អតីតតារាសម្តែងអ្នកនាង ឌី លីណា បានថ្លែងការនឹករលឹកទៅដល់អាជីពសិល្បៈរបស់នាងដែលធ្លាប់តស៊ូអស់រយៈពេលជាច្រើនឆ្នាំ បន្ទាប់ពីនាងបានសម្រេចបញ្ឈប់អាជីពមួយនេះ ក្រោយរៀបការមានគ្រួសារ និងចេញទៅ
រាជធានីភ្នំពេញ ៖ អតីតតារាសម្តែងអ្នកនាង ឌី លីណា បានថ្លែងការនឹករលឹកទៅដល់អាជីពសិល្បៈរបស់នាងដែលធ្លាប់តស៊ូអស់រយៈពេលជាច្រើនឆ្នាំ បន្ទាប់ពីនាងបានសម្រេចបញ្ឈប់អាជីពមួយនេះ ក្រោយរៀបការមានគ្រួសារ និងចេញទៅរស់នៅលើទឹកដីអាមេរិកអស់ជាច្រើនឆ្នាំមកនេះ។
យ៉ាងណា បើទោះបីជានាងបានបង្ហាញអារម្មណ៍ពីការនឹករលឹកមកដល់អាជីពសិល្បៈដែលធ្លាប់ហែលឆ្លងក៏ដោយ ប៉ុន្តែអ្នកនាង ឌី លីណា មិនមានបំណង និងគោលដៅណាមួយវិលរកអាជីពនេះជាថ្មីឡើងវិញឡើយ ដោយសារតែពេលនេះនាងមានធុរៈត្រូវបានមើលថែគ្រួសារដែលមិនអាចឲ្យនាងទៅណាបានឡើយ។
ជាមួយនឹងរូបភាព នៃការសម្តែងចាស់នាពេលកន្លងមក អ្នកនាង ឌី លីណា បានភ្ជាប់ជាមួយនឹងសារដែលបានបង្ហោះតាមគណនីហ្វេសប៊ុករបស់ខ្លួនថា «ឆ្លើយមក ថានឹកឬមិននឹក ឆ្លើយក៏បាន នឹកបំផុត ព្រោះជាក្តីស្រម៉ៃ និងស្រលាញ់តាំងតែពីតូចមក ហើយសិល្បៈជា MC និងជាតារាសម្តែង គឺខ្ញុំខំកសាងដោយសមត្ថភាពខ្លួនឯងផ្ទាល់»។
នាងបញ្ជាក់ថា «ជំនាន់នោះ គ្មានទេភាពងាយៗ តស៊ូតាំងពីចំណុច០ ទំរាំបានមានឈ្មោះជាពិធីករ ឬ MC ម្នាក់ ដែលប៉ុស្តិ៍ទូរទស្សន៍គេទទួលស្គាល់ជាពិធីករ ឬ MC ប្រចាំ TV ម្នាក់ មិនមែនអោយតែយើងស្អាតគឺបានទេ គឺត្រូវតែមានជំនាញ និងចំណេះដឹងទើបបាន»។ នាងថា «តែពេលនេះបានត្រឹមតែនឹករលឹកទេ ឌី លីណាអើយ ហើយពេលនេះក៏បានមកកាន់ការងារ១ដ៏ជាប់លាប់១ហើយ មិនប្តូរផ្លាស់បានទៅណាទេ គឺនៅជាប់នឹង TV ប៉ុស្តិ៍របស់កូនៗហើយ ចង់មានអ្នកអោយថ្លៃឈ្នួលខ្ពស់កក់យ៉ាងណាក៏មិនអាចដូរដែរ ព្រោះប៉ុស្តិ៍ TV របស់កូនៗអោយតម្លៃ គ្មានតម្លៃណាអាចប្រៀបបានឡើយ»។
ជាការកត់សម្គាល់ អតីតតារាសម្តែងអ្នកនាង ឌី លីណា គឺជាតារាសម្តែង និងពិធីករមានឈ្មោះបោះសម្លេងម្នាក់ផងដែរ កាលពីអំឡុងឆ្នាំ២០០០ ប៉ុន្តែអ្នកនាងបានសម្រេចផ្អាកការងារសិល្បៈ ក្រោយពីនាងបានសម្រេចចូលរោងការជាមួយនឹងស្វាមីដែលជាអាណិកជនខ្មែររស់នៅអាមេរិកកាលពីអំឡុងឆ្នាំ២០១៦។ ក្រោយមានគ្រួសារនោះ អ្នកនាងក៏បានចេញទៅរស់នៅទឹកដីអាមេរិកតាមស្វាមី ដែលរហូតមកទល់នាពេលនេះ នាងមានកូនចំនួន៣នាក់ហើយ ខណៈពេលដែលនៅលើទឹកដីអាមេរិក អ្នកនាងក៏មានអាជីវកម្មផ្ទាល់ខ្លួនផងដែរ គឺហាងលក់គ្រឿងអលង្ការ និងផលិតផលសម្រស់តាមអនឡាញ៕
ចែករំលែកព័តមាននេះ