រាជធានីភ្នំពេញ ៖ អតីតតារាសម្តែងនាទសវត្សរ៍ឆ្នាំ៩០ អ្នកនាង អ៊ឹម សុវណ្ណផល្លា បានបង្ហាញនូវគោណបំណងសំខាន់មួយនៅក្នុងឆាកជីវិតរបស់នាង ក្រោយការជួបជុំមិត្តភក្តិសិល្បៈរួមជំនាន់ បន្ទាប់ពីការនាងបានចាកចេញពីវិស័យសិល្បៈអស់រយៈពេលជាង២០ឆ្នាំមកនេះ ។
គោលបំណងសំខាន់របស់អ្នកនាងនោះ គឺការជួបជុំមិត្តភក្តិសិល្បៈរួមជំនាន់ ជាមួយនាងនៅអំឡុងពេលណាមួយ បើទោះបីជាពេលនេះ នាងបានរស់ឆ្ងាយពីវិថីសិល្បៈក៏ដោយ ប៉ុន្តែអ្នកនាងនៅសន្សំចិត្តផ្តល់កម្លាំងចិត្តតស៊ូរស់ បើទោះបីជាឆាកជីវិតអតីតកាលរបស់នាងមានភាពខ្មៅអួលអាប់យ៉ាងណាក៏ដោយ ។
យ៉ាងណាក្តីស្រមៃ និងបំណងរបស់អ្នកនាងនាពេលនេះ បានសម្រេចជារូបរាងហើយ បន្ទាប់ពីនាងបានបង្ហាញវត្តមានចូលរួមនៅក្នុងពិធីជួបជុំញាំអាហារជាមួយនឹងមិត្តភក្តិសិល្បៈរួមជំនាន់របស់នាង ក្រោយពីការមកលេងស្រុករបស់លោក សុវណ្ណ មុន្នី ។
ក្រោយការជួបជុំគ្នាយ៉ាងសប្បាយរីករាយនោះ អ្នកនាង អ៊ឹម សុវណ្ណផល្លា បានបង្ហោះរូបភាពជាច្រើនសន្លឹក តាមបណ្តាញសង្គមហ្វេសប៊ុកដោយភ្ជាប់ជាមួយនឹងសំណេរថា «នាងខ្ញុំ អ៊ឹម សុវណ្ណផល្លា បានឃ្លាតឆ្ងាយពីអាជីពសិល្បៈអស់រយៈពេល22ឆ្នាំ ហើយនៅក្នុងការរស់នៅអស់រយៈពេល22ឆ្នាំរបស់នាងខ្ញុំ ខ្ញុំបានជួបរឿងរ៉ាវជាច្រើនក្នុងឆាកជីវិត តែខ្ញុំនៅតែតស៊ូរស់ដើម្បី មានថ្ងៃមួយបានមកជួបជុំមិត្តរួមអាជីព ធ្វើឱ្យខ្ញុំមានភាពកក់ក្ដៅ» ។
អ្នកនាងបញ្ជាក់ថា «មានមិត្តចាស់ៗមួយចំនួនបានបំភ្លេចនាងខ្ញុំ ប៉ុន្តែនាងខ្ញុំមិនអាចបំភ្លេចបាននៅមិត្តរួមអាជីពដែលជាកំសត់កម្រជាមួយនឹងគ្នានោះឡើយ» ។
អ្នកនាងថា «កាលអញ្ជើញមកដល់របស់បងប្រុស សុវណ្ណមុន្នី ធ្វើឲ្យតារារួមអាជីពបានជួបជុំគ្នាយ៉ាងសប្បាយរីករាយ។ ពួកយើងជួបគ្នាសួរនាំគ្នាអំពីរឿងសុខភាពព្រោះថា យើងចាស់ៗអស់ហើយអ្វីដែលសំខាន់បំផុត ពួកយើងនៅមានសុខភាពល្អ» ។
ជាការកត់សម្គាល់ អតីតារាសម្តែងលោក សុវណ្ណ មុន្នី បានមកលេងស្រុកកំណើតជាថ្មី និងបានរៀបចំពិធីជួបជុំមិត្តភក្តិចាស់ៗដែលជាអ្នកសិល្បៈរួមជំនាន់កាលពីថ្ងៃទី២៧ ខែធ្នូ ឆ្នាំ២០២២ នៅក្នុងរមណីយដ្ឋានមួយកន្លែងក្នុងរាជធានីភ្នំពេញ ។
នៅក្នុងពិធីជួបជុំនាពេលនោះ គេសង្កេតមានវត្តមានលោក ទេព រិនដារ៉ូ, លោកគង់ សុភី, លោកហម ឈរ៉ា, លោក យុត្ថា ឆ៉ានី, អ្នកនាង ឯក អមរា និងអ្នកនាង អ៊ឹម សុវណ្ណផល្លា ដែលអ្នកទាំងអស់នោះ សុទ្ធតែជាមិត្តភក្តិរួមជំនាន់នៅក្នុងវិស័យសិល្បៈក្នុងអំឡុងឆ្នាំ១៩៩០ ។
ចែករំលែកព័តមាននេះ