អិុន សុភិន ផ្តល់កាដូ2ម៉ឺនដុល្លារ
រាជធានីភ្នំពេញ ៖ លោកអិុន សុភិន បញ្ជាក់ថា
រាជធានីភ្នំពេញ ៖ លោកអិុន សុភិន បញ្ជាក់ថា
រាជធានីភ្នំពេញ ៖ អ្នកនាងភិន សុដាលីស ដែលជាកូនស្រីរបស់ម្ចាស់ផលិតកម្មភាពយន្ត និងជាតារាមានកេរ្តិ៍ឈ្មោះល្បីមួយដួង បើទោះបីជាកន្លងមកជួបប្រទះរឿងបែកបាក់ស្វាមីក្ដី តែនៅតែក្រោកឈរបានរឹងមាំ និងខំប្រឹងចិញ្ចឹមកូនស្រីតូចរបស់ខ្លួន ។ ក្នុងថ្ងៃខួបកំណើតគម្រប់មួយឆ្នាំរបស់«Katerina»កូនស្រីនាងភិន ដាលីស ទទួលបានកាដូជាសាច់ប្រាក់ចំនួន២ម៉ឺនដុល្លារពីលោកអិុន សុភិន ជាជីតាដើម្បីធ្វើជាមូលនិធិសម្រាប់ជួយដល់កុមារកំព្រាដែលឪពុកម្តាយបោះបង់ចោល ។
ការប្រកាសនេះធ្វើឡើងកាលពីរាត្រីថ្ងៃទី៦ តុលា ២០១៧ នៅភូមិគ្រឹះលោកអិុន សុភិន នាសង្កាត់ភ្នំពេញថ្មី ។ លោកអិុន សុភិន បញ្ជាក់ថា«កាដូជូនចៅស្រីគឺទឹកប្រាក់សុទ្ធចំនួន២ម៉ឺនដុល្លារអាមេរិក សម្រាប់ចៅស្រីបង្កើតមូលនិធិជួយដល់កុមារកំព្រា ពិសេសកុមារដែលឪពុកម្តាយបោះបង់ចោល ។ ចៅស្រីខ្ញុំទោះបីជាឪពុកបោះបង់ចោលចាប់តាំងពីនៅក្នុងផ្ទៃ៤ខែក្តី ក៏ពេលនេះនាងទទួលបានភាពកក់ក្តៅនិងការយកចិត្តទុកដាក់ខ្លាំងពីក្រុមគ្រួសារខ្ញុំ ហើយខ្ញុំនឹកដល់កុមារដែលរស់នៅមណ្ឌលកុមារកំព្រាដែលខ្វះភាពកក់ក្តីពីក្រុមគ្រួសារ ។ មូលនិធីដែលបង្កើតសម្រាប់ចៅស្រីនឹងជួយដល់មណ្ឌលកុមារកំព្រាណាដែលខ្វះខាត ហើយខ្ញុំក៏នឹងបែងចែកទៅតាមលទ្ធភាព ។ មូលនិធីនេះនឹងបានរួមចំណែកជួយដល់កិច្ចការងារសង្គម» ។
ភិន សុដាលីស សម្តែងក្តីសប្បាយរីករាយដែលនាងបានរៀបចំកម្មវិធីខួបកូនស្រីគម្រប់មួយឆ្នាំ ។ នាងមិនមានគម្រោងទេ ប៉ុន្តែដោយសារឪពុកជួយរៀបចំទើបធ្វើធំបន្តិចដោយអញ្ជើញភ្ញៀវប្រមាណ៤០០នាក់ក្នុងនោះមានអ្នកសិល្បៈមួយចំនួនផង ។
ភិន សុដាលីស និយាយថា«មួយឆ្នាំពិតជាលឿន ហើយនាងខ្ញុំសប្បាយចិត្តដែលមានកូនស្រីដ៏គួរឱ្យស្រលាញ់ បើទោះបីជាមិនមានវត្តមានឪពុកក្តី ។ សមាជិកក្នុងផ្ទះស្រលាញ់កូនស្រីនាងខ្ញុំទាំងអស ់ហើយពួកគេមានចំណែក គ្រប់ៗគ្នាក្នុងការមើលថែកូនស្រី ហើយនាងខ្ញុំកាន់តែយល់ច្បាស់ពីអារម្មណ៍ឪពុកម្តាយស្រលាញ់កូនយ៉ាងដូចម្តេចបើទោះបីជាពេលវេលានៅមើលថែកូនមិនពេញ២៤ម៉ោងក្តី ។ សម្រាប់នាងខ្ញុំកាដូគឺមានតែរបស់តិចតួចសម្រាប់កូន ពិសេសគឺទឹកចិត្តស្រសាញ់ចំពោះកូនស្រី» ។
រហូតមកដល់ពេលនេះលោកប៉ែន ចំរ៉ុង ជាឪពុកនៅមិនទាន់បានជួបមុខកូនស្រីផ្ទាល់ម្តងនៅឡើយ ។
ស្នេហារបស់ភិន សុដាលីស និងប៉ែន ចំរ៉ុង បញ្ចប់កាលពីដើមឆ្នាំ២០១៦ ក្រោយពេលរួមរស់ជាមួយគ្នាមិនបានមួយឆ្នាំផង ដោយទុកឱ្យភិន សុដាលីស ពពោះកូនក្នុងផ្ទៃ៤ខែ។
ក្រោយលែងលះ និងសម្រាលកូនស្រីរួចមកភិន សុដាលីស ទទួលបានការគាំទ្រលើកទឹកចិត្តពីក្រុមគ្រួសារ ហើយឪពុកនាងប្រកាសចុះបញ្ជីទទួលយកកូនស្រីនាងធ្វើជាកូនស្រីម្នាក់ទៀតដែលមានសិទ្ធិទទួលបានចំណែកនៃទ្រព្យសម្បត្តិរបស់ក្រុមគ្រួសារ ៕
ចែករំលែកព័តមាននេះ