គ្រាន់តែរាំតាមដងផ្លូវសោះ គូស្នេហ៍១គូ ត្រូវកាត់ទោសជាប់ពន្ធនាគារ១០ឆ្នាំ
អ៊ីរ៉ង់ ៖ គូស្នេហ៍វ័យក្មេងជនជាតិអ៊ីរ៉ង់មួយគូ ត្រូវបានកាត់ទោសឱ្យជាប់ពន្ធនាគាររយៈពេល ១០ឆ្នាំ
អ៊ីរ៉ង់ ៖ គូស្នេហ៍វ័យក្មេងជនជាតិអ៊ីរ៉ង់មួយគូ ត្រូវបានកាត់ទោសឱ្យជាប់ពន្ធនាគាររយៈពេល ១០ឆ្នាំ បន្ទាប់ពីការបង្ហោះវីដេអូរបស់ពួកគេរាំនៅតាមផ្លូវ។ នេះបើយោងតាមប្រភពពីសារព័ត៌មាន BBC ចេញផ្សាយកាលពីថ្ងៃទី៣១ ខែមករា កន្លងទៅ។
គូស្នេហ៍មួយគូនេះ ត្រូវបានកាត់ទោសពីបទផ្សព្វផ្សាយអំពើពុករលួយ ពេស្យាចារ និងការឃោសនាមិនត្រឹមត្រូវ ដោយក្នុងខ្សែអាត់វីដេអូបង្ហាញពីសកម្មភាពពួកគេរាំនៅទីតាំងវិមានសេរីភាព Azadi នៅក្នុងរដ្ឋធានី Tehran ។
អ៊ីរ៉ងកំពុងអនុវត្តច្បាប់ដ៏តឹងរឹងរបស់ខ្លួន ដោយអាជ្ញាធរកំពុងកាត់ទោសយ៉ាងធ្ងន់ធ្ងរ ដល់ជនណា ដែលរកឃើញថា ជាប់ពាក់ព័ន្ធការតវ៉ាប្រឆាំងនឹងរដ្ឋាភិបាល ដែលផ្តើមចេញពីករណីរបស់នាង Mahsa Amini អាយុ២២ឆ្នាំ ដែលស្លា.ប់បាត់បង់ជីវិត បន្ទាប់ពីត្រូវបានចាប់ខ្លួន និងឃុំខ្លួន ដោយប៉ូលិសសីលធម៌របស់រដ្ឋ លើបទចោទប្រកាន់ថា មិនបានពាក់កន្សែងរុំក្បាល Hijab របស់នាងឱ្យបានត្រឹមត្រូវ។
ប្រភពមួយបញ្ជាក់ប្រាប់សារព័ត៌មាន BBC ថា ការចាប់ខ្លួនគូស្នេហ៍មួយគូនេះ បានកើតឡើង បន្ទាប់ពីពួកគេបង្ហោះវីដេអូសកម្មភាពរាំនោះ ទៅក្នុងគណនី Instagram របស់ពួកគេ ដែលមានអ្នកតាមដានសរុបជិត ២លាននាក់។ ប៉ុន្តែទោះយ៉ាងណា គូស្នេហ៍មួយគូនេះ បានលើកឡើងថា ពួកគេមិនបានផ្សារភ្ជាប់ការរាំ ទៅនឹងការតវ៉ាប្រឆាំងរដ្ឋាភិបាល ដែលកំពុងបន្តនៅក្នុងប្រទេសអ៊ីរ៉ង់នោះទេ។
នាង Astiazh Haqiqi អាយុ ២១ឆ្នាំ និងគូដណ្តឹងនាង លោក Amir Mohammad Ahmadi អាយុ ២២ឆ្នាំ ត្រូវបានកាត់ទោសពីបទលើកកម្ពស់អំពើពុករលួយ ពេស្យាចារ ឃុបឃិតប្រឆាំងនឹងសន្តិសុខជាតិ និងការឃោសនាប្រឆាំងរដ្ឋាភិបាល។ វាមិនច្បាស់ថា ការកាត់ទោសពួកគេមានរយៈពេលប៉ុន្មានឆ្នាំ សម្រាប់ការផ្តន្ទាទោសនីមួយៗ ដែលពួកគេកំពុងប្រឈមមុខ ប៉ុន្តែប្រភពស្និតបានរាយការណ៍ថា ពួកគេម្នាក់ៗ នឹងត្រូវបានកាត់ទោសឱ្យជាប់ពន្ធនាគារសរុប ១០ឆ្នាំកន្លះ ដែលជាការកាត់ទោសរួមបញ្ចូលគ្នា សម្រាប់ការចោទប្រកាន់របស់ពួកគេ។
យ៉ាងណាមិញ ប្រសិនបើសាលក្រមគូស្នេហ៍មួយគូនេះ ត្រូវបានតម្កល់ នោះពួកគេនឹងត្រូវបម្រើការងារសង្គមរយៈពេលវែងបំផុត ក្នុងចំណោមការកាត់ទោសទាំងនោះ។ បន្ថែមលើសពីនេះ ពួកគេក៏ត្រូវបានហាមឃាត់រយៈពេល២ឆ្នាំ លើការប្រើប្រាស់ប្រព័ន្ធផ្សព្វផ្សាយសង្គម និងការចាកចេញពីប្រទេសផងដែរ។
ការស្លា.ប់របស់នាង Mahsa Amini គឺជាកត្តាជំរុញឱ្យមានភាពចលាចលកាន់តែខ្លាំងឡើងក្នុងប្រទេសអ៊ីរ៉ង់ វាក៏ត្រូវបានជំរុញដោយការមិនពេញចិត្តជាយូរមកហើយ លើភាពក្រីក្រ ភាពអត់ការងារធ្វើ វិសមភាព អយុត្តិធម៌ និងអំពើពុករលួយ។ មនុស្សរាប់រយនាក់ត្រូវបានសម្លា.ប់ និងរាប់ពាន់នាក់ផ្សេងទៀត ត្រូវបានចាប់ខ្លួន អំឡុងពេលមានការធ្វើបាតុកម្មប្រឆាំងរដ្ឋាភិបាល ចាប់តាំងពីខែកញ្ញា ឆ្នាំ២០២២ ពោលគឺក្រោយការស្លា.ប់របស់នាង Mahsa Amini៕ (ដកស្រង់ចេញពី BBC)
ចែករំលែកព័តមាននេះ