ចោរលួចរថយន្តពីក្រុងកំពង់ចាម ទៅប្លុងចោលនៅស្រុកកំពង់សៀម
ខេត្តកំពង់ចាម ៖ រថយន្ត១គ្រឿងម៉ាកសាំយ៉ុងពណ៌ស ពាក់ស្លាកលេខ ភ្នំពេញ1Q-5304 ត្រូវបានគេប្រទះឃើញបើកមកចតត្រង់មុខផ្ទះ របស់ប្រជាពលរដ្ឋក្នុងភូមិស្តេចនន
ខេត្តកំពង់ចាម ៖ រថយន្ត១គ្រឿងម៉ាកសាំយ៉ុងពណ៌ស ពាក់ស្លាកលេខ ភ្នំពេញ1Q-5304 ត្រូវបានគេប្រទះឃើញបើកមកចតត្រង់មុខផ្ទះ របស់ប្រជាពលរដ្ឋក្នុងភូមិស្តេចនន ឃុំក្រឡា ស្រុកកំពង់សៀម តាំងពីវេលាម៉ោង២រំលងអាធ្រាត្រ ឈានចូលថ្ងៃទី១៦ មិថុនា ២០១៧។ រហូតដល់ពេលព្រឹកឡើងភ្លឺច្បាស់មិនឃើញមនុស្សនៅលើរថយន្ត ទើបសង្ស័យអាចចោរលួចបើកមកពីកន្លែងណាមួយ។ លោកវរសេនីយ៍ទោ ឯក ប៉ាន់ដន អធិការនគរបាលស្រុកកំពង់សៀម ប្រាប់ឲ្យដឹងថា ដំបូងគ្មានអ្នកណាម្នាក់ចាប់អារម្មណ៍នោះទេ ព្រោះតែនឹកស្មានតែតៃកុងរថយន្តបើកមកពីស្រុកឆ្ងាយអស់កម្លាំងហើយមកចតអែបខាងដើម្បីដេកយកកម្លាំងរួចនឹងបន្តដំណើរទៅមុខទៀត។
លុះមកដល់ភ្លឺច្បាស់ប្រជាពលរដ្ឋបាននាំគ្នាដើរទៅមើលមិនឃើញមានមនុស្សម្នាក់នៅលើរថយន្តសោះ ក៏ប្រញាប់រាយការណ៍មកលោកនាយប៉ុស្តិ៍រដ្ឋបាលឃុំក្រឡា ដើម្បីឲ្យទៅពិនិត្យមើល។ លោកវរសេនីយ៍ទោ ឯក ប៉ាន់ដន អធិការនគរបាលស្រុកកំពង់សៀម ប្រាប់បន្តថា ពេលដែលពិនិត្យរួចរាល់នោះរូបលោកបានរាយការណ៍មកកលោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្តទទួលផែនកណ្តាលយុត្តិធម៌ ឲ្យបានដឹងហើយក៏ផ្សព្វផ្សាយទៅតាមបណ្តាស្រុក-ក្រុងផ្សេងៗទៀតទើបដឹងថា រថយន្តខាងលើនេះត្រូវបានចោលួចពីត្រង់ចំណុចភូមីទី៥ សង្កាត់វាលវង់ ក្រុងកំពង់ចាម ដោយមានម្ចាស់ឈ្មោះ ថន អៀច ភេទប្រុស អាយុ៥៤ឆ្នាំ បានទុកចតនៅមុខផ្ទះ។
ហើយនៅវេលាម៉ោង៩ព្រឹក ថ្ងៃទី១៦ មិថុនា ដដែលនេះ រថយន្តត្រូវបានប្រគល់ជូនម្ចាស់វិញ ធ្វើឲ្យគាត់មានសេចក្តីត្រេតកអរដែលមិននឹកស្មានថា របស់បាត់ទៅហើយនោះ បានរកឃើញមកវិញ។ រថយន្តនេះសំណាងល្អនៅពេលដែលចោរលួចបើកតាមផ្លូវជាតិលេខ៧ ក្នុងគោលបំណងយកទៅកន្លែងណាមួយ ស្របពេលមកដល់ត្រង់ភូមិស្តេចនន ឃុំក្រឡា ស្រុកកំពង់សៀម រថយន្តបានខូចចំណែកចោរបានរត់គេចខ្លួនបាត់ដោយមិនស្គាល់អត្តសញ្ញាណនោះទេ។
លោកអនុសេនីយ៍ទោ ម៉ៅ ឡុក នាយប៉ុស្តិ៍រដ្ឋបាលសង្កាត់វាលវង់ ឲ្យដឹងដែរថា រថយន្តខាងលើនេះត្រូវបានម្ចាស់ឈ្មោះ អៀច ទុកនៅមុខបន្ទប់ផ្ទះជួលក្នុងភូមិទី៥ សង្កាត់វាលវង់ ក្រុងកំពង់ចាម នៅយប់ថ្ងៃទី១៥ មិថុនា ២០១៧ លុះមកដល់ម៉ោង៧និង៤៥នាទីព្រឹក ថ្ងៃទី១៦មិថុនា ទើបដឹងថាបាត់រថយន្តរបស់ខ្លួនបន្ទាប់ពីក្រោកពីដេកចេញមកក្រៅមិនឃើញរថយន្ត ហើយប្រញាប់មកប្តឹងប៉ុស្តិ៍សង្កាត់វាល់វង់ ដើម្បីឲ្យជួយអន្តរាគមន៍តាមរករថយន្តនោះ។ ពេលដែលមានការស្រាវជ្រាវទើបដឹងថារថយន្តដែលបាត់នោះត្រូវចោរលួចបើកយកទៅផ្លុងចោលនៅស្រុកកំពង់សៀមឯណោះ៕
ចែករំលែកព័តមាននេះ