រាជធានីភ្នំពេញ ៖ នៅចំពោះមុខភរិយា និងកូនៗព្រមទាំងក្រុមសិល្បករសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានអួលដើមកនិងសម្រក់ទឹកភ្នែក ខណៈទម្លាយប្រវត្តិស្នេហ៍តាមស្រឡាញ់ភរិយា និងសន្យាថា មិនឲ្យភរិយាលំបាក…
រាជធានីភ្នំពេញ ៖ នៅចំពោះមុខភរិយា និងកូនៗព្រមទាំងក្រុមសិល្បករសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានអួលដើមកនិងសម្រក់ទឹកភ្នែក ខណៈទម្លាយប្រវត្តិស្នេហ៍តាមស្រឡាញ់ភរិយា និងសន្យាថា មិនឲ្យភរិយាលំបាក ។
ខណៈសម្រក់ទឹកភ្នែក សម្តេចតេជោ ក៏បានគូសបញ្ជាក់ប្រវត្តិស្រឡាញ់ភរិយាលើកដំបូងដោយមិនបានដឹងជាមុនប្រៀបដូចជា គូព្រេងចារមកឲ្យជួប ។ សម្តេចតេជោ ក៏បានលើកឡើងថា ទឹកភ្នែករបស់សម្ដេចស្រក់ពិតមែន តែអ្នកកុំសង្ឃឹមថា សម្ដេចផ្ដល់ការយោគយល់ឲ្យអ្នកដែលមកបំផ្លាញសន្ដិភាពរបស់កម្ពុជានោះទេ ។
ថ្លែងក្នុងឱកាសអញ្ជើញសម្ពោធភាពយន្តរឿង «កូនប្រុសក្រោមពន្លឺព្រះចន្ទពេញបូរណ៌មី» រួមជាមួយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នារសៀលថ្ងៃទី១៣ ខែមីនា ឆ្នាំ២០២៣ សម្ដេចតេជោ ហ៊ុន សែន បានថ្លែងថា ទឹកភ្នែកសម្តេច តែងតែហូរជានិច្ចនៅពេល ស្តាប់ចម្រៀងទុក្ខស្រីប្តីព្រាត់ អនិច្ចាកូនកំសត់ និងសំបុត្រដែលពិបាកសរសេរបំផុត ។ ទោះបីត្រូវហូរទឹកភ្នែកតែសម្តេចនៅតែស្តាប់ ។
សម្ដេចតេជោ បញ្ជាក់ថា «ខ្ញុំស្រក់ទឹកភ្នែកដោយខ្លួនឯង នឹកឃើញដល់រឿងនេះ រឿងនោះ ហើយដែលខ្ញុំត្រូវតែក្បាលរឹងជាមួយអ្នកដែលបំផ្លាញសន្ដិភាពត្រូវប្រចាំ ។ ទឹកភ្នែករបស់ ហ៊ុន សែន ស្រក់អ្នកកុំសង្ឃឹមថា ហ៊ុន សែន អាចផ្ដល់ការយោគយល់ឱ្យអ្នកបំផ្លាញសន្ដិភាពរ បស់កម្ពុជា»។
លើសពីនេះ សម្ដេចនាយករដ្ឋមន្ដ្រី ប្រកាសថា សម្ដេចមិនភ្លើនភ្លេចជាមួយនឹងអំណាច ហើយក៏មិនទុកឱ្យអ្នកដែលមានចេតនាមកបំផ្លាញសន្ដិភាពនេះហើយក៏មិនទុកឲ្យធ្វើអ្វីស្រេចទៅតាមតែចិត្តនោះទេ ។ សម្ដេចថា ទោះដោយតម្លៃណាក៏ដោយត្រូវការពារសន្ដិភាពឲ្យបាន ព្រោះ ទុក្ខសោករបស់សម្តេច គឺជាទុក្ខសោករបស់ប្រជាជនទាំងមូល។
ឆ្លៀតឱកាសនោះ សម្ដេចតេជោ ហ៊ុន សែន លើកឡើងថា រឿងរ៉ាវរបស់សម្ដេចមិនអាចយកទៅកាឡៃបានទេ ។ សម្ដេចថា«រឿងរបស់ខ្ញុំ មិនអាចយកទៅកាឡៃបានទេ ពិតជាមិនអាចយកទៅកាឡៃបានទេ ព្រោះបើមិនអញ្ចឹងធ្វើឲ្យអ្វីដែលជាសាច់រឿងពិតរបស់យើង គឺក្លាយទៅជារឿងភូតកុហក់ ព្រោះរឿងនេះសូម្បីពាក្យមួយម៉ាត់ គឺបើសិនជាខុស ហើយបើសិនជាតួអង្គរបស់ខ្ញុំត្រូវជាតួអង្គរបស់ខ្ញុំ គឺមិនអាចឲ្យខុសទេព្រោះវាអាចក្លាយរឿងហ្នឹងទៅជារឿងមួយផ្សេង»៕
ចែករំលែកព័តមាននេះ