រាជធានីភ្នំពេញ ៖ នៅប៉ុន្មានថ្ងៃចុងក្រោយនេះ មហាជន ជាពិសេសបណ្តាអ្នកលេងហ្វេសប៊ុកបានដាក់ការសង្ស័យថា ចំណងស្នេហ៍ជាប្តីប្រពន្ធរបស់តារាសម្តែងអ្នកនាង នៅ សូនីតា និងលោក ទិត្យ ថាវរិទ្ធ កំពុងតែជួបភាពរង្គោះរង្គើ ក្រោយរួមរស់ជាមួយគ្នាអស់ជាច្រើនឆ្នាំមកនេះ។
ការដាក់សង្ស័យខាងលើ ពីបណ្តាអ្នកលេងបណ្តាញសង្គមនាពេលនេះបានកើតឡើង បន្ទាប់ពីមួយរយៈចុងក្រោយនេះគេសង្កេតឃើញអ្នកនាង នៅ សូនីតា បានបង្ហោះសារប្លែកៗហាក់បង្ហាញអារម្មណ៍ពីភាពឯកា និងខូចចិត្តនៅក្នុងចិត្តដែលនាងកំពុងតែជួបនាពេលនេះ។
ដោយឡែក អ្វីដែលកាន់តែធ្វើឲ្យគេចាប់អារម្មណ៍ខ្លាំងទៀតនោះ នៅ សូនីតា ក៏បានផ្លាស់ប្តូរពាក្យ single Mom នៅលើគណនីហ្វេសប៊ុករបស់ខ្លួន ដែលនោះហាក់បញ្ជាក់ថា អំឡុងពេលនេះនាងកំពុងនៅជាមេម៉ាយ។
ជាមួយនេះដែរ នៅ សូនីតា ក៏បានបង្ហោះសារប្លែកជាបន្តបន្ទាប់ថា ជាតិនេះប្រហែលមិនអាចរកមនុស្សស្មោះត្រង់មករក្សាបានទេ សំខាន់ថ្មីជាចំណីចក្ខុ ល្ងង់នៅល្ងង់ បោ.កនៅតែបោ.ក ស្អាតប៉ុណ្ណាក៏គេនៅតែក្បត់ ត្រឹមមនុស្សស្រីធម្មតាដែលគេតែងមើលរំលងលើភាពស្មោះត្រង់។
តាមរយៈការបង្ហោះសារខាងលើនេះ ហាក់បង្ហាញឲ្យមហាជនមានការសង្ស័យថា ចំណងស្នេហ៍រវាងអ្នកនាង នៅ សូនីតា និងលោក ទិត្យ ថាវរិទ្ធ ហាក់កំពុងជួបបញ្ហារង្គោះរង្គើ ខណៈពេលដែលមួយរយៈចុងក្រោយនេះ ពួកគេទាំងពីរក៏មិនសូវបង្ហាញរូបភាពរួមគ្នាផងដែរ។
យ៉ាងណា បន្ទាប់ពីបង្ហោះសារធ្វើឲ្យមហាជនមានការភ្ញាក់ផ្អើលខាងលើនេះ នៅ សូនីតា ក៏បានលុបសារនោះចោលវិញ ក្រោយពីមានការចុះផ្សាយពីបណ្តាសារព័ត៌មាននៅក្នុងស្រុកមួយចំនួនជុំវិញបញ្ហានេះ។ ដោយឡែកសម្រាប់លោក ទិត្យ ថាវរិទ្ធ វិញ ហាក់មិនបានបង្ហាញអារម្មណ៍បែបណានៅឡើយទេ នៅលើគណនីហ្វេសប៊ុករបស់លោក ប៉ុន្តែលោកបានចាប់អារម្មណ៍ និងបានចែកចាយបន្តនូវការចុះផ្សាយពីសារព័ត៌មានក្នុងស្រុកមួយ ពាក់ព័ន្ធទៅលើបញ្ហាខាងលើនេះ។
ទោះជាយ៉ាងណារហូតមកទល់នាពេលនេះ គេនៅមិនទាន់ដឹងច្បាស់នៅឡើយទេថា តើការសង្ស័យពីការរង្គោះរង្គើលពីចំណងស្នេហ៍របស់ នៅ សូនីតា និងលោក ទិត្យ ថាវរិទ្ធ នាពេលនេះ ជាការពិតឬយ៉ាងណា? ក្នុងពេលដែលអ្នកទាំងពីរនៅមិនទាន់ចេញមុខមកបញ្ជាក់នៅឡើយ។
ជាការកត់សម្គាល់ ចំណងស្នេហ៍រវាង នៅ សូនីតា និងលោក ទិត្យ ថាវរិទ្ធ បានសាយភាយតាំងពីពាក់កណ្ដាលឆ្នាំ២០១៨ ប៉ុន្តែភាគីទាំងសងខាងនៅរក្សាភាពស្ងប់ស្ងាត់ ដោយមិនចេញមុខមកបភ្លឺអ្វីឡើយ ទើបឈានមកដល់ដើមឆ្នាំ២០១៩ ដំណឹងនោះ ភាគីខាងស្រីចាប់ផ្ដើមបើកចំហរបន្តិចម្ដងៗ ដោយគេបានប្រទះឃើញរូបភាពលោក ថាវរិទ្ធ តាំងនៅផ្ទះរបស់នាង និងមានធ្លាយរូបពួកគេទាំងពីរដើរកម្សាន្តជាមួយគ្នាផង។
ក្រោយបញ្ចេញរូបភាពទាំងអស់នោះមក នៅ សូនីតា ក៏បានសារភាពពីទំនាក់ទំនងរវាងនាង និងលោក ទិត្យ ថាវរិទ្ធ ដែលជាអនុរដ្ឋលេខាធិការក្រសួងវប្បធម៌ និងវិចិត្រសិល្បៈ គឺជាការពិត ហើយពួកគេបានរៀបចំពិធីមង្គលការតូចមួយ ដោយមិនបានរៀបចំធំដុំហៅភ្ញៀវច្រើននោះឡើយ។ ក្រោយចាប់ដៃគ្នាជាប្តីប្រពន្ធរួមរស់ជាមួយគ្នាមក បច្ចុប្បន្នអ្នកទាំងពីរក៏ទទួលបានចំណងដៃកូនប្រុសម្នាក់រួចហើយ៕
ចែករំលែកព័តមាននេះ