សិល្បករទាំងចាស់ និងថ្មី ប្រមាណជិត៣០០នាក់ បានត្រៀមខ្លួនបង្ហាញការសម្តែងរបស់ខ្លួន នៅក្នុងព្រឹត្តិការណ៍វប្បធម៌ដ៏ធំប្រចាំឆ្នាំ ដែលមានឈ្មោះថា
រាជធានីភ្នំពេញ ៖ សិល្បករទាំងចាស់ និងថ្មី ប្រមាណជិត៣០០នាក់ បានត្រៀមខ្លួនបង្ហាញការសម្តែងរបស់ខ្លួន នៅក្នុងព្រឹត្តិការណ៍វប្បធម៌ដ៏ធំប្រចាំឆ្នាំ ដែលមានឈ្មោះថា «រាត្រីចងចាំ» នៅក្នុងបរិវេណប្រាសាទអង្គរវត្ត នាខេត្តសៀមរាប។ ព្រឹត្តិការណ៍វប្បធម៌ដែលរៀបចំឡើងដោយក្រសួងវប្បធម៌ និងវិចិត្រសិល្បៈនេះ ក្នុងគោលបំណងដើម្បីចូលរួមអបអរសាទរខួបអនុស្សាវរីយ៍៣០ឆ្នាំ នៃការដាក់បញ្ចូលតំបន់ប្រាសាទអង្គរជាសម្បត្តិបេតិកភណ្ឌពិភពលោក។
ព្រឹត្តការណ៍ខាងលើនេះ រៀបចំឡើងមានរយៈពេល៣ថ្ងៃ គឺចាប់ពីថ្ងៃទី១៤ រហូតដល់ថ្ងៃទី១៦ ខែធ្នូ ឆ្នាំ២០២២នាពេលខាងមុខ ដោយបើកអោយមហាជនចូលរួមទស្សនាដោយសេរីនៅបរិវេណខាងកើត ប្រាសាទអង្គរវត្ត ខេត្តសៀមរាប។
ប្រធានសមាគមសិល្បករខ្មែរ និងជាតួអង្គសម្តែងធំមួយនៅក្នុងព្រឹត្តការណ៍ខាងលើ បានចែកចាយរូបភាពនៅលើបណ្តាញសង្គមហ្វេសប៊ុក នៃសកម្មភាពការសម្តែងសម និងថតរូបផ្សព្វផ្សាយសម្រាប់អ្នកសិល្បៈដែលបានចូលរួមសម្តែង។
ដោយឡែកតារាសម្តែង និង អ៊ុន សុទ្ធា ក៏បានបង្ហោះរូបភាពរបស់ខ្លួនដែលជាតួអង្គដ៏សំខាន់ម្នាក់ ដោយភ្ជាប់ជាមួយនឹងសារថា «បេះដូងសិល្បៈខ្ញុំស្រលាញ់វប្បធម៌ខ្មែរ ថ្ងៃទី១៤ ខែធ្នូ ឆ្នាំ២០២២ ការចូលរួម ការ shear ការចែករំលែក បង្ហាញពីវប្បធម៌អរិយធម៌ខ្មែរ ទៅដល់ពិភពលោក គឺមិនអស់ថ្លៃទេមែនទេ? ដូច្នេះយើងជាកូនខ្មែរ ប្រជាជនខ្មែរ ប្រទេសកម្ពុជា គឺមានវប្បធម៌ អរិយធម៌ ខ្ពង់ខ្ពស់ដ៏អស្ចារ្យ។ មិនត្រឹមតែការសម្តែងស្តែងពីប្រវត្តិសាស្ត្រខ្មែរនាសម័យអង្គរនេះប៉ុណ្ណោះទេ ព្រឹត្តិការណ៍នេះ ក៏មានការសម្តែងសិល្បៈល្ខោនខោល ក្បាច់គុនល្បុក្កតោ ដែលទើបចុះបញ្ជីជាបេតិភណ្ឌអរូបីរបស់អង្គការយូណេស្កូ និងការសម្តែងសិល្បៈជាច្រើនទម្រង់ទៀតផងដែរ»។
ជាការកត់សម្គាល់ បើគ្មានអ្វីប្រែប្រួលទេ ព្រឹត្តិការណ៍រំឭកគុណអង្គរ នឹងធ្វើឡើងចំនួន៣ថ្ងៃ គឺចាប់ពីថ្ងៃទី១៤ រហូតដល់ថ្ងៃទី១៦ ខែធ្នូ ឆ្នាំ២០២២ ដែលមានកម្មវិធីសាសនា ស្ដង់ពិព័រណ៌ និងការសម្ដែងសិល្បៈបុរាណនៅពេលរាត្រី។
លោក ឡុង កុសល អគ្គនាយករងអាជ្ញាធរជាតិអប្សរា បានឲ្យដឹងថា ព្រឹត្តិការណ៍នេះ ក៏មាននូវទស្សនីយភាពជាច្រើនដូចជា កម្មវិធីបែបសាសនាសំខាន់ៗ ការតាំងពិព័រណ៍បង្ហាញសមិទ្ធផលការងាររយៈពេល៣០ឆ្នាំកន្លងមករបស់អាជ្ញាធរជាតិអប្សរា ស្នាដៃសិល្បៈជាច្រើន ដែលបានចុះក្នុងបញ្ជីបេតិកភណ្ឌអរូបី នៃអង្គការយូណេស្កូ ការសម្តែងអាយ៉ៃឆ្លើយឆ្លង ដោយលោក ព្រហ្ម ម៉ាញ ព្រមទាំងការចាក់បញ្ចាំងភាពយន្តអំពីអង្គរជាដើម។
សូមជម្រាបថា នេះជាឆ្នាំទី២ហើយ ដែលអាជ្ញាធរជាតិអប្សរា បានរៀបព្រឹតិ្តការណ៍រំលឹកគុណអង្គរនេះ។ ហើយព្រឹត្តិការណ៍នេះ រៀបចំឡើងក្នុងគោលបំណង ដើម្បីរំលឹកគុណអង្គព្រះមហាក្សត្រគ្រប់ព្រះអង្គ និងបុព្វការីជន ដែលលោកបានកសាង និងថែរក្សាប្រាសាទទាំងអស់ នៅក្នុងរមណីយដ្ឋានអង្គរ ដោយបានផ្តល់អត្ថប្រយោជន៍ជាច្រើន ដល់ជាតិមាតុភូមិ តាំងពីដើមរហូតដល់សព្វថ្ងៃ៕
ចែករំលែកព័តមាននេះ