រាជធានីភ្នំពេញ ៖ កញ្ញាសឿន ផាភួង ហាក់ព្រួយចិត្តដ្បិតនាងបានបង្កើតការទាក់ទងជាមួយតារាសម្តែងយុទ្ឋ ឋានៈ ធ្វើឱ្យមហាជនយល់ច្រឡំរឿងស្នេហ៍ ។ រវាងនាង និងលោកយុទ្ឋ ឋានៈ ជាមិត្តជិតដិត ហើយនាងខ្លាចស្នេហាក្លែងក្លាយមួយនេះកាន់តែរីកសាយឡើង ។
កញ្ញាសឿន ផាភួង ភ័យខ្លាចលោកយុទ្ឋ ឋានៈ ចិត្តទោរទន់ស្នេហានាងមែនទែនបន្ទាប់ពីនាងបង្កើតភាពស្និទ្ធស្នាលជាមួយលោក ។ នាងខ្លាចលោកឋានៈស្រឡាញ់នាងធ្វើឱ្យមនុស្សដែលចង់ស្រឡាញ់នាងមិនហ៊ាននៅជិត ឬស្រឡាញ់នាង ។ កាន់តែធ្ងន់នោះលោកយុទ្ឋ ឋានៈតែងតែបង្ហោះនៅលើហ្វេសបុកជាញឹកញាប់ទាក់ទិននឹងអត្ថន័យស្នេហាជាមួយនាង ។ ដូច្នេះហើយផាភួងបានប្រាប់លោកឋានៈថា«កុំលេងពាក្យអីស៊ីជម្រៅ ត្រាម៉ាពេញហ្នឹងពេក ព្រោះអ្នកសិល្បៈគេឆ្ងល់ និងសួរនាំណាស់ ខ្លាចគេថាមែនទែន» ។
សឿន ផាភួង លើកឡើងថារវាងនាង និងលោកយុទ្ឋ ឋានៈមានគេយល់ខុសថាស្រឡាញ់គ្នា ព្រោះនាងនិយមថតរូបជាមួយលោកពេលមានកម្មវិធី ។ ការថតរូបជាមួយគ្នាមកពីយល់ថាជាមិត្តភក្តិក្នុងសិល្បៈ ។ រូបភាពបែបនោះធ្វើឱ្យយល់ច្រឡំថា ពួកនាងស្រឡាញ់គ្នា ហើយមានការសួរនាំជាបន្តបន្ទាប់ថា នាងស្រឡាញ់លោកឋានៈពិតមែនឬអត់ ។
កញ្ញាសឿន ផាភួង និយាយថា«តែធាតុពិតនាងខ្ញុំអត់ស្អប់គាត់ទេ គ្រាន់តែរាប់អានជាមិត្តភាពអត់គិតដល់ចំណុចគូសង្សារអ្វីដូចអ្នកសិល្បៈយល់ឃើញ ឬមហាជនយល់កន្លងមកឡើយ ។ នាងខ្ញុំចង់បញ្ជាក់ពេលនេះតែម្តងទៅ កុំឱ្យមានការភ័នច្រឡំ ហើយលោកឋានៈឱ្យគាត់អាចដឹងដែរថារវាងនាងខ្ញុំ និងគាត់បែបណា ព្រោះខ្ញុំឧស្សាហ៍និយាយប្រាប់ញឹកញាប់ដែរថាកុំឱ្យបង្ហោះពាក្យណាស៊ីអារម្មណ៍ពេក នាំឱ្យគេគិតថាអុីចឹង ធាតុពិតអត់ទេ ។ ខ្ញុំមិនប្រកាន់ការថតរូបលេងជាមួយគ្នានោះទេ ព្រោះយើងសិល្បៈដូចគ្នា ហើយនាងខ្ញុំចង់ប្រាប់មហាជនផងដែរថា បុរសដែលជាគូស្នេហ៍របស់នាងខ្ញុំ ក្នុងចិត្តនាងខ្ញុំស្រឡាញ់តែបុរសណាមានវ័យបងនាងខ្ញុំ៥ទៅ៦ឆ្នាំប៉ុណ្ណោះ អត់ចង់បានក្មេងជាងនាងខ្ញុំឡើយ ហើយពេលនេះនាងខ្ញុំមិនចង់ឱ្យមានការ ខុសទៅៗទេខ្លាចមានអ្នកស្រឡាញ់នាងខ្ញុំគាត់អន់ចិត្ត ឬមិនហ៊ានមើលចិត្តនាងខ្ញុំព្រោះតែការស្និតគ្នាកន្លងមកនេះ» ។
កញ្ញាសឿន ផាភួងរំពឹងថាលោកយុទ្ឋ ឋានៈពិតជាយល់ពីចំណុចដែលនាងចង់បាន គឺកុំឱ្យមានការយល់ច្រឡំរឿងស្នេហ៍ ៕
ចែករំលែកព័តមាននេះ