រាជធានីភ្នំពេញ ៖ បណ្ដាម្ចាស់យានដ្ឋានជួសជុលរថយន្ដបានសម្ដែងក្ដីមិនសប្បាយចិត្ត ខណៈដែលកន្លងមក អាជ្ញាធររាជធានីប្រកាសថា នឹងតម្រូវឲ្យម្ចាស់យានដ្ឋានទាំងអស់រើទីតាំងទៅនៅក្រៅក្រុងដែលឆ្ងាយពីអ្នកប្រើប្រាស់ ។ ជាមួយគ្នានេះ អ្នកជិះរថយន្ដក៏យល់ឃើញថា នឹងមានការលំបាកផងដែរ ប្រសិនបើរថយន្ដខូចតាមផ្លូវដែលត្រូវជួសជុលបន្ទាន់ ប្រាកដជាត្រូវចំណាយលើសេវាអូសរថយន្ដច្រើន ហើយបើចង់ផ្លាស់ប្ដូរគ្រឿងបន្លាស់នានា ក៏ត្រូវចំណាយពេលច្រើនផងដែរ ។ ប៉ុន្ដែ ទោះបីជាពួកគេមិនសប្បាយចិត្តយ៉ាងណាក៏ដោយ ប្រសិនបើសាលារាជធានីចេញសេចក្ដីប្រកាសតម្រូវឲ្យរើទីតាំងមែននោះ ពួកគេក៏គ្មានជម្រើសដែរ ប៉ុន្ដែបានសំណូមពរថា សាលារាជធានីភ្នំពេញត្រូវមានគោលការណ៍ច្បាស់លាស់ កំណត់ទីតាំងជាក់លាក់ និងមានតម្លាភាព ព្រោះថា ការរើទីតាំងនីមួយៗមិនមែនជារឿងងាយស្រួលឡើយ ។
លោក ឡៅ ពិសិដ្ឋ ម្ចាស់យានដ្ឋានជុសជុលរថយន្ត KS Auto Garage បានឲ្យដឹងថា ការដែលសាលារាជធានីភ្នំពេញឲ្យយានដ្ឋានជុសជុលប្តូរទៅនៅខាងក្រៅក្រុងនោះ វាពិតជាបង្កផលលំបាកច្រើន ហើយការលើកឡើងកន្លងមកនេះ បានធ្វើឱ្យម្ចាស់យានដ្ឋានព្រួយបារម្ភ អាចធ្វើឱ្យបាត់បង់អតិថិជន និងប្រាក់ចំណូល ។
យ៉ាងណាក៏ដោយ លោកបន្តថា ៖«សម្រាប់ខ្ញុំមិនហ៊ានថា ចំណាត់ការរបស់សាលាក្រុងយ៉ាងម៉េចទេ ប៉ុន្តែបើសាលាក្រុងកំណត់ច្បាប់ចេញមកតឹងរ៉ឹង អ្នកបើកយានដ្ឋានជុសជុលនឹងគោរពតាម មិនអាចប្រឆាំងបានទេ គ្រាន់តែសំណូមពរថា មុននឹងចាត់វិធានការ គួរបើកជាវេទិកាប្រជាមតិ តើសាលាក្រុងចង់រើយានដ្ឋានចេញទៅក្រៅក្រុង ផលប្រយោជន៍ចំណេញធំជាងគេ គឺអ្វី? ដូចនេះ សំណូមពររបស់ខ្ញុំ ចង់ឱ្យអ្នកបង្កើតច្បាប់នោះពិចារណាឱ្យច្រើនពីផលប៉ះពាល់ » ។
ចំណែកម្ចាស់យានដ្ឋានជុសជុលរថយន្តយីហោ «ជាងទី» បានលើកឡើងថា បើសិនសាលាក្រុងពិតជាតម្រូវឱ្យយានដ្ឋានជុសជុលទាំងអស់ប្តូរទៅក្រៅក្រុងនោះ ម្ចាស់យានដ្ឋានប្រាកដជារងផលប៉ះពាល់ច្រើន ប៉ុន្ដែបើមានលក្ខខណ្ឌត្រឹមត្រូវអាចទទួលយកបាន គឺមិនអាចបដិសេធបានទេ ។ យ៉ាងណាក៏ដោយ ម្ចាស់យានដ្ឋានរូបនេះយល់ថា គម្រោងនេះមិនអាចទៅរួចឡើយ ។
លោក ជាង ទី ម្ចាស់យានដ្ឋាននេះគិតថា ៖« ប្រហែលជាទៅមិនរួចទេ ដោយសារប្រជាជននៅក្នុងក្រុង ត្រូវការជិះរថយន្ត បើរថយន្តខូច តើត្រូវធ្វើយ៉ាងម៉េច ។ បើហៅជាងមកជុសជុល គេនឹងគិតថ្លៃសេវាខ្ពស់ដែលធ្វើឲ្យប៉ះពាល់ដល់អារម្មណ៍ម្ចាស់រថយន្ត » ។
ការលើកឡើងដូចគ្នានេះដែរ លោក តូនី ម្ចាស់យានដ្ឋាន RTN Auto Garage ឱ្យដឹងថា ៖« អ្វីដែលសាលារាជធានីភ្នំពេញ ចង់ឱ្យយានដ្ឋានជុសជុលរថយន្តនៅក្រៅក្រុង គឺខ្ញុំធ្លាប់ទទួលបាន ប៉ុន្តែគម្រោងនេះខ្ញុំគិតថា ធ្វើមិនចេញទេ ព្រោះវាមិនមែនជាគម្រោងថ្មី កន្លងមកក៏ធ្លាប់ឱ្យម្ចាស់យានដ្ឋានជុសជុលរថយន្តរើចេញទៅក្រៅក្រុងដែរ ។ ដូច្នេះ ការលើកឡើងនាពេលនេះ ដូចមិនមានអ្វីចាប់អារម្មណ៍ទេ » ។
យ៉ាងណាក៏ដោយ លោកថាការលើកឡើងនេះ បើសាលាក្រុងមានគោលការណ៍ច្បាស់លាស់គ្មានអ្នកណាប្រកែកបានទេ ហើយនៅស្រុកគេក៏ធ្វើអីចឹងដែរ គ្មានយានដ្ឋាននៅពាសពេញក្រុងនោះទេ គេមានតំបន់ដែលរដ្ឋតម្រូវឲ្យទៅបោះទីតាំង ចង្អុលប្រាប់ថា ទីតាំងនោះនៅកន្លែងណា ទំហំប៉ុនណា ដើម្បីកុំឲ្យប៉ះពាល់ដល់ថ្ងៃក្រោយ ពីព្រោះយានដ្ឋាននីមួយៗមិនមែនចេះតែរើសទេ វាចំណាយលុយច្រើន ខាតពេលវេលា និងអាចធ្វើឱ្យបាត់បង់អតិថិជនខ្លះថែមទៀត ប៉ុន្តែបើចេះតែនិយាយដូចអាណត្តិមុនៗនោះ គឺនៅតែប៉ុណ្ណឹង ទោះទៅមុខ១០ឆ្នាំទៀត ក៏នៅតែប៉ុណ្ណឹង ។
អ្នកបើកបររថយន្ដតាក់ស៊ីភ្នំពេញ-តាកែវ លោក គឹម ឈុន យល់ឃើញថា ការលើកឡើងរបស់សាលាក្រុងកន្លងមកក៏សមហេតុផលដែរ ដើម្បីកាត់បន្ថយការកកស្ទះចរាចរណ៍ ដោយសារតែយានដ្ឋានមួយចំនួនទទួលយករថយន្ដមកជួសជុលឬកែច្នៃច្រើនពេក ដោយចតរថយន្ដត្រៀបត្រាតាមចិញ្ចើមផ្លូវបង្កការកកស្ទះដល់អ្នកធ្វើដំណើរជាអន្លើ ជាពិសេសរថយន្ដធុនធំដឹកទំនិញ ។
មួយវិញទៀត សកម្មភាពជួសជុលមួយចំនួនបានបង្កជាសំឡេង បញ្ចេញផ្សែងដែលបង្កការរំខានដល់អ្នកជិតខាងថែមទៀត ប៉ុន្ដែអ្វីដែលជាផលវិបាកនោះ នៅពេលរថយន្ដខូចពេលកំពុងបើកបរ ម្ចាស់រថយន្ដពិតជាជួបការលំបាកទ្វេដងជាក់ជាមិនខាន ។
គួរបញ្ជាក់ថា កាលពីដើមខែឧសភា កន្លងទៅ អភិបាលរាជធានីភ្នំពេញលោក ប៉ា សុជាតិវង្ស បានបញ្ចេញគំនិតមួយ ដោយចង់ឲ្យយានដ្ឋានជួសជុលរថយន្ត និងឃ្លាំងស្តុកទំនិញ ដែលកំពុងធ្វើអាជីវកម្មក្នុងក្រុងភ្នំពេញ ត្រូវប្ដូរទីតាំងទៅជាយក្រុង ។ ការលើកឡើងនេះ គឺជាការតម្រង់ទិសមួយដែលអាចឈានដល់ការអនុវត្តជាបន្តបន្ទាប់ផងដែរ ។ ទោះយ៉ាងណា សាលារាជធានីភ្នំពេញ មិនទាន់មានផែនការច្បាស់លាស់នៅឡើយទេ ៕
ចែករំលែកព័តមាននេះ