រឿងផឹកស៊ីចាក់ធុងបាស់បង្កសំឡេងរំខានរហូតផ្ទុះសង្គ្រាម ផ្អើលកម្លាំងអាវុធចុះដាក់ខ្នោះ
- ភ្នំពេញ
ជម្លោះរឿងចាក់ធុងបាស់បង្កសំលេងរំខានដល់បន្ទប់ជួលអ្នកជិតខាង ក៏ឈានទៅដល់ការប្រើហិ.ង្សាទៅវិញទៅមក រហូតផ្អើល
រាជធានីភ្នំពេញ ៖ បើតាមសេចក្តីការណ៍បានឱ្យដឹងថា ជម្លោះរឿងចាក់ធុងបាស់បង្កសំលេងរំខានដល់បន្ទប់ជួលអ្នកជិតខាង ក៏ឈានទៅដល់ការប្រើហិ.ង្សាទៅវិញទៅមក រហូតផ្អើលដល់កម្លាំងអាវុធហត្ថខណ្ឌមានជ័យ ចុះអន្តរាគមន៍ និងបានហៅភាគីទាំងសងខាងទៅមូលដ្ឋានអាវុធហត្ថដើម្បីសាកសួរ ក៏ស្រាប់ភាគីម្ខាងមិនព្រមទៅ ហើយក៏ត្រូវបានកម្លាំងអាវុធហត្ថខណ្ឌចាប់វា.យខ្នោះ បង្កឱ្យមានការផ្អើលឆោឡោដល់ប្រជាពលរដ្ឋនៅបន្ទប់ជួលមកចោមរោមមើលយ៉ាងព្រោងព្រាត កាលពីវេលាម៉ោង១០យប់ ថ្ងៃទី២៥ ខែធ្នូ ឆ្នាំ២០២២ នៅចំណុចបន្ទប់ជួលមួយកន្លែង ជិតស្តុបសេះមាស ផ្លូវវេងស្រេង ស្ថិតក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ។
បើយោងតាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គឺភាគីខាងបុរសម្នាក់ដែលត្រូវបានកម្លាំងអាវុធហត្ថចាប់វា.យខ្នោះនោះ គឺបាននាំគ្នាផឹកស៊ី និងចាក់ធុងបាស់បង្កសំលេងរំខានដល់បន្ទប់ជួលមួយផ្សេងទៀត ដែលជាភាគីជម្លោះ ខណៈកំពុងតែមានកូនតូចហើយដេកអត់បាន ទើបភាគីដែលមានកូនតូចទៅប្រាប់អោយឈប់ចាក់ធុងបាស់ ហើយភាគីខាងអ្នកចាក់ធុងបាស់វិញក៏បាននាំគ្នាបិទឈប់ចាក់ធុងបាស់ដែរ។
ប្រភពដដែលបន្តថា តែមិនដឹងយ៉ាងម៉េច មួយសន្ទុះក្រោយមក ក៏ស្រាប់តែបុរសដែលជាអ្នករស់នៅក្នុងបន្ទប់ដែលមានកូនតូច បានជិះម៉ូតូចេញពីកន្លែងលក់ផ្លែឈើមកបន្ទប់ជួលវិញ បានមើលមុខគ្នាឌឺដង រហូតដល់ឈានការប្រើប្រាស់ហិ.ង្សាទៅវិញទៅមក ធ្វើភាគីទាំង២រងរបួសតិចតួច។ បន្ទាប់ពីប្រើប្រាស់ហិ.ង្សារួចហើយ ក៏មានអ្នកតេទៅលេខ១២៩១ ខាងកម្លាំងអាវុធហត្ថរាជធានីភ្នំពេញ ដើម្បីអោយកម្លាំងចុះទៅកន្លែងកើតហេតុជួយអន្តរាគមន៍ផងដែរ។
ប្រភពដដែលបន្តទៀតថា លុះបន្តិចក្រោយមក គេឃើញមានកម្លាំងអាវុធហត្ថខណ្ឌមានជ័យបានចុះទៅកន្លែងកើតហេតុ ដើម្បីសួរនាំដំណើររឿង និងនាំភាគីទាំងសងខាងទៅស្នងការអាវុធហត្ថខណ្ឌមានជ័យ ដើម្បីសួរនាំ ស្រាប់តែពេលនោះភាគីបុរសខាងអ្នកចាក់ធុងបាស់ប្រកែក និងមិនព្រមសហការជាមួយនឹងកងកម្លាំងនោះទេ ទើបកម្លាំងអាវុធហត្ថចាប់វា.យខ្នោះ ហើយនាំយកទៅសាកសួរនៅមូលដ្ឋានអាវុធហត្ថខណ្ឌមានជ័យតែម្ដងទៅ។
ទោះជាយ៉ាងណាក្នុងករណីខាងលើនេះដែរ ប្រជាពលរដ្ឋដែលរស់នៅជិតបន្ទប់ជួលដូចគ្នា បានលើកឡើងថា ភាគីទាំងសងខាង មិនសូវជាត្រូវគ្នាជាយូរមកហើយ តែទោះជាយ៉ាងណា ប្រជាពលរដ្ឋបានផ្តោតទៅការចាប់មនុស្សដាក់ខ្នោះតែម្ខាងរបស់ខាងកងរាជអាវុធហត្ថ ដូចជាមិនសមរម្យនោះទេ គឺគ្រាន់តែរឿងបន្តិចបន្តួចតែប៉ុណ្ណោះ បើចាប់ឃាត់ខ្លួន ហេតុអ្វីមិនចាប់ភាគីទាំងសងខាង?៕
ចែករំលែកព័តមាននេះ