ខេត្តសៀមរាប ៖ ផ្ទះរបស់ប្រជាពលរដ្ឋចំនួន១៩ខ្នង ដែលអាជ្ញាធរបានអះអាងថា ជាសំណង់អាណាធិបតេយ្យខុសច្បាប់ ដែលពួកគេបាននាំគ្នាសាងសង់លើដីចំណីផ្លូវសាធារណៈ កាលពីមុនថ្ងៃបោះឆ្នោត ក្រុមប្រឹក្សាឃុំសង្កាត់ឆ្នាំ២០១៧ កន្លងទៅថ្មីៗនេះ (អតីតក្រវាត់ក្រុង) ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប នៅទល់មុខសណ្ឋាគារសុខាសៀមរាប ត្រូវបានអាជ្ញាធរក្រុងសៀមរាប សហការណ៍ជាមួយអាជ្ញាធរជាតិអប្សរា ចុះរុះរើស ហើយនៅព្រឹកថ្ងៃទី២០ ខែកក្កដា ឆ្នាំ២០១៧នេះ តែមិនឃើញមានប្រជាពលរដ្ឋប្រមូលផ្តុំគ្នាតវ៉ានោះឡើយ ខណៈសំណង់នេះ ប្រហែលជាអ្នកមាន បានធ្វើផ្ទះឱ្យប្រជាពលរដ្ឋក្រីក្រ ដើម្បីជួលឱ្យជួយមើលដីរបស់ពួកគេ ។
លោក សូ ប្លាតុង អភិបាលក្រុងសៀមរាប បានឱ្យដឹងនៅព្រឹកថ្ងៃទី២០ ខែកក្កដា ឆ្នាំ២០១៧ នេះថា ជាការពិតកាលពីឆ្នាំ២០១៦ សម្តេចតេជោ ហ៊ុន សែន បានចេញអនុក្រឹត្យលេខ១៥៨អនក្រ.បក ស្តីពីការធ្វើប្រទានកម្មសិទ្ធជូនប្រជាពលរដ្ឋ ដែលបានកាន់កាប់ប្រើប្រាស់ និងដាំដុះជាក់ស្តែងនៅក្នុងដីបុរីសណ្ឋាគារ ហើយការធ្វើប្រទានកម្មសិទ្ធជូនប្រជាពលរដ្ឋ ដែលបានកាន់កាប់ប្រើប្រាស់នេះ សម្រាប់តែដីដែលមានប្រជាពលរដ្ឋរស់នៅ មិនមែនដីផ្លូវសាធារណៈនោះទេ ។
លោក សូ ប្លាតុង បានបញ្ជាក់ទៀតថា ចំពោះផ្ទះចំនួន១៩ខ្នងនេះ គឺបានសង់លើដីផ្លូវសាធារណៈ ហើយសំណង់ទាំងនេះ ទើបតែមកសង់នៅក្នុងអំឡុងពេលបោះឆ្នោតឃុំសង្កាត់នេះទេ ជាពិសេសប្រជាពលរដ្ឋដែលមករស់នៅនេះ ក៏មិនមែនជាប្រជាពលរដ្ឋនៅក្នុងភូមិបឹងដូនប៉ា សង្កាត់ស្លក្រាម ក្រុងសៀមរាបដែរ ប៉ុន្តែពួកគាត់ភាគច្រើន ជាអ្នកមកពីឃុំកំពង់ឃ្លាំង ស្រុកសូទ្រនិគម ខេត្តសៀមរាប ហើយសម្រាប់ផ្ទះ១៩ខ្នងនេះ អាជ្ញាធរនឹងរុះរើឱ្យអស់តែជំហានដំបូង គឺរុះរើផ្ទះ១០ខ្នង ដែលគ្មានមនុស្សនៅជាមុនសិន ៕
ចែករំលែកព័តមាននេះ