សត្វខ្លាឈីតាអាហ្វ្រិក១២ក្បាល ត្រូវបញ្ជូនឱ្យឥណ្ឌាក្នុង១ឆ្នាំម្តង
អាហ្វ្រិកខាងត្បូង-ឥណ្ឌា ៖ អាហ្វ្រិកខាងត្បូង បានចុះហត្ថលេខាលើកិច្ចព្រមព្រៀងមួយ ដើម្បីផ្តល់ជូន
អាហ្វ្រិកខាងត្បូង-ឥណ្ឌា ៖ អាហ្វ្រិកខាងត្បូង បានចុះហត្ថលេខាលើកិច្ចព្រមព្រៀងមួយ ដើម្បីផ្តល់ជូន
អាហ្វ្រិកខាងត្បូង-ឥណ្ឌា ៖ អាហ្វ្រិកខាងត្បូង បានចុះហត្ថលេខាលើកិច្ចព្រមព្រៀងមួយ ដើម្បីផ្តល់ជូនសត្វខ្លាឈីតាអាហ្វ្រិក (Cheetah) រាប់សិបក្បាលទៅកាន់ប្រទេសឥណ្ឌា នៅក្នុងរយៈពេលមួយទសវត្សខាងមុខ។ នេះបើយោងតាមប្រភពពី BBC ចេញផ្សាយកាលពីថ្ងៃទី២៨ ខែមករា ឆ្នាំ២០២៣។
នាយកដ្ឋានបរិស្ថានអាហ្វ្រិកខាងត្បូង បានបញ្ជាក់ថា ការផ្តល់ជូនដំណាក់ដំបូងនៃសត្វខ្លាឈីតាអាហ្វ្រិកចំនួន ១២ក្បាល នឹងត្រូវបញ្ជូនទៅកាន់ប្រទេសឥណ្ឌានៅខែក្រោយ ហើយតាមគម្រោង អាហ្វ្រិកខាងត្បូងគ្រោងនឹងបញ្ជូលសត្វខ្លាប្រភេទនេះ ជាមួយចំនួនស្រដៀងគ្នា ជារៀងរាល់ឆ្នាំ សម្រាប់រយៈពេល ៨-១០ឆ្នាំ ខាងមុខ ដើម្បីជួយបង្កើតចំនួនពូជខ្លាឈីតា ដែលអាចឋិតថេរ និងមានសុវត្ថិភាព នៅឥណ្ឌា។
សត្វខ្លាឈីតាអាស៊ី បានផុតពូជនៅក្នុងប្រទេសឥណ្ឌា នៅចុងទសវត្សឆ្នាំ ១៩៤០ ដោយសារតែការបរបាញ់ច្រើនហួសហេតុ និងការបាត់បង់ទីជម្រក។ នៅក្នុងឆ្នាំ ២០២០ តុលាការកំពូលឥណ្ឌាបានសម្រេចថា សត្វខ្លាឈីតាអាហ្វ្រិក អាចត្រូវបាននាំយកមកក្នុងប្រទេសឥណ្ឌា នៅទីតាំងដែលបានជ្រើសរើស ដោយប្រុងប្រយ័ត្នបំផុត នៅលើមូលដ្ឋានពិសោធន៍។
ខ្លាឈីតាអាហ្វ្រិក ដែលត្រូវបានជ្រើសរើស បាននិងកំពុងរស់នៅក្នុងកន្លែងដាច់ដោយឡែក បន្ទាប់ពីការផ្លាស់ប្តូរដែលបានគ្រោងទុក កាលពីខែសីហា ឆ្នាំមុន ត្រូវបានពន្យារពេល ខណៈព័ត៌មានលម្អិតចុងក្រោយបានបញ្ជាក់ថា ភាគីទាំងពីរបានយល់ព្រមជាផ្លូវការ។ ហើយយោងតាមប្រភពពីទីភ្នាក់ងារសារព័ត៌មាន AFP បានរាយការណ៍ថា សត្វខ្លាឈីតា ដែលត្រូវដាក់នៅដាច់ដោយឡែកទាំងអស់ សុទ្ធតែមានសុខភាពល្អជាធម្មតា។
ប្រទេសឥណ្ឌា បានទទួលសត្វខ្លាឈីតាចំនួន ៨ក្បាល រួចទៅហើយ ពីប្រទេសណាមីប៊ី (Namibia) កាលពីឆ្នាំមុន ហើយពួកវាត្រូវបានដោះលែងនៅក្នុងឧទ្យានជាតិ Kuno នៃរដ្ឋ Madhya Pradesh ។
ឧទ្យានជាតិនេះ មានចម្ងាយប្រមាណ ៣២០គីឡូម៉ែត្រ ភាគខាងត្បូងនៃទីក្រុងញូដេលី (New Delhi) គឺជាជម្រកសត្វព្រៃ ដែលមានសត្វព្រៃ និងវាលស្មៅយ៉ាងសម្បូរបែប។ ប៉ុន្តែទោះជាយ៉ាងណាក៏ដោយ អ្នកអភិរក្សមួយចំនួនបានអះអាងថា ការផ្ទេរសត្វខ្លាឈីតា ប្រហែលជាមិនជោគជ័យនោះទេ ដោយសារតែតំបន់បម្រុងនៅជិតភូមិ មានប្រជាជនរស់នៅច្រើន៕ (ដកស្រង់ចេញពី BBC)
ចែករំលែកព័តមាននេះ