មន្ត្រីបរិស្ថានជាច្រើនរូប រួមជាមួយប្រជាសហគមន៍ កោដូនតី បានចុះទៅបញ្ឈប់ និងធ្វើកិច្ចសន្យាជាមួយក្រុមជនខិលខូចដែលធ្វើរបងហ៊ុមព័ទ្ធដីព្រៃសហគមន៍ និងភ្នំលោកតាមាន់រងាវ ដែលជាកន្លែងសក្ការៈគោរពបូជារបស់ជនជាតិដើមភាគតិច (សួយ) ដើម្បីយកធ្វើជា
ខេត្តកំពង់ស្ពឺ ៖ មន្ត្រីបរិស្ថានជាច្រើនរូប រួមជាមួយប្រជាសហគមន៍ កោដូនតី បានចុះទៅបញ្ឈប់ និងធ្វើកិច្ចសន្យាជាមួយក្រុមជនខិលខូចដែលធ្វើរបងហ៊ុមព័ទ្ធដីព្រៃសហគមន៍ និងភ្នំលោកតាមាន់រងាវ ដែលជាកន្លែងសក្ការៈគោរពបូជារបស់ជនជាតិដើមភាគតិច (សួយ) ដើម្បីយកធ្វើជាកម្មសិទ្ធិផ្ទាល់ខ្លួន និងលក់បន្តទៅឱ្យអ្នកមានលុយ និងមានអំណាច។
បើយោងតាមកិច្ចសន្យាមួយច្បាប់របស់មន្ទីរបរិស្ថានខេត្តកំពង់ស្ពឺ ចុះថ្ងៃទី២៦ ខែមករា ឆ្នាំ២០២៣ កន្លងទៅ ៖ កិច្ចសន្យាឈប់ប្រព្រឹត្តបទល្មើសលើធនធានធម្មជាតិ ឈ្មោះ អ៊ិត សេងលី ហៅឃ្លី អាយុ៥៨ឆ្នាំ រស់នៅក្នុងភូមិពុទ្ធ្រា ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ កាន់អត្តសញ្ញាណប័ណ្ណលេខ០៣១០០០៨២៦ ដែលបានប្រព្រឹត្តបទល្មើសធនធានធម្មជាតិ គឺបទល្មើសសាងសង់របងថ្ម ចំនួន២០០ដើម មានកម្ពស់១,៧០ម៉ែត្រ ទំហំ១៦ជុំ ដោយគ្មានច្បាប់អនុញ្ញាតិ នៅចំណុចមាន់រងាវ ហើយត្រូវក្រុមការងារបានទុករយៈពេល៥ថ្ងៃ ដើម្បីឱ្យរុះរើដោយខ្លួនឯងជាកំណត់ ស្ថិតនៅក្នុងភូមិពុទ្ធ្រា ឃុំត្រពាំងជោ ស្រុកឱរ៉ាល ខេត្តកំពង់ស្ពឺ។
សូមរំលឹកផងដែរថា កាលពីពេលកន្លងទៅ មានក្រុមជនខិលខូច បានធ្វើរបងហ៊ុមព័ទ្ធរំលោ.ភបំពានយកដីព្រៃសហគមន៍ កោដូនតី និងភ្នំលោកតាមាន់រងាវ យកធ្វើជាសម្បត្តិផ្ទាល់ខ្លួន និងលក់បន្តទៅឱ្យអ្នកមានលុយ មានអំណាច ស្ថិតនៅក្នុងភូមិពុទ្ធ្រា ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដែលគេស្គាល់ឈ្មោះ ឃ្លី និងឈ្មោះ ផេន ផល្លា។
បើតាមលោក ផល នឿន ប្រធានសហគមន៍ កោដូនតី បានប្រាប់ក្រុមអ្នកសារព័ត៌មានកន្លងទៅឱ្យដឹងថា ភ្នំលោកតាមានរងាវ ដែលកំពុងរងការបំផ្លិចបំផ្លាញពីសំណាក់ជនខិលខូចនេះ គឺស្ថិតនៅក្នុងដីព្រៃសហគមន៍ កោដូនតី មានទំហំជាង៣ពាន់ហិកតាឯណោះ ប៉ុន្តែបច្ចុប្បន្ននេះ ដោយមានការរំលោ.ភបំពានពីក្រុមជនខិលខូចមួយចំនួន រុករានទន្ទ្រានយកដីព្រៃសហគមន៍ អស់ជាច្រើនផងដែរ។
លោក ផល នឿន បានបន្ថែមទៀតថា កាលពីអំឡុងឆ្នាំ២០១២ លោក តាប់ ម៉ាឡៃ ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តកំពង់ស្ពឺ បានវាស់វែងកំណត់ដីមានប្លង់រឹង (០១) ចាប់ពីផ្លូវទៅជើងប្រវែងតែ៣០០ម៉ែត្រតែប៉ុណ្ណោះ នៅសេសសល់ កន្ទុយដីរាប់បញ្ចូលជាដីព្រៃសហគមន៍ កោដូនតី ទាំងអស់។ ប៉ុន្តែពេលនេះ ក្រុមជនខិលខូចបានលួចឃុបឃិតគ្នាជាប្រព័ន្ធ រុករានទន្ទ្រានយកដីព្រៃសហគមន៍ ស្ទើរតែទាំងស្រុងទៅហើយ ហាក់គ្មានខ្លាចញញើតច្បាប់សូម្បីតែបន្តិច។
សូមបញ្ជាក់ផងដែរថា កាលពីចុងឆ្នាំ២០២២កន្លងទៅ លោក ជា ទិត្យ អនុប្រធានមន្ទីរបរិស្ថានខេត្តកំពង់ស្ពឺ បានដឹកនាំមន្ត្រីជាច្រើនចុះទៅដល់ទីតាំងភ្នំលោកតាមាន់រងាវ ហើយឃើញថាមានក្រុមជនខិលខូចបានដាក់គ្រឿងចក្រ ជីកកាយរំលោ.ភបំពានយកភ្នំ និងដីព្រៃសហគមន៍កោដូនតី ពិតប្រាកដមែន។
លោកអនុប្រធានមន្ទីររូបនោះបានធ្វើលិខិតដកហូត ថែមទាំងចាត់មន្ត្រីជំនាញឱ្យកសាងសំណុំរឿងបញ្ជូនទៅតុលាការខេត្តកំពង់ស្ពឺថែមទៀតផង។ ប៉ុន្តែរហូតមកដល់ពេលនេះ រំលងជាងមួយខែទៅហើយ ជំនាញបរិស្ថានហាក់គ្មានចំណាត់ការទាល់តែសោះ បែរជាក្រុមជនខិលខូចនៅតែបន្តលួចធ្វើរបងលើសមុនទៅទៀត។ ប្រជាសហគមន៍កោដូនតី រង់ចាំមើលថា តើ កិច្ចសន្យារយៈពេល៥ថ្ងៃដែរ មន្ត្រីបរិស្ថានបានកំណត់នេះ មានប្រសិទ្ធភាពដល់កំរិតណា?៕
ចែករំលែកព័តមាននេះ