ភ្នំពេញ៖ នៅល្ងាច​ថ្ងៃព្រហស្បតិ៍​ ទី២ ខែមីនា ឆ្នាំ២០២៣ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា​ បាន​អញ្ជើញជាអធិបតី ក្នុងពិធីអបអរសាទរទិវាវប្បធម៌ជាតិ ៣មីនា លើកទី២៥ និងពិសាអាហារសាមគ្គី ជាមួយសិល្បករសិល្បការិនី ប្រមាណជាង ៤០០០នាក់។ ពិធីនេះ ធ្វើឡើង នៅមជ្ឈមណ្ឌលកោះពេជ្រ ក្នុងរាជធានីភ្នំពេញ​។ 

ក្នុងពិធីនេះ សម្តេចតេជោ ហ៊ុន សែន បានណែនាំ​អោយយកចិត្តទុកដាក់លើការប្រើប្រាស់​អក្សរខ្មែរ ពិសេសតាមបណ្តាញសង្គម។ សម្តេចតេជោ លើកឧទាហរណ៍មកបញ្ជាក់ថា «ខ្ញុំទៅដែរ»។ តែ​អ្នកខ្លះ​សរសេរ​ថា «ខ្ញុំទៅដែល»។ នេះជាការខុសឆ្គងមួយ​។

ដូច្នេះ​សម្តេចតេជោ ហ៊ុន សែន បានលើកឡើងថា យើងត្រូវរួមគ្នា ពង្រឹងអក្សរសាស្ត្រខ្មែរ សម្រាប់​ប្រជាពលរដ្ឋយើង ឱ្យសរសេរបានត្រឹមត្រូវ​។ ឥឡូវ នៅតាមទូរសព្ទស្មាតហ្វូន សុទ្ធតែអាចទាញ​យក​វចនានុក្រមសម្តេចព្រះសង្ឃរាជ ជួន ណាត។ ដូច្នេះយើង​អាចផ្ទៀងផ្ទាត់ និងពិនិត្យ​ពាក្យខ្មែរយើង​ ដែលត្រឹមត្រូវបាន៕​