ខេត្តកំពង់ស្ពឺ ៖ ក្រោយពីវេបសាយកោះសន្តិភាពបានផ្សាយរឿងរណ្ដៅដីអត់ច្បាប់របស់លោកប៊ុត ចន្ថា ហៅម៉ៅ ឬឧកញ៉ាវត្តដែលជាទាហានសក្ដិ៥ នៅកាំភ្លើ.ងធំរួចមក ធ្វើឲ្យគាត់ដេកមិនលក់ បក់មិនល្ហើយ អង្គុយមិនស្រណុក ក៏បានប្រើកូនចៅរបស់ខ្លួនឲ្យមកជួបអ្នកព័ត៌មានយើងដើម្បីកែតម្រូវឡើងវិញ ដោយប្រាប់ថា គ្រឿងចក្រដែលកំពុងធ្វើសកម្មភាពនោះ ពុំមែនជារបស់ខ្លួននោះទេ។
ដោយឡែក យោងតាមប្រភពពីប្រជាពលរដ្ឋដែលរស់នៅភូមិត្រពាំងខ្យង ឃុំរលាំងគ្រើល បានប្រាប់នៅព្រឹកថ្ងៃទី២៨ ខែមករា ឆ្នាំ២០២៣ នេះថា ក្រោយពីមានការចេញផ្សាយរបស់វេបសាយកោះសន្តិភាពរួចមក លោក ប៊ុត ចន្ថា ហៅម៉ៅ បានប្រើកូនចៅរបស់ខ្លួនឲ្យយកគ្រឿងចក្រទៅលាក់ទុកនៅខាងត្បូងភូមិទាំងអស់ ដើម្បីគេចអោយផុតពីក្រសែភ្នែកសមត្ថកិច្ច និងគេចផុតពីការចុះត្រួតពិនិត្យ និងចាប់ឃាត់របស់សមត្ថកិច្ចជំនាញ ព្រមទាំងអាជ្ញាធរ ជាពិសេសជំនាញរ៉ែតែម្តង។
ការយកគ្រឿងចក្រទៅលាក់ទុកនេះ គ្រាន់តែជាការធ្វើអោយតែល្អមើលតែប៉ុណ្ណោះ ព្រោះបើយោងតាមប្រភដែលស្និទ្ធជាមួយនឹងលោក ប៊ុត ចន្ថា ហៅម៉ៅ ឬឧកញ៉ាវត្ត នេះមិនថា មន្ត្រីមូលដ្ឋាន ឬមន្ត្រីរ៉ែនោះទេ សុទ្ធតែជាកូនជឹងរបស់លោកឧកញ៉ារូបនេះទាងអស់។ លុះនាថ្ងៃទី២៨ ខែមករា ឆ្នាំ២០២៣នេះ អ្នកយកព័ត៌មានយើងមិនអាចសុំការពន្យល់ពីលោក ប៊ិញ ជីវតុង ប្រធានមន្ទីររ៉ែ និងថាមពល បានឡើយ។
ប្រភពដដែលបន្តថា ចំពោះគ្រឿងចក្រដែលធ្វើសកម្មភាពល្មើសច្បាប់ទាំងអស់នោះ អ្នកណាក៏ដឹងដែរថា ជារបស់លោក ប៊ុត ចិន្ថា ហៅម៉ៅ ឬឧកញ៉ាវត្តនេះដែរ។ ដោយពេលខ្លះ លោកបានទិញទឹកចិត្តទាំងមន្ត្រីជំនាញ ទាំងអាជ្ញាធរ ដើម្បីជាការបិទបាំងនូវអំពើរកស៊ីកិបកេងដោយមិនព្រមបង់ថវិកាចូលរដ្ឋ ដូចជាសួយសារជាដើម។
ប្រជាពលរដ្ឋជាច្រើនបានលើកឡើងថា ករណីកាយដីទាំងគ្មានច្បាប់អនុញ្ញាតបែបនេះ បើគ្មានបញ្ជាពីលោកអភិបាលខេត្តទេ អាជ្ញាធរថ្នាក់ក្រោមក៏មិនហ៊ានទៅបង្ក្រាបដែរ។ ហើយក្រុមប្រជាពលរដ្ឋមានការសង្ស័យថា អស់លោកទាំងអស់នោះ អាចត្រូវថ្នាំសណ្ដំរបស់លោក ប៊ុត ចន្ថា ហៅម៉ៅ ឬឧកញ៉ាវត្តនេះអស់ហើយ ទើបបានជាស្ងាត់ស្ងៀមបែបនេះ។
ពាក់ព័ន្ធនឹងករណីខាងលើនេះដែរ លោក ស្វាយ សារុន អភិបាលរងស្រុកសំរោងទង បានបញ្ជាក់ប្រាប់នៅរសៀលថ្ងៃទី២៨ ខែមករា ឆ្នាំ២០២៣នេះផងដែរថា ជានិច្ចកាលខេត្ត ចេញអាជ្ញាប័ណ្ណឲ្យត្រឹមមួយហិចតាចុះតែប៉ុណ្ណោះ លើសពីនឹងត្រូវឆ្លងទៅក្រសួង ដោយឡែករណ្ដៅដែលលោក ប៊ុត ចន្ថា ហៅម៉ៅ មានទំហំប៉ុណ្ណានោះ លោកពុំបានដឹងទេ ទាល់តែជំនាញរ៉ែទើបដឹង លោកគ្រាន់តែដឹងថា បច្ចុប្បន្ន មានអ្នករត់ការសុំច្បាប់អាជីវកម្មកាយអាចម៍ដី តែមិនទាន់ត្រូវបានអនុញ្ញាតនៅឡើយ។
លោក ស្វាយ សារុន បានបន្តថា រណ្ដៅចាស់ គឺនៅជំពាក់វាក់វិនសួយសារត្រូវបង់ឲ្យរដ្ឋ ដូច្នេះរដ្ឋតម្រូវឲ្យអ្នកដែលសុំអាជ្ញាប័ណ្ណថ្មី ត្រូវបន្តបង់សួយសារជូនរដ្ឋជាមុនសិន ទើបអាចធ្វើសកម្មភាពការយកអាចម៍ដីទៅលក់បន្តបានអ្វីដែលលោកដឹង គឺអាជ្ញាប័ណ្ណមួយហិចតាចុះក្រោម គឺខេត្តអនុញ្ញាត លើសពីនេះត្រូវសុំទៅក្រសួង។
ពាក់ព័ន្ធនឹងករណីនេះផងដែរ អ្នកហែកបុងប្រចាំរណ្ដៅដីមួយរូបឈ្មោះភ័ក្របានបញ្ជាក់ប្រាប់ថាគឺគ្រឿងចក្រទាំងអស់ជារបស់មេខ្លួនឧកញ៉ាម៉ៅឬឧកញ៉ាវត្តចំពោះសកម្មភាពកាយដីនេះគឺកាយបណ្ដើររត់ការបណ្ដើរ។ សូមរំលឹកថា មេឈ្មួញរកស៊ីកាយអាចដីកំពុងប្រើអំណាចជាទាហានរបស់ខ្លួននៅកងកាំភ្លើ.ងដែលគេដឹងថា មានលុយកាក់ដ៏មហាសាលរកស៊ីបំពានច្បាប់រាល់ដងមិនដែលបង់សួយសារជូនរដ្ឋនោះឡើយ។ សូម្បីតែអាជ្ញាធរភូមិ-ឃុំ-ស្រុក ជាពិសេសគឺជំនាញរ៉ែតែម្ដង មិនហ៊ានទៅជិតឡើយ ព្រោះគេខ្លាចអំណាចមេឈ្មួញរូបនេះ ដែលជាទាហាននៅកងកាំភ្លើ.ងធំឈ្មោះ ប៊ុត ចន្ថា ហៅម៉ៅ ឬឧកញ៉ាវត្ត ដ៏មានឥទ្ធិពលផ្នែកខាងរកស៊ីកាយអាចម៍ដី ដោយពុំចាំបាច់មានច្បាប់នោះទេ ដោយរូបគេគ្រាន់តែប្រើអំណាចទាហានរបស់ខ្លួនតែប៉ុណ្ណោះ គឺអាចកាយអាចម៍ដីដឹកយកទៅលក់បានហើយ។
ជាក់ស្ដែង រណ្តៅកាយអាចម៍ដីដ៏សែនធំហើយជ្រៅមួយស្ថិតនៅភូមិក្រងស្ពឺ ឃុំរលាំងចក ជាប់នឹងភូមិត្រពាំងខ្យង ឃុំរលាំងគ្រើល ស្រុកសំរោងទង ខេត្តកំពង់ស្ពឺ។ តាមការបង្ហើប គឺឈ្មួញរកស៊ីកាយអាចម៍ដីរូបនេះ កំពុងធ្វើអាជីវកម្ម ដោយពុំមានការអនុញ្ញាត ឬលិខិតបញ្ជាក់ពីមន្ទីររ៉ែថាមពល និងខេត្តឡើយ គឺឈ្មួញឈ្មោះ ប៊ុត ចន្ថានេះ គេតែងតែប្រើអំណាចខ្សែបណ្ដាញ និងលុយកាក់តែប៉ុណ្ណោះ អាចដំណើរការទៅយ៉ាងរលូន ហើយស្ងាត់ដូចចោរលួចសេះតែម្ដង។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ