ខេត្តឧត្តរមានជ័យ ៖ ទីផ្សារអន្លង់វែងថ្មី បានធ្វើការអភិវឌ្ឍន៍បង្កើតឡើងនៅក្នុងអំឡុងឆ្នាំ២០០៦ កន្លងទៅនេះ ដោយមានភាគហ៊ុនលោក សេង ស៊ន់ ភេទប្រុស អាយុ៦៧ឆ្នាំ សញ្ជាតិខ្មែរ មានប្រពន្ធឈ្មោះ ផ្លាត ស៊ីន អាយុ៣៩ឆ្នាំ សញ្ជាតិខ្មែរ បច្ចុប្បន្នរស់នៅភូមិវត្តស្វាយ សង្កាត់សាលាកំរើកក្រុងសៀមរាប ខេត្តសៀមរាប។
ភាគហ៊ុនមួយទៀត គឺលោក អូម រុន ភេទប្រុស អាយុ៦២ឆ្នាំ សញ្ជាតិខ្មែរ មានប្រពន្ធឈ្មោះ ស៊ីក កឹង អាយុ៥៣ឆ្នាំ សញ្ជាតិខ្មែរ បច្ចុប្បន្នរស់នៅបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប។
ម្ចាស់ភាគហ៊ុនទាំង២ខាងលើនេះ បានប្តឹងផ្តល់គ្នាទៅវិញទៅមកក្នុងប្រព័ន្ធផ្លូវច្បាប់នៅតុលាការអស់រយៈពេល១៧ឆ្នាំមកហើយ ដោយគ្មានអ្នកណាឈ្នះ ដោយគ្មានអ្នកណាចាញ់ឡើយ ។ ហើយម្នាក់ៗបានត្រឹមតែនៅសេសសល់គូថខោរៀងៗខ្លួន ទើបងាកមកធ្វើការសម្របសម្រួលគ្នានៅក្នុងមូលរដ្ឋានស្រុកអន្លង់វែង ក្រៅប្រព័ន្ធតុលាការវិញ ចំណែកទ្រព្យសម្បត្តិនៅសល់លើទីផ្សារ គឺបែកចែកដោយស្មើភាពគ្នា ដូចពាក្យស្លោកចាស់បុរាណបានពោលថា «កុំធ្វើស្រែប្រវ៉ាស់ និងកុំសាងសង់ផ្ទះជាមួយគ្នា»។
លោក ងួន ទ្ធិរិទ្ធ អភិបាលស្រុកអន្លង់វែង នៅរសៀលថ្ងៃទី២៦ ខែកុម្ភៈ ឆ្នាំ២០២៣នេះ បានឲ្យដឹងថា រឿងរ៉ាវទីផ្សារអន្លង់វែងថ្មី មានជម្លោះដ៏រ៉ាំរ៉ៃអស់រយៈពេល១៧ឆ្នាំ រវាងភាគហ៊ុនលោកសេង ស៊ន់ និងលោក អូម រុន បានប្តឹងផ្តល់គ្នាទៅតុលាការទៅវិញទៅមកមិនចេះចប់ ធ្វើឲ្យក្រុមអាជីវករទិញដីក្នុងផ្សារមួយចំនួនធំមិនអាចធ្វើសំណង់ ឬយកទៅដាក់ធានាគារបានឡើយ ព្រោះជាប់ដីការក្សាការពារ ។
មិនតែប៉ុណ្ណោះ មន្ត្រីសាលាស្រុក លោកមេឃុំ ក្រុមប្រឹក្សាឃុំលោកមេភូមិ សរុបចំនួន៦នាក់ ក៏ត្រូវបានក្រុមហ៊ុនប្តឹងទៅតុលាការ និងទាមទារសំណងរាប់រយលាន ក្រោយពីលោក ងួន ទ្ធីរិទ្ធ ឡើងកាន់តំណែងជាអភិបាលនៃគណៈអភិបាលស្រុកអន្លង់វែង បានរយៈពេល៣ខែ ដោយមានការចង្អុលបង្ហាញ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី ប្រធានក្រុមការងារថ្នាក់ជាតិ ចុះជួយមូលដ្ឋានខេត្តឧត្តរមាជ័យ និងឯកឧត្តម ប៉ែន កុសល្យ អភិបាល នៃគណៈអភិបាលខេត្ត លោកងួន ទ្ធីរិទ្ធ បានរិះរកគ្រប់មធ្យោបាយដើម្បីបញ្ចប់ទំនាស់ដ៏យូរអង្វែងនេះ ដោយស្នើសុំអោយភាគីទាំងពីរដោះស្រាយរឿងក្រៅប្រព័ន្ធតុលាការ។ លុះថ្ងៃទី២២ ខែធ្នូ ឆ្នាំ២០២២ ឯកឧត្តម អ៊ំ ចាន់ថុល ប្រធានតុលាការខេត្តឧត្តរមានជ័យ បានចេញដីកាសម្រេចតាមការស្នើសុំរបស់សាលាស្រុកអន្លង់វែង។
លោកអភិបាលស្រុកបានបញ្ជាក់ថា នៅវេលាម៉ោង៨និង៣០នាទីព្រឹក ថ្ងៃទី២៣ ខែកុម្ភៈ ឆ្នាំ២០២២ លោកបានដឹកនាំកិច្ចប្រជុំគណៈកម្មការបែកចែកទ្រព្យសម្បត្តិក្រុមហ៊ុនសេងស៊ន់ ជូនភាគីពាក់ព័ន្ធ ដើម្បីពិនិត្យពិភាក្សាអំពីនីតិវិធីផ្ទៀងផ្ទាត់ និងបែងចែក។ លុះថ្ងៃរសៀល លោក ងួន ទ្ធីរិទ្ធ អភិបាល នៃគណៈអភិបាលស្រុក បានដឹកនាំគណៈកម្មការបែកចែកទ្រព្យសម្បត្តិក្រុមហ៊ុនសេងស៊ន់ ចុះវាស់វែងផ្ទៀងផ្ទាត់ជាក់ស្តែងលើទីតាំងទ្រព្យសម្បត្តិក្រុមហ៊ុន ដើម្បីធ្វើការបែងចែកជូនភាគីពាក់ព័ន្ធ។ ខណៈពេលនេះក្នុងការដោះស្រាយរបស់ក្រុមការងារគណៈកម្មកាមូលរដ្ឋានស្រុក បានត្រឹមតែទទួលផ្លែផ្កា៧០ភាគរយប៉ុណ្ណោះ៕
ចែករំលែកព័តមាននេះ