ខេត្តក្រចេះ ៖ យុវជនវ័យ១៧ឆ្នាំម្នាក់ ត្រូវបានបាត់ខ្លួនក្នុងករណីលិចទូកនៅកណ្ដាលទន្លេមេគង្គ កើតឡើងកាលពីវេលាម៉ោង៤រសៀលថ្ងៃទី៥ មេសា ឆ្នាំ២០២៣ ស្ថិតនៅឃុំកោះច្រែង ស្រុកចិត្របុរី ខេត្តក្រចេះ…
ខេត្តក្រចេះ ៖ យុវជនវ័យ១៧ឆ្នាំម្នាក់ ត្រូវបានបាត់ខ្លួនក្នុងករណីលិចទូកនៅកណ្ដាលទន្លេមេគង្គ កើតឡើងកាលពីវេលាម៉ោង៤រសៀលថ្ងៃទី៥ មេសា ឆ្នាំ២០២៣ ស្ថិតនៅឃុំកោះច្រែង ស្រុកចិត្របុរី ខេត្តក្រចេះ ហើយរហូតមកទល់រសៀលថ្ងៃទី៦ មេសា នេះ នៅតែរកមិនទាន់ឃើញនៅឡើយ ។
បើតាមរបាយការណ៍នគរបាលបានបញ្ជាក់ឲ្យដឹងថា ស្ថិតនៅថ្ងៃកើតហេតុ ជនរងគ្រោះមានចំនួន៥នាក់បានធ្វើដំណើរតាមទូកមួយគ្រឿង ចេញពីឃុំកោះច្រែង ទៅស្រុកព្រែកប្រសព្វ ដើម្បីទិញដែក ។ លុះត្រឡប់មកវិញ ត្រង់ចំណុចឃុំកោះច្រែង គឺនៅចំកណ្ដាលទន្លេក៏ស្រាប់តែមានខ្យល់បក់បោកខ្លាំង បង្កមានរលកធំៗបណ្តាលឲ្យទូកលិចនៅកណ្តាលទន្លេភ្លាមៗនោះ ក៏បានបាត់ខ្លួនមនុស្សម្នាក់ ។
ប្រភពពីសមត្ថកិច្ចបន្តថា ជនរងគ្រោះទាំង៥នាក់ខាងលើ មានឈ្មោះ១-ឈ្មោះ លន់ ខេមរា ភេទប្រុស អាយុ១៧ ឆ្នាំ រស់នៅភូមិវត្ត រស់នៅក្នុងបន្ទុក (បាត់ខ្លួន) ២-ឈ្មោះ ម៉ក កក្កដា ភេទប្រុស អាយុ១៧ឆ្នាំ រស់នៅភូមិវត្ត មុខរបរសិស្ស (អ្នកបើកទូក) ជួយសង្គ្រោះបាន ។ ៣-ឈ្មោះ មាស បញ្ញា ភេទប្រុស អាយុ១៩ឆ្នាំ រស់នៅភូមិវត្ត មុខរបរសិស្ស (អ្នករួមដំណើរ) បានជួយសង្គ្រោះ។ ៤-ឈ្មោះ អូន សុភក្ក្រ ភេទប្រុស អាយុ១៩ ឆ្នាំ រស់នៅភូមិវត្ត មុខរបរកសិករ (អ្នករួមដំណើរ) បានជួយសង្គ្រោះ និង៥-ឈ្មោះទិត្យ ជីវន្ត័ ភេទប្រុស អាយុ១៦ ឆ្នាំរស់នៅភូមិវត្ត មុខរបរសិស្ស (អ្នករួមដំណើរ) ត្រូវបានជួយសង្គ្រោះបានហើយ អ្នកទាំង៥នាក់រស់ នៅឃុំកោះច្រែង ស្រុកចិត្របុរីខេត្តក្រចេះ ។
តាមរបាយការណ៍បញ្ជាក់ទៀតថា ជនរងគ្រោះឈ្មោះលន់ ខេមរា ភេទប្រុស អាយុ១៧ឆ្នាំ ដែលបានបាត់ខ្លួនមកដល់ថ្ងៃទី០៦ ខែមេសា នេះ គិតត្រឹមវេលាម៉ោង១២និង៣០នាទីថ្ងៃត្រង់ គឺនៅមិនទាន់រកឃើញនៅឡើយទេសមត្ថកិច្ចកំពុងតែរុករកបន្ត ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ