ផ្ទះម្ចាស់យំលែងចេញ! ភ្លើងឆេះព្រៃ ក៏រាលដាលមកដល់ផ្ទះពលរដ្ឋឆេះហ្មត់គ្មានសល់
- ឧត្តរមានជ័យ
លំនៅឋានប្រជាពលរដ្ឋមួយខ្នងផ្ទះដែលមានទំហំ៨ម៉ែត្រx៨ម៉ែត្រ សាងសង់អំពីឈើ ដំបូលប្រក់ស័ង្កសី ជញ្ជាំងក្តារ និងរោងគោមួយខ្លង ដែលមាន
ខេត្តឧត្តរមានជ័យ ៖ លំនៅឋានប្រជាពលរដ្ឋមួយខ្នងផ្ទះដែលមានទំហំ៨ម៉ែត្រx៨ម៉ែត្រ សាងសង់អំពីឈើ ដំបូលប្រក់ស័ង្កសី ជញ្ជាំងក្តារ និងរោងគោមួយខ្លង ដែលមានទទឹងទំហំ៦ម៉ែត្រx៨ម៉ែត្រ ដំបូលប្រក់ស័ង្គសី រួមទាំងសម្ភារៈប្រើប្រាស់ជាច្រើនទៀត ត្រូវបានអគ្គិភ័យលេបត្របាក់ហ្មត់ផងដែរ បង្កឱ្យមានការភ្ញាក់ផ្អើលកាលពីល្ងាចថ្ងៃទី៤ ខែមីនា ឆ្នាំ២០២៣ កន្លងទៅ ដែលកើតឡើងនៅក្នុងភូមិអូរតាមេង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
យោងតាមការឲ្យដឹងពីម្ចាស់លំនៅដ្ឋានរងគ្រោះដែលមានឈ្មោះ សឹង លឿន ភេទប្រុស អាយុ៤៧ឆ្នាំ និងមានប្រពន្ធឈ្មោះ សេត ថា អាយុ៥១ឆ្នាំ មុខរបរជាកសិករ ព្រមទាំងមានកូន៦នាក់ ក្នុងនោះស្រី២នាក់ រស់នៅក្នុងភូមិ-ឃុំកើតហេតុខាងលើ បានរៀបរាប់ឲ្យដឹងថា មុនពេលកើតហេតុ ពួកគេបាននាំគ្នាទៅចម្ការដោយទុកផ្ទះចោល ខណៈពេលនោះស្រាប់តែភ្លើងឆេះព្រៃ ហើយក៏ឆេះរាលដាលមកដល់លំនៅដ្ឋាន បង្កឱ្យឆាបឆេះលំនៅដ្ឋាន ទ្រព្យសម្បត្តិ រួមទាំងសម្ភារៈប្រើប្រាស់ជាច្រើនខ្ទេចគ្មានសេសសល់ សូម្បីតែសម្លៀកបំពាក់ក៏ត្រូវអណ្ដាតភ្លើងឆាបឆេះខ្ទេចអស់ផងដែរ។
ទាក់ទិននឹងគ្រោះអគ្គិភ័យខាងលើនេះ កាលពីរសៀលថ្ងៃទី៦ ខែមីនា ឆ្នាំ២០២៣ លោក ងួន ទ្ធីរិទ្ធ អភិបាលស្រុកអន្លង់វែង បានឲ្យដឹងថា បន្ទាប់ពីក្រុមអាជ្ញាធរមូលរដ្ឋានស្រុក បានទទួលនៅព័ត៌មានគ្រោះអគ្គិភ័យកើតឡើងទៅលើក្រុមគ្រួសារនេះភ្លាមៗ លោកក៏បានដឹកនាំក្រុមការងារថ្នាក់ស្រុក ចុះសួរសុខទុក្ខប្រជាពលរដ្ឋដែលរងគ្រោះ រួមទាំងនាំយកអំណោយសម្ភារៈផ្សេងៗដូចជា ៖ ស័ង្កសី, ចាន, ឆ្នាំង, មុង, ភួយ, គ្រឿងឧបភោគបរិភោគ និងថវិការបស់ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី ប្រធានក្រុមការងារថ្នាក់កណ្តាល ចុះមូលដ្ឋាន ខេត្តឧត្តរមានជ័យ ផ្តល់ជូនជនរងគ្រោះផងដែរ។
ហើយប្រជាពលរដ្ឋរងគ្រោះខាងលើក៏បានថ្លែងអំណរគុណដល់ថ្នាក់ដឹកនាំដែលបានយកចិត្តទុកដាក់សម្រាប់ក្រុមគ្រួសាររបស់ពួកគាត់ ដែលកំពុងរងគ្រោះដោយសារគ្រោះអគ្គិភ័យនេះ៕
ចែករំលែកព័តមាននេះ