មិនបង្អង់យូរ…គ្រាន់តែទទួលព័ត៌មានភ្លាម ឡោមព័ទ្ធស្ទាក់ចាប់ភ្លាម !
ខេត្តកណ្តាល ៖ ថ្នាំញៀនចំនួន៤២កញ្ចប់រួមជាមួយមុខសញ្ញាជួញដូរ២នាក់
ខេត្តកណ្តាល ៖ ថ្នាំញៀនចំនួន៤២កញ្ចប់រួមជាមួយមុខសញ្ញាជួញដូរ២នាក់ក្នុងចំណោមបក្ខពួក៣នាក់ត្រូវបានកម្លាំងសមត្ថកិច្ចនគរបាលស្រុកកៀនស្វាយធ្វើការបង្ក្រាបបានកាលពីវេលាម៉ោង០៣និង៤០នាទីល្ងាចថ្ងៃទី២៣ ខែសីហា ឆ្នាំ២០១៧ នៅចំណុចភូមិទួលក្របៅ ឃុំគគីរស្រុកកៀនស្វាយ ខេត្តកណ្តាល ។
មុខសញ្ញាទាំង២នាក់ដែលសមត្ថកិច្ចឃាត់ខ្លួនទី១-ឈ្មោះ ភួង ស៊ីណាត ហៅម៉ៅ ភេទប្រុសអាយុ២៦ឆ្នាំ មុខរបរមិនពិតប្រាកដមានទីលំនៅភូមិ-ឃុំខាងលើ និងម្នាក់ទៀតឈ្មោះ ហុង សុភ័ក្ត្រ ភេទប្រុស អាយុ២៥ឆ្នាំ មុខរបរមិនពិតប្រាកដមានទីលំនៅភូមិព្រែកថ្លឹង សង្កាត់ព្រែកកំពិស ខណ្ឌពោធិ៍សែនជ័យ រាជធានីភ្នំពេញ ។ ចំណែកម្នាក់ទៀតរត់គេចខ្លួនឈ្មោះ អេង រចនាហៅកា ភេទប្រុស អាយុ៣១ឆ្នាំ មុខរបរមិនប្រាកដមានទីលំនៅភូមិទួលក្របៅ ឃុំគគីរ(ជាម្ចាស់ផ្ទះ) ។
តាមរបាយការណ៍ឲ្យដឹងថា ដោយមានការសហការជាមួយប្រជាពលរដ្ឋល្អបានរាយកាណ៍ផ្តល់ព័ត៌មានមកប៉ុស្តិ៍នគរបាលរដ្ឋបាលគគីរថា នៅផ្ទះរបស់ឈ្មោះ អេង រចនា ហៅកា ភេទប្រុស អាយុ៣១ឆ្នាំ មុខរបរមិនពិតប្រាកដបានធ្វើសកម្មភាពជួញដូរ និងប្រើប្រាស់គ្រឿងញៀន ។ ក្រោយពីទទួលបានព័ត៌មាននេះភ្លាមកំលាំងប៉ុស្តិ៍នគរបាលរដ្ឋបាលគគីរសហការណ៍ជាមួយកំលាំងនគរបាលផ្នែកប្រឆាំងបទល្មើសគ្រឿងញៀនស្រុករួមនិងអាជ្ញាធរភូមិ-ឃុំបានចុះទៅធ្វើកាឡោមព័ទ្ធឃាត់បានខ្លួនមុខសញ្ញា២នាក់ខាងលើរីឯម្ចាស់ផ្ទះបានរត់គេចខ្លួនបាត់ហើយសមត្ថកិច្ចធ្វើការឆែកឆេរដកហូតបានវត្ថុតាងនូវម្សៅក្រាមសថ្លាសង្ស័យសារធាតុញៀនចំនួន៤២កញ្ចប់ ធំ១កញ្ចប់ មធ្យម១កញ្ចប់ និងតូច៤០កញ្ចប់ ដបសំរាប់ប្រើប្រាស់ថ្នាំញៀន១ ម៉ូតូ១គ្រឿងស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ ១AM-៦៥៥៨ ។ ក្រោយសាកសួររួចមុខសញ្ញាទាំង២នាក់ និងវត្ថុតាងត្រូវបានសមត្ថកិច្ចនគរបាលកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តចាត់ការបន្តតាមនីតិវិធី ៕
ចែករំលែកព័តមាននេះ