ចាយលុយរដ្ឋមិនត្រូវតាមខ្ទង់ ត្រូវតែសងមកវិញ និងមានទោស
រាជធានីភ្នំពេញ ៖ លោក កើត ឆែ អភិបាលរងរាជធានីភ្នំពេញ បានបញ្ជាក់ថា ការចាយលុយរដ្ឋមិនត្រូវតាមខ្ទង់នៃគម្រោងអភិវឌ្ឍសង្កាត់
រាជធានីភ្នំពេញ ៖ លោក កើត ឆែ អភិបាលរងរាជធានីភ្នំពេញ បានបញ្ជាក់ថា ការចាយលុយរដ្ឋមិនត្រូវតាមខ្ទង់នៃគម្រោងអភិវឌ្ឍសង្កាត់ ខណ្ឌ មិនត្រឹមតែសងលុយរដ្ឋត្រលប់មកវិញទេ គឺត្រូវមានទោសទណ្ឌថែមទៀត ដូច្នេះលោកស្នើឲ្យថ្នាក់សង្កាត់ ខណ្ឌត្រូវចេះចាយលុយទាំងនោះឲ្យបានត្រឹមត្រូវតាមខ្នង់ចំណាយឲ្យបានច្បាស់លាស់។ លោក កើត ឆែ មានប្រសាសន៍បែបនេះកាលពីព្រឹកថ្ងៃទី១៧ សីហា ឆ្នាំ២០១៧ នៅសាលារាជធានីភ្នំពេញ ក្នុងពិធីផ្សព្វផ្សាសារាចរណ៍ណែនាំស្តីពីនីតិវិធីបច្ចេកទេសនៃការរៀបចំគម្រោងថវិការបស់រដ្ឋបាលថ្នាក់ក្រោមជាតិឆ្នាំ២០១៨ ដោយមានការចូលរួមពីមន្ត្រីក្រសួងហិរញ្ញវត្ថុ ស្មៀនសង្កាត់ទាំង១០៥ អភិបាលរងខណ្ឌទាំង១២ ដែលទទួលបន្ទុក និងមន្ត្រីការិយាល័យរដ្ឋបាលហិរញ្ញវត្ថុផងដែរ។
លោកបន្តថា ការរៀបចំថវិកាប្រចាំឆ្នាំគឺជាដំណើរដ៏ស្មុគស្មាញ និងវែងឆ្ងាយដែលទាមទារឲ្យទាំងអ្នករៀបចំ អ្នកទទួលខុសត្រូវទាំងអស់ មានភាពអត់ធ្មត់ជាអតិបរិមា ទើបការរៀបចំប្រព្រឹត្តិទៅបានជោគជ័យនិងទាន់ពេលវេលា។ ដូច្នេះរដ្ឋបាលថ្នាក់ក្រោមជាតិក្រោយពីអនុម័តថវិការួចត្រូវបញ្ជូនទៅក្រសួងសេដ្ឋកិច្ចនិងហិរញ្ញវត្ថុ បន្ទាប់មកបន្តបញ្ជូនទៅក្រសួងមហាផ្ទៃ រួចដាក់ឆ្លងរដ្ឋសភាជាតិ ដើម្បីអនុម័ត និងផ្តល់សេចក្តីទុកចិត្ត ហើយចុងក្រោយថ្វាយព្រះមហាក្សត្រ ទើបអាចចេញជាសៀវភៅថវិកាប្រចាំឆ្នាំ។ លោកអភិបាលរងស្នើឱ្យមន្ត្រីពាក់ព័ន្ធទាំងអស់ត្រូវយកចិត្តទុកដាក់ ស្តាប់មន្ត្រីជំនាញមកពីក្រសួងសេដ្ឋកិច្ច និងហិរញ្ញវត្ថុ ប្រសិនបើមានអ្វីមិនយល់ត្រូវសួរនាំ ឱ្យមន្ត្រីបកស្រាយឱ្យបានច្បាស់លាស់ជូន ចៀសវាងរៀបចំថវិកាចាយមិនបានទាន់ពេលវេលា។
លោកអភិបាលរងបញ្ជាក់ទៀតថា កន្លងមកការរៀបចំនេះ មានអ្នកជួយច្រើនតាំងពីខាងក្រសួងសេដ្ឋកិច្ច ខាងទីចាត់ការហិរញ្ញវត្ថុ ហើយថវិកានេះតែងតែមានការប្រែប្រួលជារៀងរាល់ឆ្នាំ នូវរបៀបរបរនៃការចងក្រង។ ដូច្នេះរៀងរាល់ឆ្នាំក្រសួងតែងតែបញ្ជូនមន្ត្រីជំនាញមកធ្វើការបណ្តុះបណ្តាលតាមសង្កាត់ ពិសេសស្មៀន ដែលជាគោលដៅ ហើយស្មៀនភាគច្រើនបានទទួល ការបណ្តុះបណ្តាលនេះរួចហើយមិនមានបញ្ហាទេ តែសុំយកចិត្តទុកដាក់អ្វីថ្មីដែលមន្ត្រីក្រសួងបានផ្តល់ជូននៅពេលនេះ ឬអាចសួរតាមទូរស័ព្ទផ្ទាល់ ជាពិសេសគឺស្មៀនតែម្តងត្រូវយកចិត្តទុកដាក់ជាងគេ ព្រោះរាល់កិច្ចការអភិវឌ្ឍ និងធ្វើផែនការថវិកា និងធានានូវនិរន្តរភាព អព្យាក្រិត្យភាព នៃរដ្ឋបាលសាធារណៈនោះ ដែលជាការងារចាំបាច់របស់ស្មៀនតែម្តង៕
ចែករំលែកព័តមាននេះ