រាជធានីភ្នំពេញ ៖ គណបក្ស សម រង្ស៊ី បានស្នើទៅព្រឹទ្ធសភាដាក់អ្នកស្រី គុណ លំអង បច្ចុប្បន្នជាប្រធានចលនាស្ត្រីគណបក្សសង្គ្រោះជាតិ និងជាភរិយារបស់លោកហុង សុខហួរ ដែលកំពុងជាប់ឃុំរឿងក្លែងបន្លំឯកសារព្រំដែននោះ ឱ្យទទួលតំណែងជំនួសប្ដីរបស់អ្នកស្រី ។ នេះបើយោងតាមអ្នកនាំពាក្យព្រឹទ្ធសភា ។
គណៈកម្មាធិការអចិន្ត្រៃយ៍ព្រឹទ្ធសសភាបានកំណត់យកថ្ងៃទី២៩ ខែមិថុនា ដើម្បីពិភាក្សាលើសំណើសុំរបស់គណបក្សសម រង្ស៊ី ដាក់បេក្ខភាពសមាជិកព្រឹទ្ធសភា ថ្មីជំនួសលោកហុង សុខហួរ ដែលកំពុងជាប់ពន្ធនាគារព្រៃ.ស ។ ការសម្រេចនេះ ធ្វើឡើងក្រោយគណៈកម្មាធិការអចិន្ត្រៃយ៍ បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជា ព្រឹកថ្ងៃទី២៧ មិថុនា នេះ ។
លោក ម៉ម ប៊ុននាង អ្នកនាំពាក្សព្រឹទ្ធសភាបានបានឲ្យដឹងថា គណៈកម្មាធិការអចិន្ត្រៃយ៍ព្រឹទ្ធសភាបានពិនិត្យ និងកំណត់យកថ្ងៃទី២៩ មិថុនា ដើម្បីបើកកិច្ចប្រជុំពេញអង្គពិនិត្យ និងពិភាក្សានូវនូវសេចក្តីព្រាងច្បាប់ ដែលរដ្ឋសភាបានបញ្ជូនមក ។ លោកបន្តថា របៀបវារៈដែលត្រូវយកមកពិនិត្យ និងអនុម័តក្នុងសម័យប្រជុំព្រឹទ្ធសភា លើកទី១០នោះមាន៣ ៖ ទី១-ច្បាប់បោះឆ្នោតជ្រើសរើសសមាជិកព្រឹទ្ធសភា ទី២-ការស្នើ ប្តូរបេក្ខភាពរបស់គណបក្សសមរង្សី ដែលបានលាឈប់កាលពីពេលកន្លងទៅ។
គណបក្ស សម រង្ស៊ី បានស្នើដាក់អ្នកស្រី គុណ លំអង បច្ចុប្បន្នជាប្រធានចលនាស្ត្រីគណបក្សសង្គ្រោះជាតិ និងជាភរិយារបស់ លោក ហុង សុខហួរ ដែលកំពុងជាប់ឃុំរឿងក្លែងបន្លំឯកសារព្រំដែននោះ អោយទទួលតំណែងជំនួសប្ដីរបស់អ្នកស្រី។ អ្នកនាំពាក្យព្រឹទ្ធសភាបញ្ជាក់ថា បេក្ខភាពថ្មីត្រូវស្វែងរកសំឡេងគាំទ្រភាគច្រើនដាច់ខាតឬ៥០+១ (ហាសិបបូកមួយ) ដើម្បីទទួលបានសេចក្ដីទុកចិត្ត និងអនុម័តពីកិច្ចប្រជុំរបស់ព្រឹទ្ធសភា។
អ្នកនាំពាក្យព្រឹទ្ធសភាបានបញ្ជាក់ថា ពុំមានបញ្ហាប្រទាំងប្រទើសណាមួយឡើយ ចំពោះដំណើរការស្នើសុំរបស់គណបក្ស សម រង្ស៊ី នេះ។ លោកថា កិច្ចប្រជុំរបស់គណៈកម្មាធិការអចិន្ត្រៃយ៍ព្រឹទ្ធសភាកាលពីព្រឹកថ្ងៃទី២៧ មិថុនា បានសម្រេចលើកយកសំណើនេះទៅដាក់ជារបៀបវារៈនៃកិច្ចប្រជុំព្រឹទ្ធសភានៅថ្ងៃ ទី២៩ ខាងមុខ ។ មាន៥០បូកមួយគាំទ្រ ទៅលើសមាជិកភាពទាំង៦១រូបនោះ ទើបបានការសម្រេច ។ បើសិនជាគាត់រកសំឡេងមិនបានទេ អាហ្នឹងគឺតាមច្បាប់គឺត្រូវប្ដូរសមាសភាពទៀតទៅ។
សូមជម្រាបថាលោក ហុង សុខហួរ បានលាលែងពីសមាជិកព្រឹទ្ធសភាកាលពីខែកុម្ភៈ ឆ្នាំ២០១៧ គឺរយៈពេល៦ខែ ក្រោយពេលដែលរូបលោកត្រូវចាប់ឃុំខ្លួននៅពន្ធនាគារ ។ លោកត្រូវបានចៅក្រមសាលាដំបូងរាជធានីភ្នំពេញ សម្រេចផ្ដន្ទាទោសដាក់ពន្ធនាគារចំនួន ៧ឆ្នាំ កាលពីថ្ងៃទី៧ ខែវិច្ឆិកា ឆ្នាំ២០១៦ ក្រោមបទចោទចំនួន ៣បទល្មើស ទាក់ទងនឹងបញ្ហាព្រំដែនកម្ពុជា-វៀតណាម។
តុលាការក្រុងភ្នំពេញ បានចេញដីកាឲ្យឃុំខ្លួនលោក កាលពីថ្ងៃទី១៤ ខែសីហា ឆ្នាំ២០១៥ ក្នុងរយៈពេលពីរថ្ងៃបន្ទាប់ពីសម្តេច
តេជោ ហ៊ុន សែននាយករដ្ឋមន្ត្រី បញ្ជាឲ្យចាប់ខ្លួនទាំងលោកនៅមានអភ័យឯកសិទ្ធិ ដោយចោទប្រកាន់ថា លោក ហុង សុខហួរ ក្បត់ជាតិ ដែលហ៊ានលួចក្លែងឯកសារសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩ ដែលថា សន្ធិសញ្ញារំលាយព្រំដែនប្រទេសទាំងពីរ។លោក ហុង សុខហួរ ជាអតីតសមាជិកនៃគណៈកម្មការទី១០ នៃព្រឹទ្ធសភា។
ប្រធានស្ដីទីនៃគណបក្ស សម រង្ស៊ី លោក ទាវ វណ្ណុល ត្រូវបានវិទ្យុអាស៊ីសេរីស្រង់សំដីផ្សាយថា ដើម្បីទទួលបានសុពលភាពសមាជិកព្រឹទ្ធសភា អ្នកស្រី គុណ លំអង មិនចាំបាច់ទាល់តែមានសំឡេង ៥០បូកមួយឡើយ ប៉ុន្តែអ្នកស្រីនឹងត្រូវការសំឡេងនេះនៅពេលចូលរួមជាសមាជិកនៃគណៈកម្មការទី១០ របស់ព្រឹទ្ធសភា។
លោកបញ្ជាក់ថា «បើគាត់នៅជាសមាជិកព្រឹទ្ធសភាធម្មតា គាត់មិនបាច់ត្រូវការបោះឆ្នោត៥០បូកមួយហ្នឹងទេ។ តែបើគាត់ចង់ចូលទៅគណៈកម្មការទី១០ ដែលជាតំណែងរបស់ឯកឧត្ដម ហុង សុខហួរ គាត់ត្រូវតែមានការយល់ព្រមពីសភាពេញអង្គ៥០បូកមួយ»។
បើតាមមន្ត្រីគណបក្សសង្គ្រោះជាតិម្នាក់បានឲ្យដឹងថាអ្នកស្រី គុណ លំអង មានវ័យប្រមាណជាង៥០ឆ្នាំ អ្នកស្រីមិនខុសពីស្វាមីដែរ គឺមានសញ្ជាតិបារាំង។ អ្នកស្រីបានឈរឈ្មោះជាបេក្ខជនតំណាងរាស្ត្រអោយគណបក្សសង្គ្រោះជាតិ ដោយឈរនៅលេខរៀងទី៧ នៅមណ្ឌលតាកែវ នៅក្នុងការបោះឆ្នោតជាតិអាណត្តិទី៥ កាលពីឆ្នាំ២០១៣។
ទាក់ទងនឹងករណីស្នើដាក់អ្នកស្រី គុណ លំអង ជំនួសស្វាមីនេះ អ្នកជំនាញផ្នែកវិទ្យាសាស្ត្រនយោបាយ លោក សូ ចន្ថា មើលឃើញថា ហាក់ពុំមានអ្វីជាក្ដីបារម្ភនោះទេ បើទោះបីជាត្រូវការសំឡេងគាំទ្រ ៥០បូកមួយយ៉ាងណាក្ដី៖ «មើលទៅរាល់កិច្ចប្រជុំទាំងអស់មិនដែលមានករណីខ្ទាស់ មិនអោយសមាជិកភាពស្នើដោយគណបក្សសាមីនោះក្លាយជាសមាជិកព្រឹទ្ធសភានោះទេ។ ប៉ុន្តែអ្វីដែលយើងពិនិត្យមើលទៅដែលចោទជាបញ្ហានោះ គឺអាចតំណែងតួនាទីជាប្រធានគណៈកម្មការ»។
ចែករំលែកព័តមាននេះ