រថយន្ដពណ៌អ្វីដែលកំពុងមានហាងឆេងជាងគេនៅលើទីផ្សារ ?
រាជធានីភ្នំពេញ ៖ ការទិញរថយន្ដមកប្រើប្រាស់ អ្នកខ្លះទិញទៅតាមចំណង់ចំណូលចិត្តរបស់ខ្លួន ដោយមិនបានគិតពីទីផ្សារនោះទេ ប៉ុន្ដែ
រាជធានីភ្នំពេញ ៖ ការទិញរថយន្ដមកប្រើប្រាស់ អ្នកខ្លះទិញទៅតាមចំណង់ចំណូលចិត្តរបស់ខ្លួន ដោយមិនបានគិតពីទីផ្សារនោះទេ ប៉ុន្ដែក៏មានអ្នកមួយចំនួន មុននឹងសម្រេចចិត្តទិញក៏បានគិតដែរថា គួរទិញរថយន្ដម៉ាកអ្វី ឬពណ៌អ្វីដែលកំពុងមានទីផ្សារ និងពេញនិយម ព្រមទាំងងាយស្រួលលក់ចេញជាដើម ។ តើនៅកម្ពុជាសព្វថ្ងៃ រថយន្ដពណ៌អ្វីដែលកំពុងមានទីផ្សារជាងគេ ? និងមកពីមូលហេតុអ្វីដែរ ?
បើតាមម្ចាស់ឃ្លាំងលក់រថយន្ដ ក៏ដូចជាជាងជួសជុលរថយន្ដនានាបានលើកឡើងដូចគ្នាថា រថយន្ដពណ៌ស កំពុងមានទីផ្សារជាងពណ៌ផ្សេងៗទៀត ដោយសារតែអ្នកប្រើប្រាស់យល់ថា ពណ៌សនាំមកនូវលាភសំណាង និងងាយស្រួលលក់ចេញជាដើម ។
លោក អាំង វ៉ាន់សាក់ ជំនួយការនាយកគ្រប់គ្រងក្រុមហ៊ុន TAN CHONG MOTOR បានសង្កេតឃើញថា តាំងពីឆ្នាំ២០១៤ រហូតមកដល់សព្វថ្ងៃនេះ រថយន្តដែលពេញនិយម និងមានអ្នកប្រើច្រើនជាងគេ គឺពណ៌ស ។
លោកបានឱ្យដឹងកាលពីថ្ងៃទី២៧ កញ្ញា ម្សិលមិញថា ៖« សព្វថ្ងៃនេះ ប្រជាពលរដ្ឋយើងពេញនិយមប្រើប្រាស់រថយន្តពណ៌សច្រើន បើធៀបនឹងរថយន្តពណ៌ទឹកប្រាក់ ឬពណ៌ខ្លាញ់ក្តាម។ ជាក់ស្តែង ក្នុង១ខែ ក្រុមហ៊ុនខ្ញុំអាចលក់រថយន្តពណ៌សបាន២០គ្រឿង បើធៀបនឹងឆ្នាំមុនៗ មានការកើនឡើង » ។
លោកបន្ដថា ៖« តាមការសង្កេតកន្លងមក ក្នុងចំណោមអតិថិជន១០នាក់ មាន៨នាក់ ពេញនិយមរថយន្តពណ៌សទៅហើយ ដោយសារតែមើលឃើញបែបនេះ ក្រុមហ៊ុននាំចូលរថយន្តម្តងៗ មានពណ៌ស ពី៧០ទៅ៨០% » ។
លោកបានបញ្ជាក់ពីមូលហេតុដែលគេពេញនិយមប្រើប្រាស់រថយន្ដពណ៌សនេះថា ដោយសារអតិថិជនយល់ថា ពណ៌សនាំមកនូវហុងស៊ុយជិះទៅចុះចំណោមគេឯង ចតហាលថ្ងៃមិនសូវក្ដៅ ហើយងាយស្រួលពេលលក់ចេញវិញជាដើម ។
បើតាមលោក ចក់ សារិន ម្ចាស់ឃ្លាំងលក់រថយន្ដមួយទឹក បានឲ្យដឹងដែរថា ក្នុង១ខែ លោកលក់ពី១០គ្រឿងឡើងទៅ ហើយរថយន្ដដែលអតិថិជនទិញច្រើនជាងគេ គឺពណ៌ស ដោយសារតែពណ៌នេះកំពុងពេញនិយមសម្រាប់អ្នកប្រើប្រាស់ ។ លោកថា ៖« តាមពិតទៅ ខ្ញុំឃើញថា ពួកគាត់ [អតិថិជន] តាមគ្នា ឬអាចថាមកពីពណ៌ហ្នឹងគេនិយមជិះច្រើន ក៏ថាបាន ។ ម្យ៉ាងទៀត មើលទៅវាទាន់សម័យ ហ៊ឺហា ជាពិសេសគឺងាយស្រួលលក់ចេញ » ។
យ៉ាងណាក៏ដោយ លោកយល់ថា មិនថាពណ៌សទេដែលងាយស្រួលលក់ ពណ៌ផ្សេងទៀតក៏ស្រួលដូចគ្នា ប៉ុន្តែសម្រាប់ពណ៌ស លក់ដាច់ជាងគេ ដោយតម្លៃខុសគ្នាពី១ពាន់ដុល្លារ ទៅ១.៥០០ដុល្លារក្នុង១គ្រឿង រីឯគ្រឿងបំពាក់ ឬម៉ាស៊ីនផ្សេងៗគឺដូចគ្នាទាំងអស់ ខុសត្រង់តែពណ៌ប៉ុណ្ណោះ ។
ចំណែកលោក ស្រេង វិបុល ជាងជុសជុលប្រចាំឃ្លាំងលក់រថយន្ត ជា ផេង បានឱ្យដឹងថា មួយឆ្នាំចុងក្រោយនេះ រថយន្តដែលលក់ដាច់ភាគច្រើន គឺពណ៌ស និងពណ៌ស្ករ ។ ចំណែកពណ៌ផ្សេង យូរៗលក់បាន១គ្រឿង ហើយតម្លៃធូរថ្លៃ និងស្អាត ទើបអតិថិជនទិញ ។
លោកបន្តថា ៖« នៅឃ្លាំងយើង ដោយសាររថយន្តមានតម្លៃរាងថ្លៃបន្តិច ក្នុង១ខែអាចលក់បាន២-៣គ្រឿង តែបើឃ្លាំងផ្សេងដែលគេលក់រថយន្តស៊េរីទាបៗថ្លៃក្រោម២ម៉ឺនដុល្លារ អាចលក់បានច្រើន » ។
រីឯលោក ស្រេង គឹមស្រ៊ន ជាងជុសជុល រថយន្តប្រចាំឃ្លាំងលក់រថយន្ត ហេង ហេង បានឱ្យដឹងដែរថា តាមការកត់សម្គាល់រហូតមកដល់សព្វថ្ងៃនេះ រថយន្តពណ៌ស លក់ដាច់ច្រើនជាងពណ៌ទឹកប្រាក់ និងពណ៌ស្ករ។ លោកបន្ដថា ការប្រើពណ៌សច្រើននេះ អាចជាការនិយមតាមគ្នា ហើយនៅពេលលក់វិញ វាងាយស្រួល ។
ទោះបីជាទីផ្សាររថយន្តពណ៌សនៅពេលបច្ចុប្បន្នត្រូវបានក្រុមហ៊ុន និងឃ្លាំងលក់រថយន្តអះអាងថា មានអ្នកប្រើប្រាស់ច្រើនក្តី ប៉ុន្ដែនៅថ្ងៃខាងមុខ ផ្នត់គំនិតរបស់ប្រជាពលរដ្ឋខ្មែរនឹងផ្លាស់ប្តូរមកប្រើប្រាស់ និងពេញនិយមពណ៌ផ្សេងវិញ ។ នេះបើតាមលោក អាំង វ៉ាន់សាក់ ជំនួយការនាយកគ្រប់គ្រងក្រុមហ៊ុន TAN CHONG MOTOR ៕
ចែករំលែកព័តមាននេះ