រាជធានីភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ បានធ្វើការបដិសេធ ចំពោះផ្សាយរបស់វិទ្យុសហរដ្ឋអាមេរិក (VOA) ថាមានចេតនានយោបាយកខ្វក់ ចង់បំបែកបំបាក់ទំនាក់ទំនងរវាងកម្ពុជា- ចិន ។
អ្នកនាំពាក្យក្រសួងការបរទេសកម្ពុជា លោក អាន សុខខឿន បានឲ្យដឹងនៅថ្ងៃទី៦ ខែកុម្ភៈ ឆ្នាំ២០២៣ បានបកស្រាយបំភ្លឺចំពោះអត្ថបទសារព័ត៌មានរបស់វិទ្យុសំឡេងសហរដ្ឋអាមេរិក (VOA) ដែលបានចុះផ្សាយកាលពីថ្ងៃទី០៤ ខែកុម្ភៈ ឆ្នាំ២០២៣ ក្រោមចំណងជើងថា “កម្ពុជាស្វែងរកជំនួយបន្ថែមពីចិន ខណៈមានការព្រួយបារម្ភ អំពី«អន្ទាក់បំណុល»” ថាអត្ថបទខាងលើផ្សាយព័ត៌មានខុសពីការពិត និងបំភាន់សាធារណជន ក្រោមហេតុផលនយោបាយ ។
អ្នកនាំពាក្យក្រសួងការបរទេសកម្ពុជា បានធ្វើការបកស្រាយបំភ្លឺលើអត្ថបទខាងលើ ចំនួនបីចំណុចសំខាន់ៗថា ការថ្លែងថា ទស្សនកិច្ចនៅប្រទេសចិន របស់សម្តេចតេជោ ហ៊ុន សែន នៅសប្តាហ៍ក្រោយធ្វើឡើង “ដោយសម្លឹងមើលកម្ចី ដើម្បីសាងសង់ផ្លូវរថភ្លើងល្បឿនលឿន ” គឺជាព័ត៌មានខុសពីការពិត ។ ការពិត គឺគម្រោងនេះ នឹងមិនត្រូវគាំទ្រដោយប្រាក់កម្ចីទេ។ គម្រោង នេះ គឺបើកផ្លូវជូនដល់ការវិនិយោគ ក្នុងរូបភាព BOT (Build, Operate and Transfer) ។ ចំពោះរបាយការណ៍របស់ VOA មិនត្រឹមតែពុំមានលក្ខណៈវិជ្ជាជីវៈទេ គឺថែមទាំងបំភាន់សាធារណមតិ ដើម្បីបម្រើនយោបាយ។ ពុំមានលក្ខណៈ វិជ្ជាជីវៈ ព្រោះអ្នករាយការណ៍ VOA ពុំបានផ្ទៀងផ្ទាត់ប្រភពព័ត៌មានរបស់ខ្លួន។ នេះគឺជាឧទាហរណ៍មួយ ក្នុងចំណោមឧទាហរណ៍ ជាច្រើនទៀត ដែលបង្ហាញពីគុណភាពទាបរបស់អ្នកសារព័ត៌មាន VOA ។ បំភាន់សាធារណមតិ ក្រោមហេតុផលនយោបាយ ព្រោះអត្ថបទនេះ សរសេរឡើងដោយមានចេតនា តែម្តង។
អ្នកនាំពាក្យ បានលើកឡើងទៀតថា កន្លងមក សម្តេចតេជោ ហ៊ុន សែន និងរដ្ឋមន្ត្រីផ្សេងៗ បានផ្តល់ការពន្យល់ជាច្រើនលើក ច្រើនសារ ចំពោះគម្រោងនេះ។ រាជរដ្ឋាភិបាល ពុំមានបំណងខ្ចីប្រាក់ពីបរទេស ឲ្យច្រើនលើសលុបទេ។ រាជរដ្ឋាភិបាលមានភាពម៉ឺងម៉ាត់ ក្នុងការគ្រប់គ្រងបំណុលបរទេស និងផ្តល់អាទិភាពសម្រាប់តែគម្រោងហេដ្ឋារចនាសម្ព័ន្ធ ដែលបន្ទាន់ និងចាំបាច់ ដូចជាផ្លូវថ្នល់។
ជាមួយគ្នានោះដែរអ្នកនាំពាក្យដដែល បានលើកឡើងថា អ្នកសារព័ត៌មាន VOA បានព្រងើយកន្តើយ ដោយចេតនា ចំពោះការពន្យល់ទាំងអស់នោះ និងបន្តប្រើប្រាស់នយោបាយកខ្វក់ (dirty politics) ចំពោះ ទំនាក់ទំនងកម្ពុជា-ចិន ។
បើតាមកាអះអាងរបស់អ្នកនាំពាក្យក្រសួងបរទេសកម្ពុជា ថា កម្ពុជាសូមស្វាគមន៍រាល់ការវិនិយោគលើគម្រោងនេះ ក្នុងរូបភាពជា BOT (Build, Operate and Transfer)។
សូមជម្រាបថា ការលើកឡើងរបស់អ្នកនាំពាក្យក្រសួងការបរទេស បន្ទាប់ពីវិទ្យុសហរដ្ឋអាមេរិកមួយនេះ បានចេញផ្សាយនូវអត្ថបទមួយមានចំណងជើងថា «កម្ពុជាស្វែងរកជំនួយបន្ថែមពីចិន ខណៈមានការព្រួយបារម្ភអំពី “អន្ទាក់បំណុល”» ។
ក្រសួងការបរទេសថា អត្ថបទនេះ បានចោទប្រកាន់លើគម្រោងដំណើរទស្សនកិច្ចរបស់ ប្រមុខរាជរដ្ឋាភិបាលកម្ពុជាថា «សម្លឹងមើលកម្ចីទឹកប្រាក់ជាង៤ពាន់លានដុល្លារ ដើម្បីសាងសង់ផ្លូវរថភ្លើងល្បឿនលឿន ដែលភ្ជាប់ពីទីក្រុងភ្នំពេញទៅកាន់ ទីក្រុងប៉ោយប៉ែត នៃខេត្តបន្ទាយមានជ័យ»៕
ចែករំលែកព័តមាននេះ