មន្ត្រីនគរបាលអន្តោរប្រវេសន៍ មិនអនុញ្ញាតអោយម៉ូតូឌុប ឬម៉ូតូកង់បីឥណ្ឌា ចូលទៅចាប់ម៉ូយនៅក្បែរច្រកទ្វារអន្តរជាតិប៉ោយប៉ែតទៀតទេ ដែលត្រូវបានចុះរៀបចំសណ្តាប់ធ្នាប់នៅ
ខេត្តបន្ទាយមានជ័យ ៖ មន្ត្រីនគរបាលអន្តោរប្រវេសន៍ មិនអនុញ្ញាតអោយម៉ូតូឌុប ឬម៉ូតូកង់បីឥណ្ឌា ចូលទៅចាប់ម៉ូយនៅក្បែរច្រកទ្វារអន្តរជាតិប៉ោយប៉ែតទៀតទេ ដែលត្រូវបានចុះរៀបចំសណ្តាប់ធ្នាប់នៅថ្ងៃទី២៣ ខែមីនា ឆ្នាំ២០២៣នេះ ក្រុងប៉ោយប៉ែត។
លោកឧត្តមសេនីយ៍ត្រី អ៊ី ចំរើន មេប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បានប្រាប់ថា ចាប់ពីពេលនេះតទៅ ម៉ូតូឌុប និងម៉ូតូកង់បីឥណ្ឌា មិនអនុញ្ញាតអោយចូលចាប់ម៉ូយនៅក្បែរច្រកទ្វារអន្តរជាតិប៉ោយប៉ែតទៀតឡើយ ដែលធ្វើប៉ះពាល់សណ្តាប់ធ្នាប់ដល់ភ្ញៀវជាតិ និងអន្តរជាតិចេញ.ចូល និងធ្វើអោយបាត់បង់សោភ័ណភាព ព្រមទាំងការពារជម្លោះកើតឡើងនៅក្នុងបរិវេណច្រកទ្វារ ធ្វើអោយប៉ះពាល់ និងអសន្តិសុខនៅក្នុងបរិវេណច្រកទ្វារអន្តរជាតិប៉ោយប៉ែត។
លោកបានបញ្ជាក់ថា ម៉ូតូឌុប និងម៉ូតូកង់បី ត្រូវបានអោយនៅរង្វង់មូលក្បែរច្រកទ្វារអន្តរជាតិប៉ោយប៉ែត ដោយចែកជាក្រុម ក្នុងនោះអោយម៉ូតូកង់បីនៅមួយកន្លែង និងម៉ូតូឌុបនៅមួយកន្លែង មិនអោយនៅច្របូកច្របល់គ្នាទៀតឡើយ ហើយអ្នកបើកបរម៉ូតូឌុប និងម៉ូតូកង់បី ត្រូវអាវកាក់ជាសម្គាល់ និងហាមដាច់ខាតមិនអនុញ្ញាតអោយនៅក្នុងបរិវេណច្រកទ្វារអន្តរជាតិប៉ោយប៉ែតទៀតឡើយ។
លោកឧត្តមសេនីយ៍ត្រី អ៊ី ចំរើន បានបញ្ជាក់ថា រយៈពេលកន្លងមក ដោយអនុញ្ញាតអោយម៉ូតូឌុប និងម៉ូតូកង់បីចូលដឹកភ្ញៀវ ឬម៉ូយដល់បរិវេណច្រកទ្វារអន្តរជាតិប៉ោយប៉ែត ព្រោះតែអគារកាស៊ីណូត្រូវបានភ្លើងឆេះបិទច្រកចេញ-ចូលចាប់ពីរង្វង់មូលមកច្រកទ្វារ ហើយបើកអោយចេញ-ចូលតាមផ្លូវដើមពុទ្រា ទើបអនុញ្ញាតអោយចូលដឹកភ្ញៀវដល់បរិវេណច្រកទ្វារ និងបង្កឱ្យមានបញ្ហារវាងក្រុមម៉ូតូឌុប និងក្រុមម៉ូតូកង់បី បានឈ្លោះប្រកែកគ្នាធ្វើប៉ះពាល់ដល់សណ្តាប់ធ្នាប់ និងអសន្តិសុខដល់ភ្ញៀវជាតិ និងអន្តរជាតិដែលចេញ-ចូលតាមច្រកទ្វារនេះ។
ក្រោយពីរុះរើអគារកាស៊ីណូដែលអគ្គិភ័យឆាបឆេះរួចរាល់ ត្រូវបានបើកអោយចេញ-ចូលពីរង្វង់មូលមកច្រកទ្វារ ហើយរៀបចំសណ្តាប់ធ្នាប់បរិវេណច្រកទ្វារមិនអោយម៉ូតូឌុប ឬម៉ូតូកង់បីឥណ្ឌា ចូលអោយរង់ចាំភ្ញៀវដើរចេញពីច្រកទ្វារ ទៅជិះនៅរង្វង់មូលក្រុងប៉ោយប៉ែត៕
ចែករំលែកព័តមាននេះ