ព្រោះតែអំណាចនៃថ្នាំញៀន មិនខ្លាចគុក មិនខ្លាចស្លា.ប់
រាជធានីភ្នំពេញ ៖ យុវជន៣នាក់ដែលជាអ្នកប្រើប្រាស់គ្រឿងញៀ.ន រហូតអត់លែងបាននោះ
រាជធានីភ្នំពេញ ៖ យុវជន៣នាក់ដែលជាអ្នកប្រើប្រាស់គ្រឿងញៀន រហូតអត់លែងបាននោះ ហើយអត់មានលុយដើម្បីយកទៅទិញគ្រឿងញៀនមកសេព និងគ្មានលុយចាយនោះ បានរួមគំនិតគ្នាបើករថយន្តកូរ៉េកញ្ចាស់១គ្រឿង ចេញធ្វើសកម្មភាពលួចឡើងលើបង្គោលកាត់ខ្សែកាប្លិ៍ភ្លើងអគ្គីសនី ទាំងការប្រថុយប្រថានមិនបានគិតខ្លាចពីគ្រោះថ្នាក់ដល់ជីវិត ឬត្រូវមានទោសទណ្ឌនោះឡើយ។ ប៉ុន្តែសកម្មភាពខាងលើនោះបានសម្រេចហើយសំណាងអាក្រក់បានជួបកម្លាំងនគរបាល ព្រហ្មទណ្ឌខណ្ឌដង្កោ និងនគរបាលប៉ុស្ដិ៍ព្រៃស កំពុងល្បាតពួនស្ទាក់បទល្មើស នៅក្នុងមូលដ្ឋាន ក៏ត្រូវបាននគរបាលឃាត់ខ្លួនបានម្នាក់ភ្លាមៗនាំយកទៅសាកសួរ ហើយព្រឹកឡើងបន្តចាប់បានម្នាក់ទៀត រួចកសាងសំណុំរឿងព្រមទាំងតាមរកចាប់ខ្លួនអ្នកទី៣ដែលកំពុងរត់គេចខ្លួន។
ហេតុការណ៍នោះបានកើតឡើង កាលពីវេលាម៉ោង២ និង៣០នាទីទាបភ្លឺឈានចូលថ្ងៃទី១១ ខែតុលា ឆ្នាំ២០១៧ នៅតាមផ្លូវលំស្ថិតនៅក្នុងភូមិប្រកា សង្កាត់ព្រៃស ខណ្ខដង្កោ រាជធានីភ្នំពេញ។ នគរបាលបានឲ្យដឹងថា ជនសង្ស័យដែលត្រូវចាប់ខ្លួនបាននោះ ម្នាក់ឈ្មោះ ស៊ុយ អៀប អាយុ២៤ឆ្នាំ មុខរបរអ្នកបើកបររថយន្ត មានស្រុកកំណើតនៅក្នុងខេត្តកពង់ស្ពឺ និងម្នាក់ទៀតឈ្មោះ ជិន វទ្ធី អាយុ២២ឆ្នាំ មុខរបរព្រូឡាន មានស្រុកកំណើតនៅក្នុងភូមិពង្រ ឃុំពង្រ ស្រុកបារាយណ៍ ខេត្តកំពង់ធំ។ ជនសង្ស័យទាំង២នាក់នេះស្នាក់នៅផ្ទះជួលជាមួយគ្នានៅក្នុងភូមិព្រៃស្ពឺ សង្កាត់ចោមចៅ ខណ្ខពោធិសែនជ័យ ដោយឡែកបក្ខពួកម្នាក់ទៀតបានរត់គេចខ្លួនបាត់ មិនត្រូវបានស្គាល់ឈ្មោះនោះឡើយ។
ជនសង្ស័យកាត់បានខ្សែកាប្លិ៍ភ្លើងបាន៣ខ្សែ ហើយដែលក្នុង១ខ្សែៗមានប្រវែងជាង១០០ម៉ែត្រ។ប្រភពដដែលបានបន្តទៀតថា នៅមុនពេលកើតហេតុដោយមានការបញ្ជា និងរៀបចំផែនការល្បាតពួនស្ទាក់ទប់ស្កាត់បទល្មើសនៅក្នុងមូលដ្ឋានមិនឲ្យកើតមានពីសំណាក់ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោនោះ កម្លាំងនគរបាលព្រហ្មទណ្ឌខណ្ឌរួមជាមួយកម្លាំងនគរបាលប៉ុស្ដិ៍ព្រៃស បានចុះល្បាតនាវេលាទាបភ្លឺ។ លុះពេលទៅដល់ត្រង់ចំណុចកើតហេតុ ស្រាប់តែប្រទះឃើញរថយន្តកូរ៉េ១គ្រឿង ម៉ាកហ៊ីយ៉ាន់ដាយពណ៌ខៀវ ពាក់ស្លាកលេខ ភ្នំពេញ2O-8260 រួមជាមួយមនុស្ស៣នាក់ ដែលគួរឲ្យមានការសង្ស័យយ៉ាងខ្លាំង ពេលនោះកម្លាំងក៏បានចូលទៅជិត និងធ្វើការចាប់ខ្លួនបានម្នាក់ ចំណែក២នាក់ទៀតបានរត់គេចខ្លួនរួច។ ប្រភពដដែលបានបន្តទៀតថា ពេលនោះនគរបាលបានធ្វើការសួរនាំជនដែលត្រូវចាប់ខ្លួននោះ ទើបដឹងថា ពួកគេកំពុងតែធ្វើសម្មភាពឡើងកាត់ខ្សែកាប្លិ៍ភ្លើងនៅតាមបង្គោលភ្លើងអគ្គីសនី ដើម្បីយកទៅលក់យកលុយចាយ និងទិញថ្នាំញៀនប្រើប្រាស់ ព្រោះគ្មានលុយចាយ និងទិញថ្នាំញៀន។
បន្ទាប់មកកម្លាំងបាននាំជននោះទៅកាន់អធិការដ្ឋាននគរបាលខណ្ឌ រួមទាំងរថយន្ត១គ្រឿងខាងលើ ព្រមទាំងប្រមូលយកខ្សែកាប្លិ៍ភ្លើងដែលជនសង្ស័យកាត់បាន៣ខ្សែ ហើយដែលក្នុង១ខ្សែៗមានប្រវែងជាង១០០ម៉ែត្រទៅជាមួយផងដែរ។ លុះដល់វេលាម៉ោង៨ និង៣០នាទីព្រឹក ថ្ងៃដដែលទើបកម្លាំងធ្វើការស្រាវជ្រាវតាមចាប់ខ្លួនបានម្នាក់ទៀត និងនាំទៅកាន់អធិការដ្ឋានខណ្ឌ ហើយពួកគេនឹងត្រូវប្រឈមមុខចំពោះមុខច្បាប់ ចំណែកបក្ខពួកម្នាក់ដែលកំពុងរត់គេចខ្លួននោះ ក៏ត្រូវបានកម្លាំងកំពុងតាមស្វែងរកចាប់ខ្លួនដែរ៕
ចែករំលែកព័តមាននេះ