រថយន្តក្រុងដឹកអ្នកដំណើរប្រភេទ៤៥កៅអីមួយគ្រឿង ដែលចតទុកចោលរយៈពេល២ឆ្នាំមកហើយនោះ ត្រូវបានអណ្តាតភ្លើងឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើល
រាជធានីភ្នំពេញ ៖ រថយន្តក្រុងដឹកអ្នកដំណើរប្រភេទ៤៥កៅអីមួយគ្រឿង ដែលចតទុកចោលរយៈពេល២ឆ្នាំមកហើយនោះ ត្រូវបានអណ្តាតភ្លើងឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់រថយន្តពន្លត់អគ្គិភ័យចុះធ្វើការអន្តរាគមន៍កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី១១ ខែមីនា ឆ្នាំ២០២៣ នៅត្រង់ចំណុចខាងក្រោមផ្សារបឹងបៃតង តាមបណ្ដោយផ្លូវបេតុង ស្ថិតក្នុងសង្កាត់គោកឃ្លាង ខណ្ឌសែនសុខ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុឲ្យដឹងថា គេបានប្រទះឃើញរថយន្តក្រុងប្រភេទ៤៥កៅអី ពាក់ស្លាកលេខ ភ្នំពេញ2B-1459 បានបើកមកឈប់ចតទុកចោលនៅត្រង់ចំណុចកើតហេតុនេះអស់រយៈពេលជាង២ឆ្នាំមកហើយ ដោយមិនដែលឃើញមានម្ចាស់មកមើលនោះទេ។
ពលរដ្ឋបន្តថា កន្លងមក ប្រជាពលរដ្ឋដែលរស់នៅក្បែរៗនោះ ក៏ធ្លាប់រាយការណ៍ជូនអាជ្ញាធរមូលដ្ឋានដែរ ប៉ុន្តែនៅតែមិនឃើញមានអ្នកណាមកបើកយករថយន្តនោះចេញពីកន្លែងកើតហេតុនោះទេ។ លុះដល់វេលាកើតហេតុ ខណៈពេលដែលប្រជាពលរដ្ឋបានចូលទៅសម្រាកស្ងាត់អស់ ក៏ស្រាប់តែមានអណ្ដាតភ្លើងបានឆាបឆេះរថយន្តនោះយ៉ាងសន្ធោសន្ធៅតែម្តង បង្កឲ្យមានការភ្ញាក់ផ្អើលដល់ប្រជាពលរដ្ឋចេញមកទាញទុយោទឹកបាញ់ពន្លត់ និងរាយការណ៍ជូនសមត្ថកិច្ចមូលដ្ឋាន ព្រមទាំងរថយន្តពន្លត់អគ្គិភ័យឲ្យចុះមកធ្វើការអន្តរាគមន៍ភ្លាមផងដែរ។
ប្រភពដដែលបន្តទៀតថា បន្ទាប់មកក៏មានសមត្ថកិច្ចមូលដ្ឋាន និងរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន២គ្រឿងបានមកដល់កន្លែងកើតហេតុ និងបាញ់ទឹកពន្លត់អស់មួយរថយន្ត ក៏រលត់ទៅវិញជាស្ថាពរ។
ករណីអគ្គិភ័យខាងលើនេះ បានបណ្ដាលឲ្យរថយន្តក្រុងដឹកអ្នកដំណើររងការខូចខាតអស់ទាំងស្រុង និងមិនបណ្ដាលឲ្យមានឆេះរាលដាលដល់ផ្ទះពលរដ្ឋជិតខាងនោះទេ។ ហើយចំពោះមូលហេតុវិញ សមត្ថកិច្ចបានសនិ្នដ្ឋានជំហានដំបូងថា គឺបណ្ដាលមកពីឆ្លងក្បាលអាគុយ ទើបបណ្តាលឱ្យមានភ្លើងឆាបឆេះបែបនេះ៕
ចែករំលែកព័តមាននេះ