វិស័យឯកជនស្នើរដ្ឋាភិបាលលុបបំបាត់ការនាំចូលផលិតផលជជុះ
រាជធានីភ្នំពេញ ៖ អ្នកជំនាញក្នុងវិស័យឯកជនបានស្នើឲ្យរាជរដ្ឋាភិបាលលុបបំបាត់ការនាំចូលផលិតផលប្រើប្រាស់ជជុះដូចជា ទូទឹកកក ទូរទស្សន៍ និងម៉ាស៊ីនបោកសម្លៀកបំពាក់ ដើម្បី
រាជធានីភ្នំពេញ ៖ អ្នកជំនាញក្នុងវិស័យឯកជនបានស្នើឲ្យរាជរដ្ឋាភិបាលលុបបំបាត់ការនាំចូលផលិតផលប្រើប្រាស់ជជុះដូចជា ទូទឹកកក ទូរទស្សន៍ និងម៉ាស៊ីនបោកសម្លៀកបំពាក់ ដើម្បីកាត់បន្ថយផលប៉ះពាល់បរិស្ថាន ។
លោកឧកញ៉ា សុខ ពិសិដ្ឋ អគ្គនាយកក្រុមហ៊ុន G Gear ដែលបាននាំចូលផលិតផល LG ពីប្រទេសកូរ៉េ បានថ្លែងតាមទូរស័ព្ទនារសៀលថ្ងៃទី២ សីហា ថា ដើម្បីកាត់បន្ថយផលប៉ះពាល់បរិស្ថានធ្ងន់ធ្ងរនាពេលអនាគត និងកាកសំណល់រឹងនានា រាជរដ្ឋាភិបាលគួរលុបចោលការនាំចូលផលិតផលប្រើប្រាស់ជជុះ ដើម្បីលើកកម្ពស់បរិស្ថាន និងលុបបំបាត់ការប្រកួតប្រជែងមិនស្មើភាពគ្នា ព្រោះមានឈ្មួញមួយចំនួនបាននាំចូលផលិតផលថ្មី ប៉ុន្តែដាក់ជាផលិតផលជជុះដើម្បីគេចពីការបង់ពន្ធ ។
លោកបន្តថា ៖« ដើម្បីឲ្យផលិតផលជជុះបាត់ពីទីផ្សារ ទាល់តែរដ្ឋាភិបាលមានគោលនយោបាយច្បាស់លាស់លុបបំបាត់ការនាំចូលផលិតផលជជុះ និងទម្លាក់ពន្ធលើផលិតផលថ្មីនាំចូល » ។ លោកបន្តថា ៖« ទោះជាយ៉ាងណា ប្រជាជនបច្ចុប្បន្នបានងាកមកប្រើប្រាស់ផលិតផលថ្មីកាន់តែច្រើន ដោយសារវាមានតម្លៃសមរម្យ គុណភាពល្អ និងមិនបំពុលបរិស្ថាន » ។
លោកឧកញ៉ា សុខ ពិសិដ្ឋ បន្ថែមថា បច្ចុប្បន្ន ផលិតផលជជុះមិនសូវមានទីផ្សារទេ ហើយការលក់ផលិតផលថ្មី ក៏បានកើនឡើងស្ទើរគ្រប់ផ្នែកផងដែរ ។
ម្ចាស់ហាងលក់សម្ភារលំនៅឋានចម្រុះដូចជា ទូទឹកកក ម៉ាស៊ីនត្រជាក់ និងម៉ាស៊ីនបោកគក់សម្លៀកបំពាក់ យីហោ ឈុន លាភ ស្ថិតនៅតាមបណ្តោយមហាវិថីព្រះសីហនុ ក្បែរផ្សារអូឡាំពិក បាននិយាយក្នុងលក្ខខណ្ឌមិនបញ្ចេញឈ្មោះថា ផលិតផលជជុះនឹងអាចបាត់បង់ពីទីផ្សារនៅរយៈពេល១០ឆ្នាំខាងមុខនេះ ព្រោះបច្ចុប្បន្នអ្នកសួររកទិញផលិតផលជជុះមានប្រមាណ២០%ប៉ុណ្ណោះ ដោយសារប្រជាពលរដ្ឋកាន់តែយល់ដឹង ហើយផលិតផលថ្មីក៏មានតម្លៃសមរម្យផងដែរ ។
ម្ចាស់ហាងដដែលបន្តថា ផលិតផលជជុះ និងថ្មីខ្លះមានតម្លៃមិនខុសគ្នាខ្ពស់ពេកទេ។ ហេតុនេះ ការលក់ផលិតផលជជុះបានធ្លាក់ចុះច្រើននាពេលបច្ចុប្បន្ន ព្រោះនិន្នាការប្រើប្រាស់ផលិតផលថ្មីៗបានកើនឡើង ។ អ្នកស្រីបន្តថា បច្ចុប្បន្ន សូម្បីតែហ្គាស ម៉ាស៊ីនត្រជាក់ ក៏គេប្រើប្រាស់ប្រភេទហ្គាសល្អ ដែលមិនផលប៉ះពាល់ដល់បរិស្ថានផងដែរ ។
ស្ត្រីរូបនេះបន្តថា អ្នកប្រើប្រាស់ផលិតផលជជុះមួយចំនួនមិនសូវមានការយល់ដឹង ហើយអ្នកខ្លះក៏បាននិយាយថា ផលិតផលជជុះ ក៏មានគុណភាពល្អផងដែរ ជាពិសេស ម៉ាស៊ីនត្រជាក់ ។
លោកឧកញ៉ា សុខ ពិសិដ្ឋ បន្ថែមថា ការកើនឡើងនូវជីវភាពប្រជាពលរដ្ឋ បានធ្វើឲ្យពួកគេមានលទ្ធភាពប្រើប្រាស់ផលិតផលថ្មីកាន់តែច្រើន ។ ហេតុនេះ ការលុបបំបាត់ការនាំចូលផលិតផលជជុះ ជារឿងចាំបាច់ដើម្បីលើកកម្ពស់បរិស្ថាន និងបញ្ចៀសហានិភ័យនៃបរិស្ថាននាពេលអនាគត ។
លោកបន្តថា ៖« ផលិតផលជជុះ មិនត្រឹមតែបង្កផលប៉ះពាល់បរិស្ថានទេ តែវាក៏បានបង្កើនការចំណាយរបស់អ្នកប្រើប្រាស់ផងដែរ ព្រោះផលិតផលទាំងនោះជារបស់ចាស់ និងស៊ីភ្លើងច្រើន » ៕
ចែករំលែកព័តមាននេះ