កម្មករលាងម៉ូតូសុំទិញជិះសាកបាត់ឈឹង ៣ថ្ងៃក្រោយ…
ខេត្តស្ទឹងត្រែង ៖ ម្ចាស់ស្ទើរអស់សង្ឈឹមក្រោយពីអ្នកលាងម៉ូតូម្នាក់សួរចង់ទិញម៉ូតូពេលយកទៅលាង
ខេត្តស្ទឹងត្រែង ៖ ម្ចាស់ស្ទើរអស់សង្ឈឹមក្រោយពីអ្នកលាងម៉ូតូម្នាក់សួរចង់ទិញម៉ូតូពេលយកទៅលាង រួចសុំជិះសាកបន្តិចបាត់ឈឹងគ្មានអ្នកទទួលខុសត្រូវ បីថ្ងៃក្រោយត្រូវម្ចាស់តាមរកឃើញនៅកណ្តាលក្រុងស្ទឹងត្រែង ទើបនគរបាលព្រហ្មទណ្ឌ ចាប់បញ្ជូនទៅតុលាការ និងបន្តបញ្ជូនទៅពន្ធនាគារនៅរសៀលថ្ងៃទី២៣ ខែកញ្ញា ឆ្នាំ២០១៧។ នគរបាលព្រហ្មទណ្ឌកម្រិតសាល ស្នងការដ្ឋាននគរបាលឲ្យដឹងថា ជនសង្ស័យត្រូវបានឃាត់ខ្លួននៅកណ្តាលក្រុងស្ទឹងត្រែង កាលពីថ្ងៃទី២២ ខែកញ្ញា ឆ្នាំ២០១៧ ក្រោយឆបោកយកម៉ូតូគ្រឿងកាលពីថ្ងៃទី២០ ខែកញ្ញា ឆ្នាំ២០១៧។
នគរបាលដដែលបន្តថា កម្មករលាងម៉ូតូនៅទីតាំងមួយក្នុងក្រុងស្ទឹងត្រែងបានសួរនាំទៅម្ចាស់ម៉ូតូថាចង់ទិញម៉ូតូមួយគ្រឿងហ្នឹង រួចក៏សុំម្ចាស់ម៉ូតូជិះសាកបន្តិចស្រាប់តែបាត់ឈឹងរហូតបីថ្ងៃក្រោយទើបប្រទះឃើញជនសង្ស័យកំពុងជិះម៉ូតូនោះយ៉ាងរំភើយ តែដោយសារម្ចាស់ស្គាល់ម៉ូតូរបស់ខ្លួនច្បាស់ក៏បានរាយការណ៍មកនគរបាលព្រហ្មទណ្ឌចុះស្ទាក់ចាប់ខ្លួនតែម្តង។ ស្ត្រីឈ្មោះ ថង បុប្ផា អាយុ៤៧ឆ្នាំ ជាម្ចាស់ម៉ូតូបានឲ្យដឹងថា នៅថ្ងៃកើតហេតុរូបខ្លួន និងប្តីវ័យជាង៣០ឆ្នាំបានជិះម៉ូតូម៉ាកMSX ស៊េរីឆ្នាំ២០១៧ ពាក់ស្លាកលេខ ត្បូងឃ្មុំ ១D-៩២៤១ ពណ៌ស យកទៅលាង លុះដល់កន្លែងលាងម៉ូតូយុវជនជាកម្មករលាងម៉ូតូម្នាក់សួរថា ម៉ូតូពូលក់ទេខ្ញុំចង់ទិញសួររួចកម្មកររូបនោះសុំជិះសាកបន្តិចប្តីរបស់ខ្លួនក៏ហុចសោឲ្យទៅអ្នកលាងម៉ូតូនោះស្រាប់តែចាំបាត់ៗស្ងាត់ឈឹងលុះសួរនាំអ្នកលាងម៉ូតូជាមួយក៏មានការភ្ញាក់ផ្អើលឡើងតែម្តង។
ប្រភពព័ត៌មានពីនគរបាលព្រហ្មទណ្ឌកម្រិតស្រាលក្រោយចាប់ខ្លួនជនសង្ស័យបានសារភាពថា បន្ទាប់ពីខ្លួនប្រើល្បិចចង់ទិញម៉ូតូរួចសុំម្ចាស់ជិះសាកមើល គ្រានោះរូបគេមិនបានជិះមកវិញទេ តែជនសង្ស័យជិះយកទៅលាក់នៅផ្ទះជួលរួចធ្វើសកម្មភាពដោះស្លាកលេខចេញ និងរក្សាទុករយៈពេលបីថ្ងៃទើបជិះចេញក្រៅ ក្នុងគោលបំណងទៅកន្លែងជាងជួសជុលម៉ូតូដូរស្បែកហ្វ្រាំងដើម្បីជិះទៅខេត្តរតនគិរី ក៏ស្រាប់តែម្ចាស់ប្រទះឃើញក៏រាយការណ៍មកជំនាញចុះចាប់ខ្លួនតែម្តង។
លោក ហោ វុទ្ធី នាយការិយាល័យព្រហ្មទណ្ឌកម្រិតស្រាល ស្នងការដ្ឋាននគរបាលខេត្តស្ទឹងត្រែងឲ្យដឹងថា ជនសង្ស័យពាក់ព័ន្ធករណីខាងលើ ឈ្មោះ វឿន ផល្លី ភេទប្រុស អាយុ១៩ឆ្នាំ មុខរបរកម្មករលាងឡានម៉ូតូ រស់នៅភូមិព្រែក សង្កាត់ស្ទឹងត្រែង ក្រុងខេត្តស្ទឹងត្រែង។ លោកបន្តថា ករណីនេះជំនាញកសាងសុំណុំរឿងរំលោភលើសេចក្តីទុកចិត្ត ហើយលោកក៏កំពុងបន្តនីតិវិធីបញ្ជូនទៅតុលាការ និងបន្តបញ្ជូនទៅឃុំខ្លួនជាបណ្តោះអាសន្ននៅពន្ធនាគាររួចរាល់ នៅរសៀលថ្ងៃទី២៣ ខែកញ្ញា ឆ្នាំ២០១៧នេះហើយដែរ៕
ចែករំលែកព័តមាននេះ