ភ្នំពេញ៖ បន្ទាប់ពីទទួលដំណឹងដ៏តក់ស្លុត ចំពោះរមណភាពរបស់ស្ត្រី ឈ្មោះ សៀង ស្រីអូន (រងគ្រោះ ដោយពេទ្យគ្លីនិកដើមអង្ក្រង បានកាយយកសពទារករំលូតក្នុងផ្ទៃ ដោយទាំងពោះវៀន…
ភ្នំពេញ៖ បន្ទាប់ពីទទួលដំណឹងដ៏តក់ស្លុត ចំពោះរមណភាពរបស់ស្ត្រី ឈ្មោះ សៀង ស្រីអូន (រងគ្រោះ ដោយពេទ្យគ្លីនិកដើមអង្ក្រង បានកាយយកសពទារករំលូតក្នុងផ្ទៃ ដោយទាំងពោះវៀន ចេញមកក្រៅ កាលពីខែវិច្ឆិកា ឆ្នាំ២០២២ កន្លងទៅ) នៅថ្ងៃទី១៦ ខែមីនា ឆ្នាំ២០២៣នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចូលរួមរំលែកទុក្ខដ៏ក្រៀមក្រំ និងចាត់មន្ត្រី ចូលរួមបុណ្យស.ពអ្នកស្រី សៀង ស្រីអូន អាយុ ២២ឆ្នាំ ដែលបានទទួលមរណភាព កាលពីវេលាម៉ោង ៤ទៀបភ្លឺ ថ្ងៃទី១៦ ខែមីនា ឆ្នាំ២០២៣ បន្ទាប់ពីគ្រូពេទ្យកាល់ម៉ែត បានបញ្ជូនគាត់ តាមរថយន្ដគិលានសង្គ្រោះ ទៅដល់គេហដ្ឋានគាត់ នៅភូមិពងទឹក ឃុំស្រែចែង ស្រុកជុំគិរី ខេត្តកំពត។
ស្ថិតក្នុងក្តីដ៏សោកសង្រេងនេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បាននាំនូវការរំលែកទុក្ខដ៏ក្រៀមក្រំពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលអ្នកម្តាយមនុស្សធម៌ មានក្តីក្តុកក្តួល រន្ធត់ចិត្តក្រៃលែង និងតែងតែយកចិត្តទុកដាក់គិតគូរជាបន្តបន្ទាប់ចាប់តាំងពីថ្ងៃកើតហេតុដំបូង ជួយសង្គ្រោះបន្ទាន់ ព្យាបាល ថែទាំ លើកទឹកចិត្ត នឹកសង្ឃឹមថា នឹងបានជាសះស្បើយឡើងវិញ។ ប៉ុន្តែជាអកុសលការខិតខំប្រឹងប្រែងរបស់ក្រុមគ្រូពេទ្យនៃមន្ទីរពេទ្យកាល់ម៉ែត ក៏ដូចជា ក្រុមគ្រូពេទ្យនៅប្រទេសថៃ បានព្យាយាមជួយសង្គ្រោះអស់ពីសមត្ថភាពហើយ នៅតែមិនអាចយកឈ្នះចង្កូមមច្ចុរាជបានឡើយ។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សូមឧទ្ទិសបួងសួងសូមឱ្យវិញ្ញាណក្ខន្ធសព សៀង ស្រីអូន បានទៅកាន់សុគតិភពកុំបីឃ្លៀងឃ្លាតឡើយ។
ជាមួយគ្នានេះ លោកជំទាវ អគ្គលេខាធិការរងទី១ បាននាំនូវប្រសាសន៍របស់សម្ដេចកិត្តិព្រឹទ្ធបណ្ឌិត ដែលផ្តាំផ្ញើលើកទឹកចិត្តដល់លោក ផេង វឿន ដែលត្រូវជាស្វាមីរបស់ស្រីអូន ត្រូវមានស្មារតីរឹងប៉ឹង ខិតខំតស៊ូជម្នះការលំបាក ដើម្បីជីវិតរស់នៅបន្តទៀត ជាពិសេសត្រូវជំរុញកូនស្រីអាយុទើបតែជាង ៣ឆ្នាំ ឱ្យបានសិក្សារៀនសូត្រខ្ពង់ខ្ពស់ ដើម្បីអនាគតភ្លឺស្វាង។
ម្តាយបង្កើត ម្តាយក្មេក ក្រុមគ្រួសារសព និងស្វាមីរបស់ សៀង ស្រីអូន មានក្តីរំភើបក្តុកក្តួល និងថ្លែងអំណរគុណយ៉ាងជ្រាលជ្រៅ ចំពោះអ្នកម្តាយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ គិតគូរជាបន្តបន្ទាប់ ជាពិសេសទំនុកបម្រុងដល់ថ្លៃព្យាបាលទាំងស្រុង លើកទឹកចិត្ត និងផ្តល់អំណោយជាស្បៀង សម្ភារប្រើប្រាស់ ថវិកាជាបន្តបន្ទាប់ចំនួន ៣លើក ក្នុងអំឡុងពេលកំពុងព្យាបាល។ថ្ងៃនេះជាលើកទី៤ ដែលសម្តេចកិត្តិព្រឹទ្ធបណ្ឌិត បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី ចុះមកចូលរួមរំលែកមរណទុក្ខ ជូនដំណើរជាលើកចុងក្រោយ និងចូលបុណ្យសពនូវអង្ករ ១០០គីឡូក្រាម, មី ៥កេស, ត្រីខ ៥០កំប៉ុង, ទឹកក្រូច ៥កេស និងថវិកា ១០លានរៀល។
លោកសាស្ត្រាចារ្យ ឡឹម តារា អគ្គនាយករងមន្ទីរពេទ្យកាល់ម៉ែត បានឱ្យដឹង នៅព្រឹកថ្ងៃទី១៦ ខែមីនា ឆ្នាំ២០២៣នេះថា «ស្ត្រីដែលពេទ្យឯកជន កាយយកសពទារកក្នុងផ្ទៃ ដោយទាំងពោះវៀន បានផុតដង្ហើមហើយ បន្ទាប់ពីគ្រូពេទ្យកាល់ម៉ែត បានបញ្ជូនគាត់ តាមរថយន្ដគិលានសង្គ្រោះ ទៅដល់គេហដ្ឋានគាត់ នៅភូមិពងទឹក ឃុំស្រែចែង ស្រុកជុំគិរី ខេត្តកំពត។»
លោកសាស្ត្រាចារ្យ ឡឹម តារា បានថ្លែងបន្ដថា «ប៉ុន្មានថ្ងៃចុងក្រោយនេះ គាត់មានស្ថានភាពធ្ងន់ធ្ងរខ្លាំងណាស់ ដោយយប់មិញនេះ (ថ្ងៃទី១៥ ខែមីនា ឆ្នាំ២០២៣) គាត់បានធ្វើទុក្ខក្នុងខ្លួនខ្លាំងមែនទែន ដែលក្រុមគ្រូពេទ្យយើង ក៏បានដាក់ទុយោសប់ដង្ហើមគាត់ដែរ តែហាក់គ្មានសង្ឃឹមសោះ ទើបនៅកំឡុងម៉ោង ៤ទៀបភ្លឺ ថ្ងៃទី១៦ ខែមីនា ក្រុមគ្រួសារគាត់ ក៏សូមគ្រូពេទ្យយើង យកគាត់ទៅផ្ទះ។ ដូច្នេះក្រុមគ្រូពេទ្យយើង ក៏បានរួមដំណើរជាមួយអ្នកជំងឺដឹកបញ្ជូន គាត់ទៅផ្ទះតាមការស្នើសុំ។ ពេលដល់ផ្ទះ រៀបចំកន្លែងគាត់សម្រាកហើយ មួយសន្ទុះក្រោយមក គាត់ក៏បានផុតដង្ហើមតែម្ដង។ សែនអាសូរគាត់ណាស់ តែក្រុមគ្រូពេទ្យយើង បានប្រឹងប្រែងអស់ពីលទ្ធភាពបច្ចេកទេសហើយ។»
លោកសាស្ដ្រាចារ្យ បញ្ជាក់បន្ថែមថា «អ្វីដែលឈានមកដល់ថ្ងៃនេះ ដូចអ្វីដែលមន្ទីរពេទ្យយើងបានបញ្ជាក់កន្លងមកដែរ ខណៈយើងបានស្គាល់ច្បាស់ពីស្ថានភាពពីកត្ដាប្រឈម និងកត្ដាគ្រោះថ្នាក់របស់គាត់ តែទោះជាគ្មានសង្ឃឹមរស់តាំងពីលើកដំបូងមែន តែក្រុមគ្រូពេទ្យយើង នៅតែខិតខំប្រឹងប្រែងឱ្យអស់ពីសមត្ថភាព និងលទ្ធភាពបច្ចេកទេស ទោះរស់បានរយៈពេលខ្លីក៏ប្រឹងប្រែងដែរ។ ឥឡូវថ្ងៃនេះ ក៏បានមកដល់ ដូចអ្វីជាការវាយតម្លៃទុក ទោះបីជាវិទ្យាសាស្ដ្រជឿនលឿនយ៉ាងណា ព្រោះកន្លងមកអ្នកជំងឺ ក៏បានទៅទទួលការព្យាបាល នៅប្រទេសវៀតណាម និងប្រទេសថៃ ផងដែរ»។
ក្រោយហេតុការណ៍នោះ ក្រសួងសុខាភិបាល កាលពីថ្ងៃទី២៩ ខែវិច្ឆិកា ឆ្នាំ២០២២ បានសម្រេចបិទជាបណ្តោះអាសន្នមន្ទីរសម្រាកព្យាបាលឯកជន ឬគ្លីនិកឯកជនឈ្មោះ «ដើមអង្ក្រង» ស្ថិតនៅក្នុងស្រុកគងពិសី ខេត្តកំពង់ស្ពឺ។ ចំណែកពេទ្យស្រី ដែលកាយយកសពទារករំលូតក្នុងផ្ទៃ ដោយទាំងពោះវៀនស្ត្រីរងគ្រោះនោះ គឺត្រឹមតែត្រូវពិន័យគ្រូពេទ្យ ដោយហាមប្រកបអាជីពជាពេទ្យឆ្មបតទៅទៀតប៉ុណ្ណោះ៕
ចែករំលែកព័តមាននេះ