ឃាត់ខ្លួនក្រុមជួញដូរគ្រឿងញៀ.ន៣នាក់ បញ្ជូនទៅតុលាការ
ខេត្តសៀមរាប ៖ កម្លាំងការិយាល័យប្រឆាំងគ្រឿងញៀ.នខេត្ត សហការជាមួយកម្លាំងអធិការនគរបាលស្រុកជីក្រែង
ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនខេត្ត សហការជាមួយកម្លាំងអធិការនគរបាលស្រុកជីក្រែង ចុះបង្ក្រាបករណី រក្សាទុក និងជួញដូរដោយខុសច្បាប់នូវសារធាតុញៀន ឈានដល់ធ្វើការឃាត់ខ្លួនបានជនសង្ស័យ៣នាក់ រួមនឹងវត្ថុតាង បញ្ជូនមកកាន់ការិយាល័យជំនាញ ដើម្បីរៀបចំសំណុំរឿងបញ្ជូនទៅតុលាការ។ ហេតុការចុះប្រតិបត្តិការបង្ក្រាបករណីជួញដូរនោះធ្វើឡើងនៅវេលាម៉ោង១១យប់ ថ្ងៃទី១៧ ខែសីហា ឆ្នាំ២០១៧ ស្ថិតនៅភូមិថ្នល់ដាច់ ឃុំសង្វើយ ស្រុកជីក្រែង ខេត្តសៀមរាប។
លោកវរសេនីយ៍ទោ ណាម ណម នាយរងការិយាល័យនគរបាលប្រឆាំងគ្រឿងញៀនខេត្ត បានប្រាប់ឱ្យដឹងថា ជនសង្ស័យចំនួន៣នាក់នោះមាន ទី១/ឈ្មោះ នៀ ស៊ីណា ហៅអ៊ុយ ភេទប្រុស អាយុ១៧ឆ្នាំ មុខរបរគ្មាន ទីលំនៅភូមិប្រាសាទ ឃុំកំពង់ក្តី ស្រុកជីក្រែង ខេត្តសៀមរាប(រក្សាទុក និងជួញដូរ មានសារធាតុញៀនក្នុងខ្លួន) ទី២/ឈ្មោះ តេះ ប៊ុនធឿន ភេទប្រុស អាយុ២២ឆ្នាំ មុខរបរគ្មាន ទីលំនៅភូមិប្រាសាទ ឃុំកំពង់ក្តី ស្រុកជីក្រែង ខេត្តសៀមរាប(ចាត់ចែង មានសារធាតុញៀនក្នុងខ្លួន) និងទី៣/ឈ្មោះ មេន បូរី ភេទប្រុស អាយុ២៦ឆ្នាំមុខរបរគ្មាន ទីលំនៅភូមិត្រពាំងត្រាវ ឃុំគោកធ្លកក្រោម ស្រុកជីក្រែង ខេត្តសៀមរាប(ចាត់ចែងមានសារធាតុញៀនក្នុងខ្លួន)។
បន្ទាប់ពីកម្លាំងជំនាញបានឃាត់ខ្លួន រួមទាំងដកហូតបានវត្ថុតាងមាន ម្សៅមេតំហ្វេតាមីន១០កញ្ចប់តូច ទូរស័ព្ទដៃចំនួន៥គ្រឿង ម៉ូតូចំនួន១គ្រឿង។ បច្ចុប្បន្ន ជនសង្ស័យទាំង៣នាក់ និងវត្ថុតាង ត្រូវបានកម្លាំងការិយាល័យប្រឆាំងគ្រឿងញៀនខេត្ត កំពុងរៀបចំកសាងសំណុំរឿង បញ្ចូនទៅសាលាដំបូង នៅថ្ងៃទី១៩ ខែសីហា ឆ្នាំ២០១៧ ដើម្បីចាត់ការតាមនីតិវិធី៕
ចែករំលែកព័តមាននេះ