សេដ្ឋកិច្ចពិភពលោកប្រឈមកំណើនទាបបំផុតមិនធ្លាប់មានចាប់តាំងពីឆ្នាំ១៩៩០
សហរដ្ឋអាមេរិក ៖ ប្រធានមូលនិធិរូបិយវត្ថុអន្តរជាតិ (IMF) បានលើកឡើងថា សេដ្ឋកិច្ចពិភពលោក
សហរដ្ឋអាមេរិក ៖ ប្រធានមូលនិធិរូបិយវត្ថុអន្តរជាតិ (IMF) បានលើកឡើងថា សេដ្ឋកិច្ចពិភពលោកត្រូវបានកំណត់ថានឹងកើនឡើងប្រហែល ៣% ក្នុងរយៈពេល៥ឆ្នាំខាងមុខ ដែលនេះគឺជាល្បឿនយឺតបំផុតមិនធ្លាប់មានចាប់តាំងពីឆ្នាំ១៩៩០។
លោកស្រី Kristalina Georgieva ប្រធាន IMF ដែលមានមូលដ្ឋាននៅក្នុងទីក្រុងវ៉ាស៊ីនតោន សហរដ្ឋអាមេរិកបានមានប្រសាសន៍ថា ផ្លូវខាងមុខគឺរដិបរដុប និងអ័ព្ទខ្លាំង ហើយលោកស្រីថែមទាំងបានព្រមានថា កិច្ចសហប្រតិបត្តិការដើម្បីដោះស្រាយលើបញ្ហានេះ នឹងកាន់តែពិបាកខ្លាំង។
ការលើកឡើងរបស់លោកស្រី កើតឡើងនៅមុនពេលកិច្ចប្រជុំប្រចាំឆ្នាំរបស់ IMF ដោយនៅក្នុងសុន្ទរកថានោះ អ្នកស្រីបានអំពាវនាវឱ្យមានជំនួយបន្ថែមទៀតសម្រាប់ប្រទេសដែលមានចំណូលទាប។ លោកស្រីបាននិយាយថា សម្រាប់សមាជិកខ្សោយបំផុតនៃគ្រួសារពិភពលោករបស់យើង ការគាំទ្របន្ថែមពីប្រទេសអ្នកមានគឺចាំបាច់ណាស់ ដោយអំពាវនាវឱ្យប្រទេសនានាជំរុញមូលនិធិសម្រាប់ IMF ដែលផ្តល់ប្រាក់កម្ចីក្នុងតម្លៃទាបដល់ប្រទេសដែលត្រូវការជំនួយ។
IMF កំពុងប្រឈមមុខនឹងរលកនៃការស្នើសុំជំនួយ ឬការរៀបចំរចនាសម្ព័ន្ធបំណុល ដែលបណ្តាលមកពីវិបត្តិនៃជំងឺកូវីដ-១៩ សង្គ្រាមនៅអ៊ុយក្រែន និងការកើនឡើងតម្លៃនៃការរស់នៅ ដែលបន្តកើនឡើងជាបន្តបន្ទាប់។ កាលពីឆ្នាំមុន កំណើនសេដ្ឋកិច្ចពិភពលោកបានធ្លាក់ចុះស្ទើរតែពាក់កណ្តាលមកត្រឹម ៣.៤% បន្ទាប់ពីការកើនឡើងក្រោយការរាតត្បាតនៃជំងឺកូវីដ-១៩ នៅក្នុងឆ្នាំ២០២១ ដែលនោះគឺទាបជាងកំណើនជាមធ្យម ៣.៨% នៃរយៈពេលពីរទសវត្សចុងក្រោយនេះ ខណៈដែលការធ្លាក់ចុះបានបន្តនៅឆ្នាំនេះ បើទោះជាមានទីផ្សារការងារខ្លាំងក្នុងប្រទេសដូចជាសហរដ្ឋអាមេរិកយ៉ាងណាក៏ដោយ។
IMF រំពឹងថាកំណើននឹងធ្លាក់ចុះក្រោម ៣% នៅឆ្នាំ២០២៣ ដោយប្រទេសឥណ្ឌា និងចិនមានចំនួនច្រើនជាងពាក់កណ្តាលនៃកំណើននេះ ចំណែកឯប្រហែល ៩០% នៃសេដ្ឋកិច្ចជឿនលឿនត្រូវបានគេរំពឹងថា នឹងឃើញការធ្លាក់ចុះនៃកំណើន ដែលឆ្លុះបញ្ចាំងពីទម្ងន់នៃការចំណាយលើការខ្ចីប្រាក់ខ្ពស់ បន្ទាប់ពីធនាគារកណ្តាលបានដំឡើងអត្រាការប្រាក់យ៉ាងខ្លាំង ដើម្បីរក្សាស្ថិរភាពនៃតម្លៃកើនឡើង ហើយសម្រាប់ប្រទេសដែលមានប្រាក់ចំណូលទាប ការចំណាយលើការខ្ចីប្រាក់កាន់តែខ្ពស់កើតឡើងនៅពេលដែលតម្រូវការធ្លាក់ចុះ សម្រាប់ការនាំចេញរបស់ពួកគេ៕ (ដកស្រង់ចេញពី BBC)
ចែករំលែកព័តមាននេះ