រាជធានីភ្នំពេញ ៖ បុរសម្នាក់ជាជនជាតិបរទេស រួមនិងសង្សារម្នាក់ បណ្ដើរគ្នាចេញមកពីដកលុយក្នុងទូ ATM ត្រូវជនសង្ស័យ២នាក់ឆក់កាបូបមិនបានសម្រេច សំណាងល្អអាវុធហត្ថប្រទះឃើញ បានដេញតាមចាប់បានជនសង្ស័យទាំង២នាក់ ត្រូវប្រជាពលរដ្ឋវាយទ្រមខ្លួន កើតឡើងកាលពីវេលាម៉ោង១០និង៥០នាទីយប់ ថ្ងៃទី២៥ ខែមិថុនា ឆ្នាំ២០១៧ តាមបណ្តោយផ្លូវ២១៤កែងផ្លូវព្រះនរោត្តម នៅចំណុចជិតក្រសួងអប់រំ ស្ថិតនៅក្នុងសង្កាត់បឹងរាំង ខណ្ឌដូនពេញ ។
ជនសង្ស័យទី១ជាអ្នកឆក់មានឈ្មោះ ចៅ ចាន់ថា ភេទប្រុស អាយុ២០ឆ្នាំ មុខរបរជាអ្នករត់តុ ស្នាក់នៅសង្កាត់ជ្រោយចង្វារ ខណ្ឌជ្រោយចង្វារ ។ ទី២មានឈ្មោះ ឈុន រតនៈ ភេទប្រុស អាយុ២៤ឆ្នាំ មុខរបរ និងស្នាក់នៅមិនពិតប្រាកដ ។ តាមប្រភពព័ត៌មានពីកងរាជអាវុធហត្ថខណ្ឌដូនពេញ បានឲ្យដឹងថា មុនពេលកើតហេតុ កម្លាំងរបស់គាត់បានធ្វើការល្បាតនៅក្នុងមូលដ្ឋានការពារជូនប្រជាពលរដ្ឋទប់ស្កាត់បទល្មើសកុំឲ្យកើតឡើងដូចជាឆក់ និងប្លន់ ខណៈពេលល្បាតមកដល់ចំណុចកើតហេតុខាងលើ ក៏ស្រាប់តែឃើញជនជាតិបរទេសប្រុសម្នាក់ រួមនិងស្ត្រីខ្មែរម្នាក់ ទើបតែចេញមកពីដកលុយទូ ATM ហើយក៏ត្រូវជនសង្ស័យ២នាក់ជិះម៉ូតូម៉ាក Suzuki Nex ពណ៌ខ្មៅលាយក្រហម ពាក់ស្លាកលេខ ភ្នំពេញ ១FX-៧០១៩ ធ្វើដំណើរតាមបណ្តោយផ្លូវព្រះនរោត្តម បានជិះទៅជិត ហើយធ្វើសកម្មភាពឆក់កាបូបស្ពាយពីស្ត្រីរងគ្រោះ ប៉ុន្តែឆក់អត់បានសម្រេចនោះទេ ត្រូវអាវុធហត្ថខណ្ឌដូនពេញប្រទះឃើញ បានដេញចាប់ពីចំណុចកើតហេតុរហូតដល់មុខផ្សារអូរឬស្សី ម្តុំកន្លែងផ្ញើម៉ូតូ ក៏ចាប់បានទាំង២នាក់ ត្រូវប្រជាពលរដ្ឋចោមរោមវាយមួយដៃមួយជើង បណ្តាលឲ្យរងរបួសធ្ងន់យ៉ាងដំណំ ចំណែកឯជនរងគ្រោះវិញ មិននៅកន្លែងកើតហេតុនោះទេ ។ ជាមួយគ្នានោះដែរ លោកមេបញ្ជាការអាវុធហត្ថខណ្ឌដូនពេញ បានសំណូមពរឲ្យប្រជាពលរដ្ឋទាំងអស់ ពេលដែលមានករណីដូចខាងលើកុំទាន់ចាកចេញពីកន្លែងកើតហេតុឲ្យសោះ រងចាំសមត្ថកិច្ចមកសិន ជួនកាលពេលដែលកម្លាំងគាត់ចាប់បានហើយ ប៉ុន្តែអត់មានអ្នករងគ្រោះចេញមកដាក់ពាក្យបណ្តឹងពិបាកនឹងធ្វើការណាស់ ។
បច្ចុប្បន្នជនសង្ស័យទាំង២នាក់ រួមនិងវត្ថុតាងម៉ូតូ ត្រូវបានសមត្ថកិច្ចកសាងសំណុំរឿងបញ្ចូនទៅតុលាការ ដើម្បីចាត់ការទៅតាមនីតិវិធី ៕
ចែករំលែកព័តមាននេះ