រាជធានីភ្នំពេញ៖ ក្នុងគោលបំណងជួយសម្រាលបន្ទុកពលករខ្មែរ ក្នុងអំឡុងពេលដែលពលករផ្លាស់ប្តូរកន្លែងធ្វើការ ឬកំពុងតែរកការងារនៅកន្លែងថ្មី ឯកអគ្គរាជទូតខ្មែរប្រចាំនៅសាធារណរដ្ឋកូរ៉េកាលពីថ្ងៃសៅរ៍ បាន
រាជធានីភ្នំពេញ៖ ក្នុងគោលបំណងជួយសម្រាលបន្ទុកពលករខ្មែរ ក្នុងអំឡុងពេលដែលពលករផ្លាស់ប្តូរកន្លែងធ្វើការ ឬកំពុងតែរកការងារនៅកន្លែងថ្មី ឯកអគ្គរាជទូតខ្មែរប្រចាំនៅសាធារណរដ្ឋកូរ៉េកាលពីថ្ងៃសៅរ៍ បានសម្ភោធផ្ទះស្នាក់បណ្តោះអាសន្នទី៦ នៅតំបន់ក្វាងជូធំ ខេត្តចុលឡាណាំដូ សាធារណរដ្ឋកូរ៉េ។
ថ្លែងនៅចំពោះមុខពលករខ្មែរនៅប្រទេសកូរ៉េ លោក ឡុង ឌីម៉ង់ បានបញ្ជាក់ថា នេះគឺជាផ្ទះស្នាក់ទី៦ ហើយដែលបានរៀបចំឲ្យបងប្អូនពលករខ្មែរបានស្នាក់នៅបណ្តោះអាសន្ន នៅពេលពលករខ្មែរកំពុងស្ថិតក្នុងអំឡុងពេលនៃការផ្លាស់ប្តូរកន្លែងធ្វើការ ឬក៏មានបញ្ហាមិនគោរពកិច្ចសន្យាការងារ ឬក៏លក្ខខណ្ឌការងារ ឬក៏ក្រុមហ៊ុនមួយចំនួនក្ស័យទុន។ នៅតំបន់ក្វាងជូធំ ខេត្តចុលឡាណាំដូទីកន្លែងដែលមានពលករខ្មែរធ្វើការប្រមាណជាង៥ទៅ៦ពាន់នាក់ និងស្ត្រីខ្មែររៀបការប្តីកូរ៉េជាង៥០០គ្រួសាររស់នៅ ដូច្នេះវានឹងរួមចំណែកយ៉ាងសំខាន់ក្នុងការកាត់បន្ថយការចំណាយរបស់បងប្អូនពលករខ្មែរ។
លោក ឡុង ឌីម៉ង់បានបន្ថែមថា៖ «រយៈពេលនៃការប្តូរការងារកន្លែងធ្វើការ បងប្អូនប្រឈមនឹងការបង់ថ្លៃផ្ទះដោយចេញលុយខ្លូនឯង មានន័យថា អត់ចំណូលទេ»។ ពលករគឺមានការលំបាក ក្នុងអំឡុងពេលរង់ចាំពេលប្តូរកន្លែងធ្វើការ។ ដូច្នេះផ្ទះស្នាក់បណ្តោះអាសន្ននេះ គឺរួមចំណែកកាត់បន្ថយការលំបាករបស់បងប្អូន នៅអំឡុងពេលបងប្អូនដូរកន្លែងធ្វើការ ឬក៏មានបញ្ហាអ្វីកើតឡើង»។ លោកឯកអគ្គរាជទូតបានបន្តទៀតថា ជាទូទៅបងប្អូនពលករខ្មែរត្រូវរង់ចាំការងារថ្មីពី៣សប្តាហ៍ មួយខែ ឬមួយខែកន្លះ ដូច្នេះពួកគាត់ត្រូវចំណាយខ្ពស់លើថ្លៃឈ្នួលផ្ទះពេលអត់មានការងារធ្វើ។
ឯកអគ្គរាជទូតខ្មែររូបនេះបានបញ្ជាក់ថា៖ «បងប្អូនពលករស្នាក់នៅផ្ទះស្នាក់បណ្តោះអាសន្ននេះ គឺមិនត្រូវបានគិតប្រាក់ទេ ហើយពួកគាត់ស្នាក់នៅមិនយូរទេគឺរវាង ១ខែទៅ ២ ខែត្រូវតែរកការងារនៅកន្លែងថ្មីឲ្យបាន បើឡើងដល់៣ខែគាត់នឹងក្លាយជាពលករខុសច្បាប់»។
សម្រាប់ផ្ទះស្នាក់មុនៗ គឺមានទីតាំងនៅតំបន់ គីមហេ ស៊ូវុន អានសាន់ អើចុងប៊ួ ជាដើមគឺមានលទ្ធភាពឲ្យពលករខ្មែរប្រមាណ២០នាក់ស្នាក់នៅបាន មានកន្លែងសមរម្យសម្រាប់ស្នាក់នៅ និងមានចង្ក្រាន ដើម្បីចំអិនអាហារផងដែរ។ ដោយឡែកសម្រាប់ផ្ទះស្នាក់ទី៦ នៅតំបន់ក្វាងជូធំ ខេត្តចុលឡាណាំដូ គឺបងប្អូនអាចស្នាក់នៅបានដល់ទៅ ៥០ នាក់ដែលមានរៀបចំបន្ទប់ស្រីៗ និងប្រុសៗផ្សេងពីគ្នា។
ចែករំលែកព័តមាននេះ