តែក៏ត្រូវកម្លាំងជំនាញតាមឃាត់ខ្លួនបាន និងបញ្ជូនទៅកាន់ស្នងការខេត្តឧត្តរមានជ័យ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ