World Cup 2022 ៖ ជប៉ុនបង្កើតរឿងដ៏អស្ចារ្យបំផុត ដែលពិភពលោកស្មានមិនដល់
កាតា ៖ បើទោះជាការប្រកួត កាលពីថ្ងៃទី០១ ខែធ្នូ ឆ្នាំ២០២២ មានម្ខាងឈ្នះ ម្ខាងចាញ់យ៉ាងណាក៏
កាតា ៖ បើទោះជាការប្រកួត កាលពីថ្ងៃទី០១ ខែធ្នូ ឆ្នាំ២០២២ មានម្ខាងឈ្នះ ម្ខាងចាញ់យ៉ាងណាក៏ដោយ ក៏ជប៉ុន និងអេស្ប៉ាញ បានដឹកដៃគ្នាឡើងទៅកាន់វគ្គ១៦ក្រុមចុងក្រោយនៃព្រឹត្តិការណ៍ World Cup 2022 នៅប្រទេសកាតា ខណៈអាល្លឺម៉ង់ បានត្រឹមខកចិត្ត ដែលធ្លាក់ត្រឹមការប្រកួតជុំទី៣ វគ្គជម្រុះក្នុងពូល។
ការប្រកួតក្នុងពូល E បានបញ្ចប់ទៅ ជាមួយភាពភ្ញាក់ផ្អើលជាទីបំផុត នៅពេលដែលក្រុមសាំមូរ៉ៃ ជប៉ុន បានវាយបកយកឈ្នះលើក្រុមគោជល់ អេស្ប៉ាញ ដោយលទ្ធផល ២-១ ដើម្បីរួមដំណើរជាមួយគ្នា ឡើងទៅវគ្គ១៦ក្រុមចុងក្រោយ បើទោះជាឥន្ទ្រីដែក អាល្លឺម៉ង់យកឈ្នះលើទាហានមរណៈ កូស្តារីកា ដោយលទ្ធផល ៤-២ យ៉ាងណាក៏ដោយ ក៏អាល្លឺម៉ង់ត្រូវធ្លាក់ចេញពីព្រឹត្តិការណ៍ឆ្នាំនេះ ដោយចាញ់គ្រាប់បាល់ចំណេញជាមួយអេស្ប៉ាញ។ នៅក្នុងពូលនេះ បញ្ចប់ទៅដោយជប៉ុនឈរកំពូលតារាងមាន៦ពិន្ទុ ចំណែកអេស្ប៉ាញមាន៤ពិន្ទុ ស្មើជាមួយអាល្លឺម៉ង់ ខណៈដែលកូស្តារីកានៅបាតតារាងមាន៣ពិន្ទុ។
ជប៉ុន បានបង្កើតរឿងដ៏អស្ចារ្យបំផុតនៅ World Cup 2022 ដែលពិភពលោកនឹកស្មានមិនដល់ ដោយបានវាយបកយកឈ្នះអាល្លឺម៉ង់ ដោយលទ្ធផល ២-១ នៅការប្រកួតជុំទី១ នៃវគ្គជម្រុះក្នុងពូល និងបន្តវាយបកយកឈ្នះអេស្ប៉ាញ ដោយលទ្ធផល ២-១ ថែមទៀត ដើម្បីដណ្តើមឱកាសមាសឡើងទៅវគ្គ១៦ក្រុមចុងក្រោយ ជាលើកទី៤ ក្នុងប្រវត្តិសាស្ត្ររបស់ខ្លួន។
អាល្លឺម៉ង់ ក្នុងនាមជាក្រុមឈ្នះជើងឯក World Cup ច្រើនលំដាប់ទី២ពិភពលោក ពោលគឺ៤ដង បែរជាជាន់ដានចាស់ ខកចិត្តសារជាថ្មីម្តងទៀត ដោយធ្លាក់ចេញពីព្រឹត្តិការណ៍បាល់ទាត់ធំបំផុតរបស់ពិភពលោកមួយនេះ ត្រឹមវគ្គជម្រុះក្នុងពូល ២ព្រឹត្តិការណ៍ជាប់ៗគ្នា ពោលគឺនៅឆ្នាំ២០១៨ នៅរុស្ស៊ី និងឆ្នាំនេះ នៅកាតា។
ដោយឡែក ក្រឡេកទៅកាន់ការប្រកួតក្នុងពូល F បានបញ្ចប់ទៅដោយម៉ារ៉ុក ដឹកដៃក្រូអាតឡើងទៅវគ្គ១៦ក្រុមចុងក្រោយ ខណៈដែលបែលហ្ស៊ិក និងកាណាដា ត្រូវហាលអាវត្រឹមវគ្គជម្រុះក្នុងពូល។
ក្រុមតោឈ្មោលដែនដីអាត្លាស់ ម៉ារ៉ុក បានយកឈ្នះលើក្រុមទ័ពក្រហម កាណាដា ដោយលទ្ធផល ២-១ ដើម្បីបន្តឡើងទៅវគ្គ១៦ក្រុមចុងក្រោយជាលើកទី២ ក្នុងប្រវត្តិសាស្ត្ររបស់ខ្លួន។ ស្របពេលដែលការប្រកួតរវាងក្រុមអណ្តាតភ្លើង ក្រូអាត នឹងក្រុមបិសាចក្រហម បែលហ្ស៊ិក បញ្ចប់ទៅដោយគ្មានគ្រាប់ស៊ុតបញ្ចូលទីគ្នា។
នៅក្នុងពូលនេះ បញ្ចប់ទៅដោយម៉ារ៉ុក កាន់កាប់កំពូលតារាងមាន៧ពិន្ទុ ក្រួអាតមាន៥ពិន្ទុ បែលហ្ស៊ិកមាន៤ពិន្ទុ ចំណែកឯកាណាដា នៅបាតតារាងគ្មានពិន្ទុរាប់។ សម្រាប់ព្រឹត្តិការណ៍ World Cup 2022 មានតែម្ចាស់ផ្ទះកាតា និងកាណាដា ប៉ុណ្ណោះ ដែលបញ្ចប់ភារកិច្ចរបស់ខ្លួន ត្រឹមវគ្គជម្រុះក្នុងពូល ដោយគ្មានពិន្ទុរាប់។
គិតត្រឹមបញ្ចប់ការប្រកួត កាលពីថ្ងៃទី០១ ខែធ្នូ ឆ្នាំ២០២២ ក្រុមចំនួន១៤ហើយ បានកក់កៅអីវគ្គ១៦ក្រុមចុងក្រោយ រួមមាន ៖ បារាំង ប្រេស៊ីល ព័រទុយហ្គាល់ ហូឡង់ អង់គ្លេស អាហ្សង់ទីន ជប៉ុន ម៉ារ៉ុក សេណេហ្គាល់ សហរដ្ឋអាមេរិក ប៉ូឡូញ អូស្ត្រាលី អេស្ប៉ាញ និង ក្រូអាត ។
ខាងក្រោមនេះ ជាក្រុមដែលនឹងត្រូវប៉ះគ្នា នៅវគ្គ១៦ក្រុមចុងក្រោយ រួមមាន ៖
-នៅថ្ងៃទី០៣ ខែធ្នូ ៖ ហូឡង់ ក្រុមកំពូលតារាងពូល A ត្រូវប៉ះ សហរដ្ឋអាមេរិក ក្រុមចំណាត់ថ្នាក់លេខ២ ពូល B វេលាម៉ោង ១០:០០នាទីយប់ (ម៉ោងនៅកម្ពុជា)
-នៅថ្ងៃទី០៣ ខែធ្នូ ៖ អាហ្សង់ទីន ក្រុមកំពូលតារាងពូល C ត្រូវប៉ះ អូស្ត្រាលី ក្រុមចំណាត់ថ្នាក់លេខ២
ពូល D វេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៤ ខែធ្នូ
-នៅថ្ងៃទី០៤ ខែធ្នូ ៖ ក្រុមការពារតំណែងជើងឯក បារាំង ក្រុមកំពូលតារាងពូល D ត្រូវប៉ះ ប៉ូឡូញ ក្រុមចំណាត់ថ្នាក់លេខ២ ពូល C វេលាម៉ោង ១០:០០នាទីយប់
-នៅថ្ងៃទី០៤ ខែធ្នូ ៖ អង់គ្លេស ក្រុមកំពូលតារាងពូល B ត្រូវប៉ះ សេណេហ្គាល់ ក្រុមចំណាត់ថ្នាក់លេខ២
ពូល A វេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៥ ខែធ្នូ
-នៅថ្ងៃទី០៥ ខែធ្នូ ៖ ជប៉ុន ក្រុមកំពូលតារាងពូល E ត្រូវប៉ះ ក្រូអាត ក្រុមចំណាត់ថ្នាក់លេខ២ ពូល F វេលាម៉ោង ១០:០០នាទីយប់
-នៅថ្ងៃទី០៦ ខែធ្នូ ៖ ម៉ារ៉ុក ក្រុមកំពូលតារាងពូល F ត្រូវប៉ះ អេស្ប៉ាញ ក្រុមចំណាត់ថ្នាក់លេខ២ ពូល E វេលាម៉ោង ១០:០០នាទីយប់។
ដោយឡែក ខាងក្រោមនេះ គឺជាការប្រកួតនៅក្នុងថ្ងៃទី០២ ខែធ្នូ ឆ្នាំ២០២២ ដែលជាការប្រកួតជុំទី៣ ការប្រកួតបិទបញ្ចប់វគ្គជម្រុះក្នុងពូល នៃព្រឹត្តិការណ៍ World Cup 2022 រួមមាន ៖
ពូល H លេងនៅវេលាម៉ោង ១០:០០នាទីយប់ ៖
-កូរ៉េខាងត្បូង ត្រូវប៉ះ ព័រទុយហ្គាល់
-ហ្គាណា ត្រូវប៉ះ អ៊ុយរ៉ូហ្គាយ
ពូល G នៅវេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៣ ខែធ្នូ ៖
-ស៊ែប ត្រូវប៉ះ ស្វីស
-កាមេរូន ត្រូវប៉ះ ប្រេស៊ីល៕ (ដកស្រង់ចេញពី FIFA)
ចែករំលែកព័តមាននេះ