រាជធានីភ្នំពេញ ៖ អ្នកបើករថយន្តតាក់ស៊ីម៉ែត្រ២នាក់ ខឹងរឿងបើករថយន្តឆាបកាត់មុខទាំងរំលោភច្បាប់ចរាចរណ៍ បើករថយន្តដេញតាមវាយតប់គ្នា ត្រូវកងរាជអាវុធហត្ថខណ្ឌទួលគោកឃាត់ខ្លួនទាំង២នាក់យកទៅសួរនាំ ដែលហេតុការណ៍នេះបង្កឲ្យមានការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមដងផ្លូវ កាលពីវេលាម៉ោង១២និង៤៥នាទីរំលងអធ្រាត ឈានចូលថ្ងៃទី២៦ ខែមិថុនា ឆ្នាំ២០១៧ តាមបណ្តោយផ្លូវ១៨២កែងផ្លូវ២៥៣ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅពេលកើតហេតុគេឃើញមានរថយនតាក់ស៊ីម៉ែត្រ២គ្រឿងបើកតាមបណ្តោយផ្លូវ១៨២ ក្នុងទិសដៅពីកើតទៅលិច បានបើកមកឈប់ស្តុបទន្ទឹមគ្នានៅចំណុចកើតហេតុខាងលើ ដែលរថយន្តទីមួយ ជារថយន្តតាក់ស៊ីម៉ែត្រក្រុមហ៊ុនតាក់ស៊ីម៉ែត្រក្រហម បើកបរដោយបុរសម្នាក់ និងនារីម្នាក់ដែលជាភ្ញៀវរួមដំណើរពីក្រោយ និងរថយន្តទី២ ជារថយន្តតាក់ស៊ីម៉ែត្ររបស់ក្រុមហ៊ុនឆយបើកបរដោយបុរសម្នាក់ មកដល់ចំណុចកើតហេតុ អ្នកបើករថយន្តទាំងពីរនាក់ បានចុះពីលើរថយន្ត ហើយបានវាយប្រតាយប្រតប់គ្នាពេញដងផ្លូវ រួចហើយបើករថយន្តតាក់ស៊ីក្រុមហ៊ុនឆយ បានរត់ចោលរថយន្តចូលទៅក្នុងមូលដ្ឋានកងរាជអាវុធហ្ថតខណ្ឌទួលគោកបាត់ស្រមោល បន្សល់តែរថយន្តនៅនឹងកន្លែងកើតហេតុ ។ បើតាមសម្តីអ្នកបើករថយន្តតាក់ស៊ីក្រុមហ៊ុនឆយ បានរៀបរាប់ឲ្យដឹងថាគាត់មានឈ្មោះ ខណ្ឌ ម៉ាលែន ភេទប្រុស អាយុ២៩ឆ្នាំ មុខរបរអ្នករត់តាក់ស៊ីក្រុមហ៊ុនឆយ ស្នាក់នៅម្តុំបូរីទួលសង្កែ សង្កាត់ទួលសង្កែ ខណ្ឌឫស្សីកែវ នៅមុនពេលកើតហេតុគាត់បានបើកបររថយន្តលើតាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើង បំណងទៅយកភ្ញៀវនៅខារ៉ាអូខេអង្គរសម្រឹត លុះមកដល់ស្តុបទេពផន ភ្លើងអត្តិភាពឲ្យបត់ឆ្វេង គាត់ក៏បានបត់ឆ្វេងទៅផ្លូវ១៨២ ស្រាប់តែមានរថយន្តតាក់ស៊ីក្រហម បើកមកតាមបណ្តោយផ្លូវម៉ៅសេទុងក្នុងទិសដៅបញ្ច្រាសទិសគ្នា ហើយបើកមកបត់ឆាបពីមុខរថយន្តរបស់គាត់ ដោយបំពានច្បាប់ចរាចរណ៍ ហើយគាត់ក៏បើកដេញតាមរថយន្តនោះ លុះមកដល់ចំណុចកើតហេតុ គាត់ក៏បានស្រែកថាឲ្យនាក់បើករថយន្តតាក់ស៊ីក្រហមថា បងបើកចឹងខុសហើយបង ស្រាប់តែនាក់បើករថយន្តរូបនោះចុះមកអូសគាត់ចេញពីរថយន្ត ហើយវាយរូបគាត់ បណ្តាលឲ្យហើមដៃខាងឆ្វេង រួចគាត់ក៏បានវាយទៅវិញ បណ្តាលឲ្យអ្នកបើករថយន្តតាក់ស៊ីក្រហម ហើមភ្នែកខាងឆ្វេង ខណៈពេលនោះក៏មានប្រជាពលរដ្ឋឃាត់ហើយអ្នកបើកបររថយន្តតាក់ស៊ីក្រហម បានដើរទៅបើកគូថរថយន្ត រួចគាត់ក៏បានរត់គេចខ្លួនចូលទៅក្នុងមូលដ្ឋានកងរាជអាវុធហ្ថតខណ្ឌទួលគោក ដើម្បីឲ្យអាជ្ញាធរជួយអន្តរាគមន៍ ។
ចំណែកបុរសដែលបើករថយន្តតាក់ស៊ីក្រុមហ៊ុនក្រហម បានរៀបរាប់ឲ្យដឹងថា គាត់មានឈ្មោះ សំណាង ឡុង អាយុ២៥ឆ្នាំ មុខរបរអ្នករត់តាក់ស៊ីក្រុមហ៊ុនក្រហម ស្នាក់នៅម្តុំបឹងត្របែក សង្កាត់ទួលទំពូងទី១ ខណ្ឌចំការមន មុនពេលកើតហេតុ គាត់បានបើករថយន្តខាងលើដឹកភ្ញៀវចេញពីម្តុំវត្តភ្នំ ទៅផ្ទះនៅមុខផ្សារហេងលី តាមបណ្តោយផ្លូវម៉ៅសេងទុង ក្នុងទិសដៅពីជើងទៅត្បូង ខណៈមកដល់ត្រង់ចំណុចកើតហេតុគាត់បានបត់ស្តាំទៅផ្លូវ១៨២ ហើយស្រាប់តែមានរថយន្តតាក់ស៊ីក្រុមហ៊ុនឆយ បើកមកពីក្រោយ និងស៊ីផ្លេដាក់រហូត លុះបើកមកដល់ចំណុចកើតហេតុ អ្នកបើករថយន្តតាក់ស៊ីក្រុមហ៊ុនឆយ បានស្រែកជេរគាត់ ហើយគាត់ក៏បានស្រែកទៅវិញថា គាត់ក៏ជាអ្នកបើករថយន្តតាក់ស៊ីដែរ ម៉េចចាំបាច់ជេរ កុំនិយាយឆ្លើយពេក ហើយអ្នកបើករថយន្តក្រុមហ៊ុនឆយ ខឹង ហើយបានវាយមកលើគាត់បណ្តាលឲ្យហើមមុខ និងទាញយកទូរស័ព្ទដៃរបស់គាត់បណ្តាលឲ្យបែក ។
ក្រោយពេលកើតហេតុ អ្នកបើកបររថយន្តតាក់ស៊ីម៉ែត្រទាំងពីរនាក់ ត្រូវបានកម្លាំងកងរាជអាវុធហ្ថតខណ្ឌទួលគោក នាំយកទៅសាកសួរដើម្បីធ្វើការដោះស្រាយគ្នា ៕
ចែករំលែកព័តមាននេះ